#ماندو_والمكرونه #الليله٢١٩

#ماندو_والمكرونه
#الليله٢١٩

حدوته هديه السنه الجديده

كان ياماكان ولد صغير اسمه ماندو

ماندو كان مغلب ماما ف الاكل خالص 

وف يوم ندهت ماما لماندو وقالتله تعالى عملتلك خضار ورز

رد ماندو وقال بس انا مش عاوز رز انا عاوز مكرونه 

ماما قالت الرز حلو قالها لا ماليش دعوه عاوز مكرونه

ماما قامت وعملت مكرونه 

وندهت تانى لماندو 

تعالى ياماندو كل المكرونه 

ماندو قال لاء مش عاوز اكل مكرونه
تعالى يا ماندو كل المكرونه 

لاء ... مش هاكل مكرونه

ماما اتغاظت اوى 

وقالت تعالى ياعصايه اضربى ماندو اللى مش عاوز ياكل مكرونه 

ردت العصايه وقالت وانا مالى ومال ماندو اللى مش عايز ياكل المكرونه 

ماما قالت طيب .... تعالى يا نار احرقى العصايه  ... اللي مش عايزه تضرب ماندو اللي مش عايز ياكل المكرونه 

ردت النار وقالت وانا مالي ومال العصايه اللى  مش عايزه تضرب ماندو انا مش عايز ياكل المكرونه 

ماما قالت تعالى يا ميه اطفي النار 
اللي مش عايزه تحرق العصايه اللي مش عايزه تضرب ماندو انا مش عايز ياكل المكرونه 

ردت الميه وقالت وانا مالي ومال النار اللي مش عايزه تحرق العصايه انا مش عايزه تضرب ماندو ايه مش عايز ياكل المكرونه 

ماما قالت تعالى يا بقره اشربى الميه اللى مش عايزه تطفي النار اللى مش عايزه تحرق العصايا اللى مش عايزه تضرب ماندو هي دي مش عايز ياكل المكرونه 

ردت البقره وقالت وانا مالي ومال الميه اللى مش عايزه تطفي النار  اللي مش عايزه تحرق العصايه اللي مش عايزه تضرب ماندو  اللي مش عايز ياكل مكرونه 

ماما قالت طيب تعال يا جزار ادبح البقره اللي مش عايزه تشرب الميه اللي مش عايزه تطفي النار 
النار اللى مش عايزه تحرق العصايا 
العصايه اللي مش عايزه تضرب ماندو 
ماندو اللى مش عايز ياكل مكرونه 

رد الجزار وقال وانا مالي ومال البقره اللى مش عايزه تشرب الميه 
الميه اللى مش عايزه تطفي النار 
النار اللى مش عايزه تحرق العصايه 

العصايه اللى مش عايزه تضرب ماندو 
ماندو اللى مش عايز ياكل مكرونه 

ماما قالت تعالى يا فار عض الجزار 
الجزار 
اللى مش عايز يدبح البقره 
البقره اللى  مش عايزه تشرب الميه 
الميه اللي مش عايزه اللي مش عايز تطفي النار النار اللي مش عايزه تحرق العصايه
العصايه اللي مش عايزه تضرب ماندو 
ماندو اللي مش عايز ياكل المكرونه 

رد الفار وقال وانا مالي ومال الجزار  
الجزار اللى مش عاوز  يذبح البقره 
البقره اللى مش عايزه تشرب الميه 
الميه اللى مش عايزه تطفى النار 
النار اللى  مش عايزه تحرق العصايه 
العصايه اللي مش عايزه بتضرب ماندو 
ماندو اللي مش عايز ياكل مكرونه 

ماما قالت طيب تعالى يا قطه كلى الفار
الفار  اللي مش عايز  يعض الجزار 
الجزار اللى مش عايز يذبح البقره 
البقره اللي مش عايزه تشرب الميه 
الميه اللي مش عايزه تطفي النار 
النار اللي مش عايزه تحرق العصايا 
العصايه اللي مش عايزه تضرب ماندو 
ماندو اللي مش عايز ياكل المكرونه 

جريت القطه عشان تاكل الفار 
وجري  الفار علشان يعض الجزار 
وجري الجزار علشان يذبح البقره 
وجريت البقره علشان تشرب الميه 
وجريت الميه  تطفي النار وجريت النار تحرق العصايه 

