#حسام #الليله٢١٨

#حسام 
#الليله٢١٨

حسام ده يبقى ابن خالتى كان اكبر منى بشويه سنين 
ممكن تقول  My hero

اخويا الكبير اللى بيعلمنى كل حاجه 
بتعلم منه الالعاب 
وبيفهمنى الدنيا طبعا بمفاهيمه هو 

فعرفنى على شخصية ابو رجل مسلوخه 

و بيضحك عليا ويقولى انه موجود ف الخدديه وان الخرم الصغير اللى ف بوزه من ابوازها ممكن يطلع منه ابو رجل مسلوخه وياكلنى مع ان الخرم صغير اوى ومش هيعرف يخرج منه ومع انى مقتنعه انه مش هيعرف يخرج بس بردو كنت بخاف 

كان ساعات بييجى عندنا يبات كام يوم باعتبار ان مامتى ماما خالتو

اللى هو واخواته بيقضوا وقت كبير من اجازه اخر السنه عندها باعتبارها معندهاش اولاد فكانت خالتى بتضحى بحد كل شويه يسلى ماما 

ودا قبل ما انا اتولد 

ومش عارفه فاكره ازاى 

لما فؤاد اخويا الله يرحمه اتولد كنت عندى ٤ سنين الا شهرين 

ووالله ما عارفه  ازاى فاكره اليوم ده بتفاصيله 

لما ماما صحيت تعبانه وكان معانا حسام الراجل الصغير ومساعد بابا ف الخروج من البيت ومينسوش الشنطه بتاعة ماما ولا البت الصغيره ( انا ) وخدنا بابا ورحنا عند جدتى 
وساعتها اول ما التاكسى وقف عند بيتهم 
نزل حسام جرى وقالها خالتى بتولد 

انا كمان كنت ساعات بكون  زعيمه ف نفسى وليا اراء ف الزراعه والتنميه الزراعيه 

لما كان حسام ابن عمى وحسام ابن خالتى  متجمعين عندنا وكلنا مانجه و ساعتها إقترحت عليهم 
انهم يزرعوا البذور بتاعة المانجه وكمان علشان نزود المحصول نزرع القشر كمان 
وفعلا رحنا ورا البيت ف الحته اللى متكسره من الرصيف علشان يزرعوها 

بس صعبوا عليا انهم يحفروا ف الارض وخصوصا باديهم وصيف حر وشمس وفرهده 

فاقترحت اقتراح عبقرى 

اننا نحطها تحت البلاطات اللى لسه متخلعتش من الرصيف واللى كان بينها وبين الارض مسافه تسمح بحشر بذور المانجه وقشورها 

والشباب عجبتهم الفكره بلا حفر بلا وجع قلب 

بس سبحان الله مش عارفه مطرحتش ليه🤔 

حسام حكايته خلصت من الدنيا بدرى لما ف يوم وهو ف اجازه  سادسه ابتدائ راح مع صاحبه يلعبوا كوره عند ماسبيروا 
بعد ما خلصوا نزلوا يتشطفوا علشان متكتشفش جريمتهم انهم بعدوا عن البيت من غير ما يستأذنوا 

بس هو نزل ومطلعش 

بيقولوا الصخور هناك زلقه وعليها الفطريات اللى بتخليها مزفلطه ف وقع ف الميه وهو مبيعرفش يعوم

وبيقولوا الجنيه ( النداهه يعنى)اللى عند منطقه ماسبيرو دى معروفه انها بتسرق ناس كتير وتغرقهم 

بس اللى حصل ان حسام كان اول كسره 
واول حزن 
واول مره افهم يعنى ايه صوان ... وعزا 
واول مره اتعرف ع الموت وافهم معناه 

بعدها قابلت الموت كتير وخد ناس كتير بس يظل 
رفيق الطفوله والاخ الكبير والراجل الهمام 

فعلا كاناخويا الكبير 

و من ساعتها عرفنا طلعة رجب وطلعه نص شعبان 
واليوم الاول من العيد الصغير واليوم التانى من العيد الكبير 

اللى ماما كانت متمسكه انها تروحهم مع خالتى علشان متسيبهاش لوحدها حتى وولادها بيروحوا معاها لحد ما تعبت ومبقتش قادره ع المشوار للامام الشافعى 

عرفت كمان 
والقرص والشوريك 
والجوافه والبلح والخيار 

والورد اللى كنت بلف اسرقه😔 من على شواهد الترب بعد ما زوارهم يمشوا 
واحطه ف حاجة خالتى 

معلش الصور بعافيه بسبب عوامل الزمن 
اه انا السنيوره الكيرلى اللى بتنفخ الشمع جنبه

