#اصل_الحكايه #الليله٢٣٦ #حرب_الملوخيه
#اصل_الحكايه
#الليله
#حرب_الملوخيه
حلقة جديده من سلسلة اعرف بتاكل ايه
وبما اننا امبارح اتكلمنا عن الرز وحكينا حكاية رز المرحومه
فقلت واحنا ف المطبخ نجيب اخته الحبيبه وصديقته الصدوقه ونتكلم النهارده عن الملوخيه
وزى ما اتكلمنا قبل كده عن الحواوشى
ودا الرابط بتاعه
https://ebtsam-elsawee.blogspot.com/2020/12/blog-post.html?m=1
والكريب
ودا الرابط بتاعه
https://ebtsam-elsawee.blogspot.com/2021/01/blog-post.html?m=1
الملوخيه تاخد حقها
طبعا الملوخيه اكله شعبيه مصريه
ياكلها الغنى وياكلها الفقير
الملوخيه كانت سبب ف مشاكل وحكايات عاشها المصريين عبر العصور
ومازالت حتى الان مصدر للخلافات والمشاكل
تصل احيانا لصراعات ولا اللى بين الاهلاويه والزملكاويه
و منها مثلا ياترى الملوخيه تتاكل بالرز ولا بالعيش وهاتك يا خناق
معاها بتشنجان مخلل ولا سلطه خضرة
وعلشان نتفق الملوخيه موجوده ف مصر من ايام الفراعنه
( زى اى حاجه ف مصر والعالم 😉) تلاقى اصلها الفراعنه لوجيكل يعنى
بس حكاية اصل الملوخيه ف مصر حكاية ظريفه
بيقولك يا سيدى المصريين القدماء زمان كانو مسمينها ( خيه )
تمام كده و مكانوش بيحبوا ياكلوها
وكانوا بيخافوا منها وبيعتبروها عشبه سامه بتطلع بين الزرع بشكل عشوائى وبالتالى بيجمعوها ويحرقوها بره الغيط ... وعمرهم ما فكروا ياكلوها
على اعتبار انها سامه يمكن علشان كانت بتلين ودا قلقهم منها وقالوا دا الليونه دى كده تبقى سامه ونبعد عنها ... ويادار ما دخلك شر
لحد ما جه الهكسوس
طبعا الهكسوس كانوا جايين يحتلوا البلد ويقيموا فيها
علشان كده حرصوا على طمس الهويه المصريه
وحرقوا معابد او هدموها و فرضوا ضرايب ... ونهبوا كل اللى عاوزينه ... فى محاوله للسيطره التامه على البلد
وامعانا فى اذى المصريين وذلهم
قالولهم كلوا ( خيه )
وكلوا باللغه القديمه ( ملو )
وبقى الامر على المصريين ( ملو.. خيه ) او كلوا عشبة ال خيه
المصريين عارفين انها سامه وبتموت والهكسوس هيموتوا اللى ميطيعش الاوامر
وعلشان اكديه ميت ... واكديه ميت
المصريين اضطروا ياكلوا الخيه
ومماتوش مش بس كده دا عجبهم طعمها وبقت اكله مشهوره اوى وبيحبوها وبياكلوها
على طول الزمان
وعدى قرون والمصريين بيطبخوها صيفا
وينشفوها ويفركوها علشان ياكلوها ف الشتا
ودا قبل الصوّب وملوخيه بسمه المجمده
وبصراحه مقصرتش على على بط عظمه
على وز ياسلام
وطبعا باللحمه وشوربتها ياسلام سلم
انما الفراخ فمع انها دخلت مصر كغذاء مؤخرا كده ف عهد البطالمه مثلا الا انها بقت صديقة الملوخيه الروح بالروح
وطبعا مننساش الارانب الاشهيره بالانارب ياسى محمد
وان كان ممكن للفقراء عمل ملوخيه بالميه ساده كده او على شوربه فول نابت
روح يا زمان وتعالى يا زمان
ويحكم الفاطميين مصر
وجه المعز لدين الله الفاطمى يعيش ف مصر بعد ما فتحهاله جوهر الصقلى ونقل عاصمة خلافته ف مصر
المهم تقريبا كده بطن المعز مش واخده على اكل مصر
وبدات معدته تتعب ( يمكن جاله امساك 🤔)
الله اعلم المهم ان الاطباء وصفوله الملوخيه علشان ربنا يسهله
قوم المعز لدين الله الفاطمى بعد ما داقها ....
يا ترى هيعمل ايه ؟؟؟
هيحبها ؟
هيكرهها ؟
هياكلها ؟
هيمنعها ؟
دا اللى هنعرفه بكره معلش
الموضوع كبير
والملوخيه زحلقتنى بين حكايتها
ونسيت اقوم اقطفها واخرطها
اصل حصة الغدا وجبت هاقوم عمل اهم ملوخيه واجيلكم
#اعرف_بتاكل_ايه(٣)
#اصل_الاشياء
#حرب_الملوخيه
#سلسلة_حكاية_ورا_كل_اكله
#ابتسام
تعليقات
إرسال تعليق