#الحس_مسنى_و_ابات_مهنى #الليله٢٤٤

#الحس_مسنى_و_ابات_مهنى
#الليله٢٤٤ 

قصة مثل من امثال المصريين زمان 
وجزء جديد من سلسلة ( حكايه ورا كل مثل )

حدوته جديده من حواديت امى القديمه  الله يرحمها 

الحكايه النهارده صغننه لكنها مثل قديم بنحس واحنا بنقوله بالقناعه كده والرضا 
 
كان ياما كان فى فارين اصحاب 
واحد عايش ف دكان نجار 

والتانى عايش ف دكان كبابجى 

المهم كان بقالهم كتير متقابلوش 

فلما اتقابلوا اللى عايش عند الكبابجى مكلظ كده  ومبألظ 

والتانى ياعينى سفيف ومسفرت خالص

ف الفار اللى عايش عند الكبابجى قاله مالك يابنى ضعفان ومسفرت كده
انت مبتاكلش ولا ايه ؟؟

قاله : لاء باكل 

بتاكل ايه ؟؟؟

دا سؤال فار الكبابجى 

 قاله فار ورشة النجار : 

النجار  كل يوم يدهن المسن اللى بيسن عليه المنشار والازميل بتوعه ولما يمشى انا بخرج والحس نقطة الزيت دى والحمد لله على كده 

اتخض الفار المكلبظ 
وقاله : بقى بتسمى ده اكل 

نقطة زيت تلحسها من ع المسن مسميها اكل 

 يا حرام 

طب تعالى معايا يا اخى كل من عند الكبابجى اللى انا عايش ف دكانته 

دا كلام فار الكبابجى المكلبظ 

وفضل يشجعه لحد ما اقتنع واتجرأ 

وراح معاه دكانة الكبابجى 

بس ايه بقى ....

و هم بيتسحبوا و بيدخلوا محل الكبابجى ... 

الكبابجى شافهم وهم داخلين راح ماسك الساطور وهجم عليهم به 

اللى عايش عند الكبابجى متعود ع المغامره ومترقب الخطر ومستعد له وعلشان كده قدر يهرب بسرعه 

اما اللى عايش عند النجار عايش مسالم ومش بتاع اكشن ولا مغامرات 

 و علشان كده الراجل نزل  بالساطور بس ملحقش التانى ولحقة هو 

لكن  الحمد لله .... من حظه ان الساطور نزل بس على ديله .... و قطعه

 
طبعا ما ماتش بس اتألم جامد اوى

انما ف النهايه  اهه نفد بجلده 

خرج يجرى بسرعه من المحل 

حصله الفار التانى 
وقاله : ايه انت مش  هتيبجى معايا تانى ولا ايه ؟؟؟

لكن الفار اللى فرح بانه مماتش من ضربة الساطور 

وحزن على ديله اللى فقده و كان هيموت من الرعب اللى شافه 

رد عليه وقاله :  لا يا عم الحس مسنى وابات مهنى ولا كبابك اللى قتلنى 

فصارت الجمله مضرب المثل على ان الرضا بالمقسوم عباده يا غوايش

كمان مش معنى ان غيرى يبدو ان ظروفه احسن انه فعلا يكون عايش احسن ممكن التوتر اللى بيعيشه علشان يكسب قوته اصعب من حياتى الهاديه المسالمه الى رزقها قليل 

