#جمعة_الغضب_٢٨يناير٢٠١١(٤) #الليله٢٥٢

#جمعة_الغضب_٢٨يناير٢٠١١(٤)

 #الليله٢٥٢

طبعا انا كعضو مؤسس لحزب الكنبه وبدون ما ادفع اشتراك كمان 

متابعين على التليفزيون .

ولانى طول عمرى بشغل دماغى مكانش اى حد اتابعه و عارفه ان فى كتير ميتشافوش لفجاجة نفاقهم وكدبهم 

كنت بشوف تقريبا منى الشاذلى بس 

وافتكر ان منى الشاذلى ف العاشره مساًء  

( اه ... العاشره مسأء كان بتاع منى الشاذلى من اول ما طلع )

فاكراها وهى بتتكلم مع الناس اللى بيتصلوا 

بتحاول تنقل للجيش لو فى مكان فيه خطر وكل الناس بتصل خايفه وقلقانه من حاجه واحده بس البلطجيه 

وجملتها المحترمه جدا محدش يقول سمعت اللى بيحصله حاجه او شاف بعينه بس يحكى 

فى حين ان قنوات ومذيعين كتير عمالين يزودوا البلبله والقلق

واتصلت بيها زميلتها المذيعه ايتن نجاح الموجى بتقولها ان البلطجيه حوالينا والحقونا خلوا الجيش ييجى 

وهى سألتها شوفتى بعينك 

تقولها لاء بس الناس منهاره وبيقولوا انهم على بوابات الكومباوند اللى ساكنه فيه

تقولها اسفه يا ايتن بس مادام مش شايفه  بعينك منقدرش نعتبرها شهاده 

وقالتلها فيما معناه اهدى وقفلى بابك كويس 

واتصل الممثل تامر عبد المنعم بتاع فيلم المشخصاتى برضوا ثائر ومنفعل  جدا و بيشتكى لمنى الشاذلى  البلد بتخرب وبتضيع 

وانه خايف على مراته وبناته ولازم يلحقوهم فورا طبعا بردو قصده الجيش 

لان الكومباوند اللى هو ساكن فيه ماشى فيه تكاتك كان مستفذ 

وبيذكر اسم الكومباوند -- اللى ناسياه انا دلوقتى -- وبيقولها ازاى ان كومباوند كذا ارقى كومباوند فى مصر ماشيه فيه تكاتك 

جدير بالذكر ان مراته هى المذيعه اللى كنت بحبها اوى زمان اسمها حنان الديب 

و اللى ابوها بقى من اشهر رجال مصر فيما بعد وهو معروف بردو ايامها 

فريد الديب اه المحامى بتاااع  .....

نرجع عندنا من قسم التليفون على حزب الكنبه واحنا الزمايل بنتصل نتطمن على بعض من كنبه للتانيه من خلال التليفون 

وتحكى ليا زميلتى ان فى فعلا بلطجيه بيهاجموا عندهم 

زميلتى ف نفس الحى  بس بعيده عنى حبه مش كتير 

يعنى افهمى يا ابتسام بقى الخطر قادم 

وحكتلى ان الرجاله بتوعهم مسكتوش وجابوا ازايز بيبسى وملوها كحول ( اصلى مش من المغشوش بتاع الايام دى ) 

وقطعوا قماش وحشروه ف فم الزجاجه ومجهزينه وواقفين فوق سطوح البيت فيما يعرف ( بالملوتوف ) 

استعدادا لهجوم البلطجيه لما ييجوا 

وان رجالة بيتهم والبيتين التلاته المجاورين نزلوا فعلا لما لقوا فى صوت بلطجيه ف الشارع اللى وراهم 

ولما اتقابلنا فيما بعد فض المولد والرجوع لاعمالنا وبستزيدها من تفاصيل اللى حصل ايامها 

