اصل الحواوشى

 #اذا_عرف_السبب

#اصل_الحواوشى 

#الليله٢١٣

#اقرأ_للاخر_فى_فالاخر_تكه

طبعا كلنا بنحبه وبناكله سواء من ايد ماما ف البيت 

او من المحلات 

وسعره يتراوح بين ٣ جنيه لحد ٧٥ جنيه 

حسب المكان ونوع الحشوه او الحيوان اللى جوه الرغيف 

زمان وانا صغيره سمعت خالى الله يرحمه بيحكى عنه وبيقول ... انه اكل منه من ايد المعلم حواوشى نفسه 

كنت بحب خالى ولا اظن فيه الكذب ولذا صدقته 

وان كنت لم اتخيل ان صاحب هذا الاختراع العظيم بنى ادم نشوفه ونكلمه وناكل من ايده 

طب عاوزاك تتخيل 

انى بحكيلك انى كلت الكفته من ايد مدام كفته شخصيا و دا ف محل الشيف كباب 

اكيد هتظن بيا الظنون 

علشان كده احب اقولك لو كنت من ٨٠ او ١٠٠ سنه قلتلك هاعزمك على حواوشى مكنتش فهمت دا .. اكل .. ولا شرب .. ولا مكان 

واصل  الحكايه ان فى راجل جزار خطرت ف دماغه فكره ... وعنها وجاب اللحمه المفرومه وضاف لها توابل كتيره و بصل وفلفل اخضر  و حاجه سريه  هاقولها ف الاخر 

وحط الحشوه دى ف رغيف بلدى وسواها ف الفرن 

وكانت اكله حلوه خالص مالص 

بمناسبه خالص مالص ... دى حكايه جملة خالص مالص بالص

#الليله٨٥

خالص مالص بالص

https://www.facebook.com/102264164820545/posts/152455093134785/

اختلف الناس ف اسمه الاول ( اسم المخترع مش اسم الحواوشى)

فى قال احمد وفى قال محمد وفى قال انور مصطفى 

بس الكل اجمع ان اللقب حواوشى 

كمان البدايه اختلف الناس فيها فى قال انه كان جزار وعنده محل ف العتبه والناس بتشترى منه ١٩٧١

فى قال انه كان جزار من ١٩٣٥ وكان كمان  دارس ف الازهر وانه بعد عودته من دراسته كان بيعمل الرغيف ده وياكله وف يوم دعا الشيخ المراغى والشيخ الجمال ولما داقوه وعجبهم انتشر بين اصحابهم اللى نشروه بين  الناس وبقوا ييجوا عنده المحل يطلبوه منه 

واشتهر المحل وانتشر الرغيف 

وفتح انور مصطفى محل اكبر ف التوفيقيه ظل مزاراً لعشاق الحواوشى حتى الان بالمناسبه 

وكان الفنانين زمان انور وجدى ويوسف وهبى وذكى جمعه ( مين ذكى جمعه ده ؟؟ )ماعلينا كانوا  بيروحوا ياكلوا فيه 

زادت شهره رغيف الحواوشى وانتشر من مكان لمكان داخل القاهره 

ثم خارجها لكل المحافظات 

وجم الاسكندرانيه وحطوا التاتش بتاعهم وعملوه بالعجين بدل خبز الفرن البلدى 

واتسمى حواوشى اسكندرانى 

سواء ظهر عام ١٩٣٥ او ١٩٧١ 

سواء اخترعه احمد ولا محمد ولا انور 

سواء ابتدى بعربيه بيجرها ف الشوارع 

او محل جزاره او طالب علم ودى هوايه جانبيه 

الfacts ف الموضوع 

ان صاحب الاختراع اسمه حواوشى

وانه ابتدا فى الفتره من ٣٥ الى ٧١ من العام الماضى

وانه بدا من التوفيقيه وانتشر ف العالم كله 

اما بقى معنى كلمة حواوشى فدا مالوش دعوه  خالص باللحمه  ولا الاكل بتاتاً

الحكايه ان زمان الكتب كانت بتنسخ باليد 

وكانت شغلانه النساخون دى صعبه و مهمه اوى

لان كل كتاب بينقل باليد كلمه كلمه وحرف حرف 

انما كان فى حاجه اصعب من نسخ الكتاب نفسه 

وهى نسخ الكلام الصغنن اللى بيتكتب فى حواشى الكتاب او اللى بنسميها دلوقتى الهوامش

وطبعا دا بيبقى بخط اصغر واكثر دقه وبيطلع العين من الاخر

فاذا كان النساخ متميز  كناقل للكتب

فمن اكثر منه تميزا هو من ينقل الكتب التى بها كثير من الحواشى 

وعلشان كده الفئه دى من النساخ مشهوره ومعروفه بالاسم 

وبنقول عليه الحواوشى 

اى ناقل حواشى الكتب ( الهوامش ) 

وفضلت الشغلانه دى منتشره فى مصر وخصوصا محافظه الشرقيه و مدينة السنبلاوبن تحديدا 

بس دوام الحال من المحال

ودخلت الحمله الفرنسيه ودخلت معها المطبعه 

واندثرت شغلانه النساخين ومعاها فئة الحواوشيه المتميزه 

واضطروا يشتغلوا ف الزراعه وانتشروا ف اماكن مختلفه ف الدلتا والصعيد 

واتسنى اسمهم زى ما اتنست الشغلانه سبب الاسم 

علشان ييجى حفيد بعد كل السنين دى يتميز بحاجه تانيه خالص

تنشر الاسم وتشهره بين العالمين 

وزى ما قيل عنهم 

اه صاحب الاختراع مخدش برائه اختراع ولكن خد الاهم خد شهره تطبق الافاق

#النصيحه 

اما تعملوا الحواوشى فى البيت ابقوا حطوا فيه قرفه مطحونه ... وادعولى وادعوا لخالى مصطفى الله يرحمه دا جايبها من عند الحاج حواوشى نفسه 

#حكايه_ورا_كل_اكله 

#طب_الحواوشى_ابو_٣جنيه_ماله؟#ايه_نوع_الحيوان؟

#ابتسام