الله يرحمك يا حسام 
و يرحمهم جميعا 

#ادعولهم_بالرحمه
#وادعولى_ابطل_سح_دموع 
#ابتسام

تعليقات

إرسال تعليق

المشاركات الشائعة من هذه المدونة

#ليه_طيب_اكسر_وراه_قله؟ج٢#الليله٦٠٨

صورة
#ليه_طيب_اكسر_وراه_قله؟ج٢ #الليله٦٠٨ اما بقى الحدوته التانيه فبتقولك ان زمان وبردو ايام الفراعنه كانت لما الانسان يموت بيكسروا وراه اناء من الفخار  يعنى هنا كانت عاده مرتبطه بالجنائز  وطبعا كلنا عارفين اهمية الموت و الحياه الابديه والكلام دا كله عند المصريين القدماء واظن انى لسه مخلصه سلسلة ايزيس وازوريس اللى بتحكى باستفاضه ف اهمية الدفن والليله دى  طب بردو ليه نكسر وراه حاجه فخار واللى رسيت ع القله لاننا بقينا نستخدم معادن وصينى واوانى تانيه حاليا  انما القله فهى اللى كانت مكمله حتى دخول التلاجه الايديال ال ٨ قدم لكل بيت نرجع لكسر القله الفكره انهم مش بس بيكسروا القله لاء وكمان بياخدوها ويدفنوها جنب قبر المرحوم طيب الله ثراه ... ودا ليه؟ علشان لما ترجع الكا يعنى (الروح) على بيته مره تانيه مره ماتأذيش اهل البيت اللى موجودين فيه دول كانوا بيعملوا الاكل ف البيت وياخدوه عند مكان المقبره وياهم وهناك ياكلوا وبعدين يكسروا الاوانى دى ويسيبوا الفخار الكسر هناك  واللى كانوا بيسموه الشِقف جمع شقفه لدرجة ان المتخصصين فى الآثار وهم بينقبوا لو لقوا ف مكان ما آنيه  فخاري...
قراءة المزيد

#هو_صحيح_الجوع_كافر_بس_مش_للدرجه_دى؟؟؟ج٢#الليله٦٥٠

صورة
#هو_صحيح_الجوع_كافر_بس_مش_للدرجه_دى؟؟؟ج٢ #الليله٦٥٠  زى ما قولنا كان الموسم الزراعي في شمال العراق اواخر عام ١٩١٧ سئ جداً ومطر قليل ومحصول ضعيف و بيقول محمد امين العمري  واللى كان ف الوقت ده ضابط اعاشة في الجيش السادس التركي ويعتبر شاهد عيان ع الفتره دى بيحكى ويقول : انه كتب تقرير للقائد خليل باشا وضح فيه الخطر اللي هيحصل في ولاية الموصل بسبب قلة الحبوب و انهم ضرورى يستعدوا ويجيبوا مؤن من اسطنبول و يلحقوا الدنيا قبل فوات الاوان   لكن خليل باشا كبر دماغه و مهتمش للتحذير ده وقال له  ان ولاية الموصل هي مستودع تموين العراق و هي مش  محتاجة تموين يجي لها من بره يا حبيبى احنا ناخد ومنديش بس زى ما توقع محمد امين العامرى بدأت المجاعه حصل ايه ف المجاعه ؟ هل تداركت الحكومه الغير واعيه سوء الحال ؟ ولا ايه اللى حصل؟ ازاى اتعامل اهل الموصل مع المجاعه؟ اقولكم اولا زى ما توقع ضابط الاعاشه بدأت المجاعة تستفحل وشملت الموصل والمنطقة الواسعة اللى ف الشمال منها لحد بحيرة ((وان)) وبدأت جموع من الجياع تهجر ديارها في الاناضول وتتوجه ناحية الموصل  ما الكل بقى فاكرها مليانه خير...
قراءة المزيد

#زئرده #الليله١٠١

صورة
#زئرده #الليله١٠١ الحدوته المرادى حقيقيه زى حكايه #الشنطه_المعجزه  اللى ده الرابط بتاعها https://www.facebook.com/102264164820545/posts/142331610813800/ بردو جيران ماما زمان ف الحى العريق والشارع الجميل (( ابن الرشيد )) اللى لا اتولدت فيه ولا عشت فيه بس حبيته من حب امى فيه ومن حكاياتها عنه  (( زئرده ))  دى واحده جارتهم وباين من اسمها -اللى طبعا مش اسمها الحقيقى - ولكن الناس كانوا مسمينها كده لانها كانت صغننه الحجم  تقريبا كان اسمها نوال بس اللى كانت الدنيا كلها بتناديها بيه كان زيئرده كانت متجوزه بس معهاش اولاد وجوزها كان بيشتغل ف بلد تانيه وبييجى يشوفها كل فتره  وعلشان كده كانت عايشه ف شقه ف بيت اهلها بس بتبات لوحدها ف شقتها كان الناس كلها عارفين انهم مرتاحين ماديا  وف ليله صيفيه حاره حين لم يكن يوجد لا تكييف ولا حتى مروحه فى هذا الزمان القديم  و حيث لا يوجد حل سوى ان تنهى ليلتك بدش بارد لتذهب للنوم متأخراً على ١١ونص ١٢ بالليل كده  بعد ساعه ولا ٢ اما المدينه كلها تغرق فى سبات عميق مفيش صاحى  كانت كالعاده بايته لوحدها وحست بحركه معاها ف اوضة ...
قراءة المزيد