قالتلى وهى بتضحك 

انهم كانوا سكان الشارع اللى وراهم مش بلطجيه 

طب يا بنتى والناس اللى كانوا بيجروا 

قالتلى دول كانوا اللى ساكنين ورانا بردوا 

وطلع ايه 

ان كل شويه دول يسمّعوا ويعلوا  بصوتهم علشان لو فى بلطجيه يخافوا والناس التانيين يسمعوهم فيفتكروهم هم البلطجيه فينزلوا يجروا

فاللى بيزعقوا يقولوا اهم بلطجيه بجد 

واتاريه كل شارع فاكر جيرانه ف الشارع اللى وراه هم الناس التانيين 

وان لما النهار طلع عرفوا ان الشارعين كانوا طول الليل بيحاربوا بعض على انهم العدو المجهول ( البلطجيه )😅😅😅

تانى الخوف الجمعى والرعب من المجهول🙃

ولان شر البليه ما يضحك نضحك واحنا بنفتكر الايام دى خصوصا ان الحمد لله مفيش حد مات ولا اتصاب واللى كان بيرمى الملوتوف كان خايب ف النيشان 

او هو قاصد يخوفهم بس الله اعلم

ودى بعض الحكايات اللى حصلت فى  الفتره دى سواء شفتها رؤى العين او اتحكتلى من شاهد عيان ثقه 

كل اللى بحكيه دا كان ف اليومين الاولانيين الاكثر رعبا واظلاما ف معرفة حقيقه اللى بيحصل 

وزى ما حكيت الرعب والضلمه والبرد  كان لافف مصر او القاهره تحديدا 

احياءها الراقيه وكومباونداتها ... واحياءها الشعبيه وحاراتها 

بس فى مكان تانى كان مليان بالدفا ف عز تلج يناير ده 

وهو الميدان 

نكمل بكره 

واه يا الميدان كنت فين من زمان

ودى شهاده جت ف كومنت على البوست اللى فات من صاحبتى سوزان محمود 

نسمعها 

 اللي انا فاكراه من جمعة الغضب حالة الرعب اللي كنا عايشين فيها ودماغي تودي وتجيب ازاي هروح الامتحان بتاع يوم الاحد ومش عارفة اذاكر ولا عارفة اعمل حاجة 

وفعلا ناس من شارعنا دخلوا قسم ثان والراجل الله يرحمه بقا كان جايب مكتب المأمور والثلاجة ولبس مجند وكلابشات ولما رجع لبس ابنه لبس المجند والناس كلها قعدت تضحك 

بعد كام يوم كده تقريبا بعد التنحي شباب الحتة المحترمين كلموا الراجل ده واخدوا الحاجة رجعوها القسم 

وفعلا موضوع الحراميين ده طلع فنكوش واتظلم بسببه ناس كتير 

مرة كان جاي شابين بعربية ملاكي من شارع شبرا وكان ياعيني كل كام متر يلاقوا لجنة شعبية توقفهم وتفتشهم تقريبا لما قربوا على منطقتهم زهقوا ومبقوش يقفوا للجان فاللجنة عند كوبري عرابي أدت إشارة لللجنة اللي عند شارعنا😅 أن في عربية عدت منهم فاللجنة بقا وقفت العربية بالعافية وكسروها وكسروا الشباب... لما نزلت اجيب عيش تاني يوم لاقيت العربية مركونة ومتدغدغة 

مرة تانية كان شباب اللجنة اللي عند شارع الجامع سمعوا أن عندنا حاجة فجم جري يشوفوا في ايه وكان معاهم الأسلحة بتاعتهم اللي واقفين يحرسوا بيها شوم ومواسير وجنازير وكده فاللجنة اللي عندنا شافوهم جايين جري ومعاهم أسلحة 😅 قاموا مسكوهم عدموهم العافية هما وأسلحتهم 💪 وطلعوا يا قلبي شباب زيهم مش حراميين ولا حاجة😓😓

#شاهد_على_الايام(٤)

#ابتسام