#هو_انت_ازاى_اتعلمت_اللغه؟؟ #الليله٢٦٨

#هو_انت_ازاى_اتعلمت_اللغه؟؟

#الليله٢٦٨

واتعلمت اللغه دى الكلمه اللى قالها يحى الفخرانى لمحمود عبد العزيز ف فيلم الكيف علشان يوضح انه فهم الانحطاط اللى وصلت له لغتنا العربيه على ايد مزجانجى وفننس والاخوه الافاضل 

بس لما ناخد الموضوع جد هنلاقى ان تعلم اللغه دي دنيا لوحدها وحاجه مش سهله  خالص بس احنا اللى اخدناها بالمعلقه من الاسره والمجتمع فلاقيناها سهله 

ف مثلا ف الموضوع ده 

#اتوكس

https://www.facebook.com/100022862494719/posts/910615979710477/

اتكلمنا عن اللغه الفرعونيه و ليه تاركه اثرها فينا و ف الفاظنا حتى الان ... وليه لسه بنستخدمها كتير ف مناحى حياتنا 

وساعتها طرحت ف نهاية الموضوع مجموعه من الاسئله 

تعالوا نجاوبهم واحد واحد 

 هى اللغه الهيروغليفيه راحت فين ؟؟؟ 

وليه انقرضت؟؟؟

و هو يعنى ايه اهمية حجر رشيد؟؟

وايه اهمية اللى عمله شامبليون ؟؟

طب ازاى ماتت الهيروغليفيه ؟؟

وهو معقوله اللغات بتعيش وتموتك ؟؟

طب عرفت منين الكلام اللى بالقبطيه ؟؟ 

وهى القبطيه كانت مصريه قديمه ؟؟

طب ليه استمرت القبطيه  واختفت الهيروغليفيه ؟؟؟

تعالوا ناخدها واحده واحده

اولا الهيروغليفيه : 

هى اللغه المصريه القديمه 

بعض النصوص اللى وجدوها ترجع لاكتر من ٣٢٠٠ ق. م. يعنى اكتر من ٥٢٠٠ سنه من الان 

وكانت بتستخدم اشكال ورموز لطيور وحيوانات من البيئه زى ما احنا عارفين علشان يرمزوا بها للحروف الصوتيه المنطوقه 

وهنا ترجع عبقريه المصرى القديم

انه اخترع اشكال علشان يعبر عن حروف كلماته المنطوقه 

ودى كانت اول مره شعب من شعوب العالم يعملها 

علشان كده بنقول اختراع الكتابه  لان محدش عمل كده قبل كده 

ويمكن مره تانيه نتكلم عن اهميه اختراع الكتابه اساساً

طبعا الكتابه كلنا شفناها على الاهرامات واعمدة المعابد 

رسوم كامله ورموز كبيره علشان كده اختصارا للكتابه لما الكهنه بيكتبوا نصوص دينيه على البردى 

فالكلام كتير وبالتالى اخترعوا طريقه اسهل 

وسموها هيراطيقيه 

ثانيا الهيراطيقيه : 

يبقى الهيراطيقيه دى اختصار وتسهيل للهيروغليفيه 

ولو مثلنها  الهيروغليفيه باللغه العربيه يبقى الهيروغليفيه زى الخط الثلث او النسخ 

اما الهيراطيقيه زى خط الرقعه 

وزى ما قلنا استخدمه رجال الدين فياخدوا حته من الحرف الهيروغليفى بدل ما يكتبوه كامل 

اما الهيروغليفيه  فدى للنقوش على الاحجار 

ويتقدم الزمن والاختصار بيتم اختصاره 

لتدخل طريقه لاختصار الهيراطيقيه 

فتكون الديموطيقيه

ثالثا الديموطيقيه : 

