#رز_المرحومه #الليله٢٣٥

#رز_المرحومه 
#الليله٢٣٥

الحدوته دى من حواديت امى ويمكن دى كانت اول مره اتكلم على النت على حكايه من حكايات زمان 

علشان كده بحبها بس اول مره احكيها هنا ف الصفحه

كان ياما كان واحد مراته ماتت وبعد فتره اتجوز واحده تانيه 

كانت ست بيت شاطره 

ونَفسها ف الاكل لا يُعلى عليه 

وجوزها كان معجب جدا بطبيخها 
ويشكر جدا ف اى اكل بتعمله من حادق او حلو ... 

الا الرز 

 كل ما تعمله رز يقولها : لاء .. 

توء .. توء .. توء 

مش زى رز المرحومه

طب وهو رز المرحومه دا كان شكله ايه ؟؟

يقولها مش عارف ... بس كان بيبقى حلو كده وطِعم 

فتانى يوم تغير 

مره تعمله بشعريه 

ولما يدوقه يقول لاء مش زى رز المرحومه 

ومره تعمله حبه وحبه 

وهو يرجع ويدوقه ويقولها توء توء مش ده 

ومره تعمله اخضر
ومره تعمله احمر 
ومره اصفر 
ومره ابيض 
ومره بسمتى
ومره بالخلطه 

 تصنف وتفنن وكل مره بطريقه احسن من التانيه وبردو مش زى رز المرحومه وميرضاش ياكله 

فضلت على كده شهور 
لما حملت وخلفت 

وهو ع الحال ده وهى بردو كل يوم تعمل رز 

وف مره البيبى فضل يعيط ويزن وشغلها  فيه ف نسيت الرز  ع النار وشاط وبقى وحش اوى ومفيش وقت تعمل غيره قالت مش مهم كده كده مش بياكله كل يوم 

المهم دا جه اول ما داقه 

قال الله ياسلام اهو كده ... زى رز المرحومه 

وطلع ان المرحومه مكانتش بتعرف تطبخ وكل يوم تشيط الرز 

وطلع ان الباشا متعود ع الرز الشايط بتاع مراته الاولانيه ومش راضى له بديل

ودا اللى عند كتير مننا وبيعمله  اننا نرتبط بحاجه او شخص او طعم او مكان ونرفض اننا نتعرف على غيره ولا حتى نجرب بديل للى اتعودناه وبكده نخسر فرص تانيه لحاجات يمكن احسن من اللى حبيناه بس مش متاح دلوقتى

ف الحكايه كانت المرحومه بتشيط الرز 

بس ممكن تكون كانت بتعمله بطريقه تانيه وحلو وكل حاجه بس لازم نغير بس هو  مش راضى يجرب او يتعرف على حاجه غير رز المرحومه 

احنا كمان كتير بنعمل كده علشان  ف كل مره متمسكين بطعم رز المرحومه

اه عاوزين نهاية الحدوته   
بقت كل يوم تعمل الرز وتغرف طبقها وبعد كده طبقها واطباق ولادها وتسيب طبقه على النار لحد ما يشيط علشان يكون زى رز المرحومه 

وتوته توته خلصت الحدوته 

#جرب_إتعرف
#رز_المرحومه
#حكايات_امى_الله_يرحمها
#ابتسام

تعليقات

إرسال تعليق

المشاركات الشائعة من هذه المدونة

#ليه_طيب_اكسر_وراه_قله؟ج٢#الليله٦٠٨

صورة
#ليه_طيب_اكسر_وراه_قله؟ج٢ #الليله٦٠٨ اما بقى الحدوته التانيه فبتقولك ان زمان وبردو ايام الفراعنه كانت لما الانسان يموت بيكسروا وراه اناء من الفخار  يعنى هنا كانت عاده مرتبطه بالجنائز  وطبعا كلنا عارفين اهمية الموت و الحياه الابديه والكلام دا كله عند المصريين القدماء واظن انى لسه مخلصه سلسلة ايزيس وازوريس اللى بتحكى باستفاضه ف اهمية الدفن والليله دى  طب بردو ليه نكسر وراه حاجه فخار واللى رسيت ع القله لاننا بقينا نستخدم معادن وصينى واوانى تانيه حاليا  انما القله فهى اللى كانت مكمله حتى دخول التلاجه الايديال ال ٨ قدم لكل بيت نرجع لكسر القله الفكره انهم مش بس بيكسروا القله لاء وكمان بياخدوها ويدفنوها جنب قبر المرحوم طيب الله ثراه ... ودا ليه؟ علشان لما ترجع الكا يعنى (الروح) على بيته مره تانيه مره ماتأذيش اهل البيت اللى موجودين فيه دول كانوا بيعملوا الاكل ف البيت وياخدوه عند مكان المقبره وياهم وهناك ياكلوا وبعدين يكسروا الاوانى دى ويسيبوا الفخار الكسر هناك  واللى كانوا بيسموه الشِقف جمع شقفه لدرجة ان المتخصصين فى الآثار وهم بينقبوا لو لقوا ف مكان ما آنيه  فخاري...
قراءة المزيد