علشان كده بقى مثل بيقولوه بتوع زمان 

الحس مسنى وابات مهنى ولا كبابك اللى قتلنى

#حكايات_امى_الله_يرحمها
#حكايه_ورا_كل_مثل
#ابتسام

تعليقات

إرسال تعليق

المشاركات الشائعة من هذه المدونة

#ليه_طيب_اكسر_وراه_قله؟ج٢#الليله٦٠٨

صورة
#ليه_طيب_اكسر_وراه_قله؟ج٢ #الليله٦٠٨ اما بقى الحدوته التانيه فبتقولك ان زمان وبردو ايام الفراعنه كانت لما الانسان يموت بيكسروا وراه اناء من الفخار  يعنى هنا كانت عاده مرتبطه بالجنائز  وطبعا كلنا عارفين اهمية الموت و الحياه الابديه والكلام دا كله عند المصريين القدماء واظن انى لسه مخلصه سلسلة ايزيس وازوريس اللى بتحكى باستفاضه ف اهمية الدفن والليله دى  طب بردو ليه نكسر وراه حاجه فخار واللى رسيت ع القله لاننا بقينا نستخدم معادن وصينى واوانى تانيه حاليا  انما القله فهى اللى كانت مكمله حتى دخول التلاجه الايديال ال ٨ قدم لكل بيت نرجع لكسر القله الفكره انهم مش بس بيكسروا القله لاء وكمان بياخدوها ويدفنوها جنب قبر المرحوم طيب الله ثراه ... ودا ليه؟ علشان لما ترجع الكا يعنى (الروح) على بيته مره تانيه مره ماتأذيش اهل البيت اللى موجودين فيه دول كانوا بيعملوا الاكل ف البيت وياخدوه عند مكان المقبره وياهم وهناك ياكلوا وبعدين يكسروا الاوانى دى ويسيبوا الفخار الكسر هناك  واللى كانوا بيسموه الشِقف جمع شقفه لدرجة ان المتخصصين فى الآثار وهم بينقبوا لو لقوا ف مكان ما آنيه  فخاري...
قراءة المزيد

#هو_صحيح_الجوع_كافر_بس_مش_للدرجه_دى؟؟؟ج٢#الليله٦٥٠

صورة
#هو_صحيح_الجوع_كافر_بس_مش_للدرجه_دى؟؟؟ج٢ #الليله٦٥٠  زى ما قولنا كان الموسم الزراعي في شمال العراق اواخر عام ١٩١٧ سئ جداً ومطر قليل ومحصول ضعيف و بيقول محمد امين العمري  واللى كان ف الوقت ده ضابط اعاشة في الجيش السادس التركي ويعتبر شاهد عيان ع الفتره دى بيحكى ويقول : انه كتب تقرير للقائد خليل باشا وضح فيه الخطر اللي هيحصل في ولاية الموصل بسبب قلة الحبوب و انهم ضرورى يستعدوا ويجيبوا مؤن من اسطنبول و يلحقوا الدنيا قبل فوات الاوان   لكن خليل باشا كبر دماغه و مهتمش للتحذير ده وقال له  ان ولاية الموصل هي مستودع تموين العراق و هي مش  محتاجة تموين يجي لها من بره يا حبيبى احنا ناخد ومنديش بس زى ما توقع محمد امين العامرى بدأت المجاعه حصل ايه ف المجاعه ؟ هل تداركت الحكومه الغير واعيه سوء الحال ؟ ولا ايه اللى حصل؟ ازاى اتعامل اهل الموصل مع المجاعه؟ اقولكم اولا زى ما توقع ضابط الاعاشه بدأت المجاعة تستفحل وشملت الموصل والمنطقة الواسعة اللى ف الشمال منها لحد بحيرة ((وان)) وبدأت جموع من الجياع تهجر ديارها في الاناضول وتتوجه ناحية الموصل  ما الكل بقى فاكرها مليانه خير...
قراءة المزيد

#زئرده #الليله١٠١

صورة
#زئرده #الليله١٠١ الحدوته المرادى حقيقيه زى حكايه #الشنطه_المعجزه  اللى ده الرابط بتاعها https://www.facebook.com/102264164820545/posts/142331610813800/ بردو جيران ماما زمان ف الحى العريق والشارع الجميل (( ابن الرشيد )) اللى لا اتولدت فيه ولا عشت فيه بس حبيته من حب امى فيه ومن حكاياتها عنه  (( زئرده ))  دى واحده جارتهم وباين من اسمها -اللى طبعا مش اسمها الحقيقى - ولكن الناس كانوا مسمينها كده لانها كانت صغننه الحجم  تقريبا كان اسمها نوال بس اللى كانت الدنيا كلها بتناديها بيه كان زيئرده كانت متجوزه بس معهاش اولاد وجوزها كان بيشتغل ف بلد تانيه وبييجى يشوفها كل فتره  وعلشان كده كانت عايشه ف شقه ف بيت اهلها بس بتبات لوحدها ف شقتها كان الناس كلها عارفين انهم مرتاحين ماديا  وف ليله صيفيه حاره حين لم يكن يوجد لا تكييف ولا حتى مروحه فى هذا الزمان القديم  و حيث لا يوجد حل سوى ان تنهى ليلتك بدش بارد لتذهب للنوم متأخراً على ١١ونص ١٢ بالليل كده  بعد ساعه ولا ٢ اما المدينه كلها تغرق فى سبات عميق مفيش صاحى  كانت كالعاده بايته لوحدها وحست بحركه معاها ف اوضة ...
قراءة المزيد