ودى لغه المعاملات الحسابيه وبين التجار والقانونيه والرسائل 

والكلمه جايه من كلمه يونانيه بمعنى شعبيه 

يعنى ممكن تعتبر انها حاجه زى  الفرانكو بتاع دلوقتى او الاختزال لو حد عارفه

وبالتالى بقى اختصار للاختصار 

ويمر الزمن ولو تاخد بالك الهيراطيقيه من كلمه يونانيه 

يعنى فى شعوب تانيه دخلت ف الصوره 

وثقافات تانيه بلغاتها بدأت تدخل مصر 

وتأثر على الكتابه فيها والزمن اتقدم وبقينا قبل الميلاد ب ٨٠٠ ق. م. سنه 

وانتوا عارفين بقى التقدم والتسرع و الاستعجال اللى  دايما بيتصف بيها جيل شباب الايام دى من ٢٨٢١ سنه 

والعيال الطاقه لا ليهم تقطان على الهيروغليفيه ولا الديموطيقيه انما الديموطيقيه سريعه تناسب العصر السريع اللى عايشينه على اخر الزمن ٨٠٠ ق م 

وبالتالى حبه بحبه بدات الهيروغليفيه تتحفظ مع ناس قليله من اللى ممكن يحتاجوها زى كتبة المعابد والناقشين على المعابد والتماثيل 

انما عامة الشعب او حتى الكتبه ف المعاملات التجاريه او ... رسائل او ...كتابات دينيه حتى كلها بقت خفيفه كده مش متقعره وكلها حل محلها الديموطيقيه اللى اختصروها للهيراطيقيه 

ودلوقتى اليونانيين لما دخلوا مصر بدأت تنتشر لغتهم بين المصريين 

فتم اختراع لغه جديده لنج وهى القبطيه 

رابعاً القبطيه :

واللى  كانت تشكيله من الحروف اليونانيه على الديموطيقيه على ارقام كمان 

ونخلى بالنا من حاجه اللغه شقين :

شق منطوق 

وشق بيعبر عنه كتابه 

واذا كان على الكتابه فهى على مدار الزمن عماله تتطور وتتبسط زى ما قلنا قبل كده 

اما المنطوق فده اللى بيتطور مع الزمن بس بيحافظ على البنيه الاساسيه علشان كده مازلنا محتفظين بكلام قدماء المصريين للان 

وعلشان كده مع مرور مئات السنين بدأ المصريين ينسوا الاصول الكتابيه  للهيرغليفيه وفروعها الا ف المعابد زى ما قلنا 

وبدأت الكتابه باللغه القبطيه دى تنتشر بين المصريين وتحل محل الكتابه الهيروغليفيه واولادها الديموطيقيه والهيراطيقيه 

وبالتالى اصبحت الهيروغليفيه لغه ميته😢 

والبقاء لله و منعزيكوش ف غالى 

عندكم القبطيه شغاله زى الفل 

خلى بالك احنا لسه ق. م. 

يعنى لسه بدرى على ميلاد سيدنا عيسى عليه السلام يعنى اللغه القبطيه مالهاش اى علاقه بالديانه المسيحيه حتى الان 

يبقى كده جاوبنا اول سؤالين : 

اللغه الهيروغليفيه راحت فين ؟؟

وليه انقرضت ؟؟

كمان قلنا انواعها واسباب تدرجها 

ممكن نأجل بقى اجابة  باقى الاسئله لبكره

دا لو كان حد مهتم انه يعرف  يعنى😔

والاسئله هى :

و هو يعنى ايه اهمية حجر رشيد؟؟

وايه اهمية اللى عمله شامبليون ؟؟

طب لما الهيروغليفيه ماتت ايه اللى خلاها صحيت تانى ؟؟

وهو معقوله اللغات بتعيش وتموتك ؟؟

طب عرفت منين الكلام اللى بالقبطيه ؟؟ 

وهى القبطيه كانت مصريه قديمه ؟؟

طب ليه استمرت والهيروغليفيه اختفت ؟؟؟.

 #ابتسام