وجريت العصايا تضرب ماندو 
وجري ماندو و اكل المكرونه

كان ليه الفرهده دى من الاول يا ماندو 😂😂

 وتوته توته خلصت الحدوته
احفظوها وقولوها للعيال بسرعه 

انا حافظاها سماعى حظ اللى عاوز يحفظها اسهل لانه هيقرأ 

#ماندو_كل_طفل_مصرى
#بس_عندنا_النار_والميه_مش_بيجروا_والا_كانوا_بهدلونا
#ابتسام

تعليقات

إرسال تعليق

المشاركات الشائعة من هذه المدونة

#ليه_طيب_اكسر_وراه_قله؟ج٢#الليله٦٠٨

صورة
#ليه_طيب_اكسر_وراه_قله؟ج٢ #الليله٦٠٨ اما بقى الحدوته التانيه فبتقولك ان زمان وبردو ايام الفراعنه كانت لما الانسان يموت بيكسروا وراه اناء من الفخار  يعنى هنا كانت عاده مرتبطه بالجنائز  وطبعا كلنا عارفين اهمية الموت و الحياه الابديه والكلام دا كله عند المصريين القدماء واظن انى لسه مخلصه سلسلة ايزيس وازوريس اللى بتحكى باستفاضه ف اهمية الدفن والليله دى  طب بردو ليه نكسر وراه حاجه فخار واللى رسيت ع القله لاننا بقينا نستخدم معادن وصينى واوانى تانيه حاليا  انما القله فهى اللى كانت مكمله حتى دخول التلاجه الايديال ال ٨ قدم لكل بيت نرجع لكسر القله الفكره انهم مش بس بيكسروا القله لاء وكمان بياخدوها ويدفنوها جنب قبر المرحوم طيب الله ثراه ... ودا ليه؟ علشان لما ترجع الكا يعنى (الروح) على بيته مره تانيه مره ماتأذيش اهل البيت اللى موجودين فيه دول كانوا بيعملوا الاكل ف البيت وياخدوه عند مكان المقبره وياهم وهناك ياكلوا وبعدين يكسروا الاوانى دى ويسيبوا الفخار الكسر هناك  واللى كانوا بيسموه الشِقف جمع شقفه لدرجة ان المتخصصين فى الآثار وهم بينقبوا لو لقوا ف مكان ما آنيه  فخاري...
قراءة المزيد

#هو_صحيح_الجوع_كافر_بس_مش_للدرجه_دى؟؟؟ج٢#الليله٦٥٠

صورة
#هو_صحيح_الجوع_كافر_بس_مش_للدرجه_دى؟؟؟ج٢ #الليله٦٥٠  زى ما قولنا كان الموسم الزراعي في شمال العراق اواخر عام ١٩١٧ سئ جداً ومطر قليل ومحصول ضعيف و بيقول محمد امين العمري  واللى كان ف الوقت ده ضابط اعاشة في الجيش السادس التركي ويعتبر شاهد عيان ع الفتره دى بيحكى ويقول : انه كتب تقرير للقائد خليل باشا وضح فيه الخطر اللي هيحصل في ولاية الموصل بسبب قلة الحبوب و انهم ضرورى يستعدوا ويجيبوا مؤن من اسطنبول و يلحقوا الدنيا قبل فوات الاوان   لكن خليل باشا كبر دماغه و مهتمش للتحذير ده وقال له  ان ولاية الموصل هي مستودع تموين العراق و هي مش  محتاجة تموين يجي لها من بره يا حبيبى احنا ناخد ومنديش بس زى ما توقع محمد امين العامرى بدأت المجاعه حصل ايه ف المجاعه ؟ هل تداركت الحكومه الغير واعيه سوء الحال ؟ ولا ايه اللى حصل؟ ازاى اتعامل اهل الموصل مع المجاعه؟ اقولكم اولا زى ما توقع ضابط الاعاشه بدأت المجاعة تستفحل وشملت الموصل والمنطقة الواسعة اللى ف الشمال منها لحد بحيرة ((وان)) وبدأت جموع من الجياع تهجر ديارها في الاناضول وتتوجه ناحية الموصل  ما الكل بقى فاكرها مليانه خير...
قراءة المزيد

#زئرده #الليله١٠١

صورة
#زئرده #الليله١٠١ الحدوته المرادى حقيقيه زى حكايه #الشنطه_المعجزه  اللى ده الرابط بتاعها https://www.facebook.com/102264164820545/posts/142331610813800/ بردو جيران ماما زمان ف الحى العريق والشارع الجميل (( ابن الرشيد )) اللى لا اتولدت فيه ولا عشت فيه بس حبيته من حب امى فيه ومن حكاياتها عنه  (( زئرده ))  دى واحده جارتهم وباين من اسمها -اللى طبعا مش اسمها الحقيقى - ولكن الناس كانوا مسمينها كده لانها كانت صغننه الحجم  تقريبا كان اسمها نوال بس اللى كانت الدنيا كلها بتناديها بيه كان زيئرده كانت متجوزه بس معهاش اولاد وجوزها كان بيشتغل ف بلد تانيه وبييجى يشوفها كل فتره  وعلشان كده كانت عايشه ف شقه ف بيت اهلها بس بتبات لوحدها ف شقتها كان الناس كلها عارفين انهم مرتاحين ماديا  وف ليله صيفيه حاره حين لم يكن يوجد لا تكييف ولا حتى مروحه فى هذا الزمان القديم  و حيث لا يوجد حل سوى ان تنهى ليلتك بدش بارد لتذهب للنوم متأخراً على ١١ونص ١٢ بالليل كده  بعد ساعه ولا ٢ اما المدينه كلها تغرق فى سبات عميق مفيش صاحى  كانت كالعاده بايته لوحدها وحست بحركه معاها ف اوضة ...
قراءة المزيد