#هو_صحيح_الجوع_كافر_بس_مش_للدرجه_دى؟؟؟ج٢#الليله٦٥٠

صورة
#هو_صحيح_الجوع_كافر_بس_مش_للدرجه_دى؟؟؟ج٢ #الليله٦٥٠  زى ما قولنا كان الموسم الزراعي في شمال العراق اواخر عام ١٩١٧ سئ جداً ومطر قليل ومحصول ضعيف و بيقول محمد امين العمري  واللى كان ف الوقت ده ضابط اعاشة في الجيش السادس التركي ويعتبر شاهد عيان ع الفتره دى بيحكى ويقول : انه كتب تقرير للقائد خليل باشا وضح فيه الخطر اللي هيحصل في ولاية الموصل بسبب قلة الحبوب و انهم ضرورى يستعدوا ويجيبوا مؤن من اسطنبول و يلحقوا الدنيا قبل فوات الاوان   لكن خليل باشا كبر دماغه و مهتمش للتحذير ده وقال له  ان ولاية الموصل هي مستودع تموين العراق و هي مش  محتاجة تموين يجي لها من بره يا حبيبى احنا ناخد ومنديش بس زى ما توقع محمد امين العامرى بدأت المجاعه حصل ايه ف المجاعه ؟ هل تداركت الحكومه الغير واعيه سوء الحال ؟ ولا ايه اللى حصل؟ ازاى اتعامل اهل الموصل مع المجاعه؟ اقولكم اولا زى ما توقع ضابط الاعاشه بدأت المجاعة تستفحل وشملت الموصل والمنطقة الواسعة اللى ف الشمال منها لحد بحيرة ((وان)) وبدأت جموع من الجياع تهجر ديارها في الاناضول وتتوجه ناحية الموصل  ما الكل بقى فاكرها مليانه خير...
قراءة المزيد

#زئرده #الليله١٠١

صورة
#زئرده #الليله١٠١ الحدوته المرادى حقيقيه زى حكايه #الشنطه_المعجزه  اللى ده الرابط بتاعها https://www.facebook.com/102264164820545/posts/142331610813800/ بردو جيران ماما زمان ف الحى العريق والشارع الجميل (( ابن الرشيد )) اللى لا اتولدت فيه ولا عشت فيه بس حبيته من حب امى فيه ومن حكاياتها عنه  (( زئرده ))  دى واحده جارتهم وباين من اسمها -اللى طبعا مش اسمها الحقيقى - ولكن الناس كانوا مسمينها كده لانها كانت صغننه الحجم  تقريبا كان اسمها نوال بس اللى كانت الدنيا كلها بتناديها بيه كان زيئرده كانت متجوزه بس معهاش اولاد وجوزها كان بيشتغل ف بلد تانيه وبييجى يشوفها كل فتره  وعلشان كده كانت عايشه ف شقه ف بيت اهلها بس بتبات لوحدها ف شقتها كان الناس كلها عارفين انهم مرتاحين ماديا  وف ليله صيفيه حاره حين لم يكن يوجد لا تكييف ولا حتى مروحه فى هذا الزمان القديم  و حيث لا يوجد حل سوى ان تنهى ليلتك بدش بارد لتذهب للنوم متأخراً على ١١ونص ١٢ بالليل كده  بعد ساعه ولا ٢ اما المدينه كلها تغرق فى سبات عميق مفيش صاحى  كانت كالعاده بايته لوحدها وحست بحركه معاها ف اوضة ...
قراءة المزيد