#الجمعه_٢٨_يناير_٢٠١١(١) #الليله٢٤٩

#الجمعه_٢٨_يناير_٢٠١١(١)
#الليله٢٤٩
حكيت عنها ف يوم الجمعه لانها ارتبطت عندنا كلنا بجمعة الغضب 

بالنسبه ليا ثورة يناير كانت يوم ٢٨

مش ٢٥ 

يوم ما مصر قامت كلها

يوم ما اعلن حظر التجول

يوم ما اتقطعت شبكات الاتصالات 

واذا اتكلمنا عن ٢٥ يناير انها كانت بداية الثوره 

فانا احب اسميها ارهاصات او مخاض للثوره ابتدى من يوم ٦ ابريل ٢٠٠٨ 

واستمرت مع حركة كفايه وحركه ٦ ابريل اللى خدت التاريخ اسم لها 

#٢٨_يناير 
اليوم ده كان جمعه 

وكنت متعوده وزوجى نتسوق من عروض المحلات الكبرى لنستفيد بفروق اسعار لما كانت عروضهم فيها فرق اسعار 

رحنا سبينس اللى ف ستى استارز مدينه نصر 

واحنا خارجين كانت الساعه ٢ ظهرا و كانت بعض الكافيهات مشغله قناة الجزيره وساعتها اتفرجنا حبه واحنا ماشيين على الناس اللى بيجروا والزحمه 
والميدان  

ولكن ابن حلال تطوع انه يقول انا جاى من وسط البلد دلوقتى ومفيش حاجه من دى 

وان دى فيديوهات  قديمه متسجله  مش بث مباشر  النهارده زى ما الجزيره كاتبين 

وبالتالى صدقنا وعليه كملنا شوبنج ورحنا  لكارفور المعادى 

كميات كبيره من اللحمه البلدى المعتبره معانا من جزارة سبنس  ام  ٤٣ جنيه من حلاوتها خدنا لنا ولحبايبنا كمان واخدين بالكم من السعر للحمه البلدى 

وكملنا من كارفور رز وبرتقال وبطاطس سبونده وغيرهم 

الجلاله خدتنى كالعاده و مسيبتش ركن فيك يا كارفور الا وغطيته 

وعند الكاشير

كانت الساعه ½ 4 بعد العصر لما لقينا ناس بتقول 

الحقوا روحوا بسرعه فى حظر تجول هيبدا الساعه ٥

سمعنا الكلام ومصدقناش

بس كان فعلا ... الشوارع كلها ناس بتجرى  

معانا خزين الشهر و ثروه غذائيه تبلغ ضعف تمنها نتيجه لشطارتى ف اختيار العروض 

بس كل ده كان هيضيع وهنضيع معاه لما وصلت العربيه عند الحته بتاعة منشية ناصر  واحنا عندها جايين من المعادى لشبرا 

لكن ... 

طلعوا شباب بيساعدوا ان المرور يسلك والناس تروح بيوتها

و كنا مرعوبين على اولادنا اللى كانوا ف ابتدائى ساعتها واللى كنا سايبينهم لوحدهم ف البيت ومش عارفين ايه اللى بيحصل لهم او ف الدنيا عامة 

ولما طلبت اخويا اسأله انت فين 

كان رده انا ف التحرير 

ايه ؟ وبتعمل ايه ؟

حكالى انه هناك من بعد ما الشباب عدوا الكوبرى 

ووصلوا للتحرير 

طبعا صوتوا رايح 

وكانت بداية لفتره من حياتنا ... كلنا اتغيرنا بعدها 

عاوزه كلنا نكتب لنفسنا وللى معانا 
وللى هييجوا بعدنا احداث الايام دى نكون شاهد على العصر ... اللى شاف حاجه يحكيها 

التاريخ اتكتب ف الايام دى 

بس لما اتسجل قرات فيه حاجات غير اللى عرفنها واللى عشناها 

انا مكنتش ف التحرير يومها 

بس هحكى اللى عيشته و اللى اتحكالى من اخويا ساعتها 

اتمنى كل حد مننا يقول ويسجل شهادته على الايام دى للزمن ولولادنا 

بكره باذن الله هاحكى اخويا قالى ايه 
وازاى شفت التحرير من خلال  عنيه زى ما عودنى  طول عمرنا انه بيحكيلى كل حاجه كانى  شفتها  

#شاهد_على_الايام
#ابتسام

تعليقات

إرسال تعليق

المشاركات الشائعة من هذه المدونة

#ليه_طيب_اكسر_وراه_قله؟ج٢#الليله٦٠٨

صورة
#ليه_طيب_اكسر_وراه_قله؟ج٢ #الليله٦٠٨ اما بقى الحدوته التانيه فبتقولك ان زمان وبردو ايام الفراعنه كانت لما الانسان يموت بيكسروا وراه اناء من الفخار  يعنى هنا كانت عاده مرتبطه بالجنائز  وطبعا كلنا عارفين اهمية الموت و الحياه الابديه والكلام دا كله عند المصريين القدماء واظن انى لسه مخلصه سلسلة ايزيس وازوريس اللى بتحكى باستفاضه ف اهمية الدفن والليله دى  طب بردو ليه نكسر وراه حاجه فخار واللى رسيت ع القله لاننا بقينا نستخدم معادن وصينى واوانى تانيه حاليا  انما القله فهى اللى كانت مكمله حتى دخول التلاجه الايديال ال ٨ قدم لكل بيت نرجع لكسر القله الفكره انهم مش بس بيكسروا القله لاء وكمان بياخدوها ويدفنوها جنب قبر المرحوم طيب الله ثراه ... ودا ليه؟ علشان لما ترجع الكا يعنى (الروح) على بيته مره تانيه مره ماتأذيش اهل البيت اللى موجودين فيه دول كانوا بيعملوا الاكل ف البيت وياخدوه عند مكان المقبره وياهم وهناك ياكلوا وبعدين يكسروا الاوانى دى ويسيبوا الفخار الكسر هناك  واللى كانوا بيسموه الشِقف جمع شقفه لدرجة ان المتخصصين فى الآثار وهم بينقبوا لو لقوا ف مكان ما آنيه  فخاري...
قراءة المزيد

#هو_صحيح_الجوع_كافر_بس_مش_للدرجه_دى؟؟؟ج٢#الليله٦٥٠

صورة
#هو_صحيح_الجوع_كافر_بس_مش_للدرجه_دى؟؟؟ج٢ #الليله٦٥٠  زى ما قولنا كان الموسم الزراعي في شمال العراق اواخر عام ١٩١٧ سئ جداً ومطر قليل ومحصول ضعيف و بيقول محمد امين العمري  واللى كان ف الوقت ده ضابط اعاشة في الجيش السادس التركي ويعتبر شاهد عيان ع الفتره دى بيحكى ويقول : انه كتب تقرير للقائد خليل باشا وضح فيه الخطر اللي هيحصل في ولاية الموصل بسبب قلة الحبوب و انهم ضرورى يستعدوا ويجيبوا مؤن من اسطنبول و يلحقوا الدنيا قبل فوات الاوان   لكن خليل باشا كبر دماغه و مهتمش للتحذير ده وقال له  ان ولاية الموصل هي مستودع تموين العراق و هي مش  محتاجة تموين يجي لها من بره يا حبيبى احنا ناخد ومنديش بس زى ما توقع محمد امين العامرى بدأت المجاعه حصل ايه ف المجاعه ؟ هل تداركت الحكومه الغير واعيه سوء الحال ؟ ولا ايه اللى حصل؟ ازاى اتعامل اهل الموصل مع المجاعه؟ اقولكم اولا زى ما توقع ضابط الاعاشه بدأت المجاعة تستفحل وشملت الموصل والمنطقة الواسعة اللى ف الشمال منها لحد بحيرة ((وان)) وبدأت جموع من الجياع تهجر ديارها في الاناضول وتتوجه ناحية الموصل  ما الكل بقى فاكرها مليانه خير...
قراءة المزيد

#زئرده #الليله١٠١

صورة
#زئرده #الليله١٠١ الحدوته المرادى حقيقيه زى حكايه #الشنطه_المعجزه  اللى ده الرابط بتاعها https://www.facebook.com/102264164820545/posts/142331610813800/ بردو جيران ماما زمان ف الحى العريق والشارع الجميل (( ابن الرشيد )) اللى لا اتولدت فيه ولا عشت فيه بس حبيته من حب امى فيه ومن حكاياتها عنه  (( زئرده ))  دى واحده جارتهم وباين من اسمها -اللى طبعا مش اسمها الحقيقى - ولكن الناس كانوا مسمينها كده لانها كانت صغننه الحجم  تقريبا كان اسمها نوال بس اللى كانت الدنيا كلها بتناديها بيه كان زيئرده كانت متجوزه بس معهاش اولاد وجوزها كان بيشتغل ف بلد تانيه وبييجى يشوفها كل فتره  وعلشان كده كانت عايشه ف شقه ف بيت اهلها بس بتبات لوحدها ف شقتها كان الناس كلها عارفين انهم مرتاحين ماديا  وف ليله صيفيه حاره حين لم يكن يوجد لا تكييف ولا حتى مروحه فى هذا الزمان القديم  و حيث لا يوجد حل سوى ان تنهى ليلتك بدش بارد لتذهب للنوم متأخراً على ١١ونص ١٢ بالليل كده  بعد ساعه ولا ٢ اما المدينه كلها تغرق فى سبات عميق مفيش صاحى  كانت كالعاده بايته لوحدها وحست بحركه معاها ف اوضة ...
قراءة المزيد