#هو_انت_ازاى_اتعلمت_اللغه؟؟ #الليله٢٦٩ #الجزء_الثانى
#هو_انت_ازاى_اتعلمت_اللغه؟؟
#الليله٢٦٩
#الجزء_الثانى
اتكلمنا امبارح عن اللغه فى مصر وازاى تطورت من الهيروغليفيه للهيراطيقيه للديموطيقيه
فاكرين الاسئله ؟؟؟
** هو يعنى ايه اهمية حجر رشيد؟؟
حكاية حجر رشيد حكايه غريبه واصلها ابتدت بصدفه
كاغلب الاكتشافات العظيمه
لما كان الفرنسويين ف رشيد ....
لاء استنى
لاء قبلها بحبه 🤔
لما كان المسيحيين الاوائل ....
لاء بردو ... اقدم ... اقدم 🙄
الحكايه ابتدت قبل ميلاد المسيح بييجى ٢٠٠ سنه كده
ايام حكم البطالمه او اليونانيين او الاغريق
التلاته هم نفس الشعب وان اختلفت الاسم يعنى اليونانيين هو الاسم اللى نعرفهم به دلوقتى
اما اسمهم زمان فكان الاغريق
ولان اول حاكم منهم لمصر بعد الاسكندر كان اسمه بطليموس وحكم بعدها ييجى ١٤ واحد اسمه بطليموس فاتسموا كلهم بطالمه حتى اللى مكانش اسمه بطليموس
المهم ف عهد بطليموس الخامس
كان الكهنه فرحانين ان جلالة الملك دفع الضرائب المفروضه عليهم من عنده نيابه عنهم ووزع عليهم هدايا ومزوعات وخرج مساجين من السجن
وزبطهم ع الاخر
ومن فرحتهم كتبوا ده على لوح من الحجر المميز من حجر الجرانوديوريت الاسود
وحاجه اخر فخامه كده وسابوه ف المعبد بتاعهم فى مدينه صان الحجر ف محافظه الشرقيه
علشان اللى رايح واللى جاى ينبهر
طيب بما ان زمان مكانش عندهم يا حرام ترجمة جوجل
فاحتاروا يكتبوه بانهى لغه
فكروا ف انهم هم وباقى الكهنه بيكتبوا بالهيروغليفيه فكتبوا باللغه بتاعة الكهنه والمتعلمين والمثقفين
وبعدين فكروا ف باقى المصريين اللى مش كلهم يعرفوا يقرأوا بالهيروغليفيه ففكروا يكتبوا نفس الكلام بس بالفرانكوا المصرى ف وقتها و اللى هو ايه ؟؟؟
-- الهيراطيقيه ؟؟؟
= ايوه كده صح
لغه عامه الشعب علشان اللى رايح واللى جاى من عامة الشعب يقرا ويستوعظ ويشكر جلاله الملك
وعلشان الشكر موجه للملك اليونانى
ولان البلاد مليانه يونانيين ف اتكتب الثلث الثالث من الحجر بذات نفس الكلام بس بايه بقى ؟؟؟
صح شاطر ... باليونانيه القديمه
وكده يبقى الكهنه عداهم العيب وازح
ويمكن الملك يتبسط منهم ويرفع الضرايب عنهم خالص
بس مش مهم الملك عمل كده ولا لاء
لاننا هنسيهم فرحانين و بسرعه ونركب آلة الزمن
اصل اللى ميعرفهموش الكهنه ان بعد بجى ٢٠٠ سنه اتولد سيدنا عيسى عليه السلام وبعدها بحوالى ١٠٠ سنه كمان كانت ديانته اللى هى المسيحيه انتشرت ف مصر كلها
وكمان كام ١٠٠ سنه ولا حاجه كانت العبادات وكهنتها واليونانيين وملوكهم اختفوا من على ارض مصر
المعابد بقى مكانهم اديره وكنائس
والكهنه مكانهم قساوسه ورهبان
واليونانيين بقى مكانهم رومان
والملوك البطالمه مكانهم قياصره
وبالتالى اتهد المعبد اللى ف صان الحجر
وف العصور الوسطى وايام المسيحيين تحت حكم الرومان اتنقل الحجر اللى لقوه جامد وشديد وينفع يتبنى به
(( على فكره دا كان منتشر من زمان يعنى مش عاوزه ازعلكم بس مثلا معبد ابو سنبل والكرنك فى احجار كتير منهم اتخلعت علشان السكان يبنوا بهم بيوتهم لانها مستويه كده و مثقوله ملساء وبسمسم وسهل بناء البيوت بها😞
دا غير المعبد الصغيره اللى اختفت اصلاً ))
المهم خدوا الحجر اللى لا يميزه ف نظرهم الا انه صلب وكمان سهل الحمل والنقل
بالتالى اتنقل لرشيد علشان يبنوا به قلعة رشيد
وجم الفرنساويين واحتلوا رشيد
واحتلوا مصر كلها
وفى ولد شاب مهندس كده ومثقف وإور اسمه بوشار
مش فشار ... لاء بوشار بيير فرنسوا بوشار
لفت نظره الحجر
وانه لقى عليه كلام باليونانيه القديمه اللى صحيح بقت لغه متروكه بس مش ميته زى اللغه اللى ماليه كل حاجه ف مصر بس محدش فاهمها
( الهيروغليفيه )
وزى ما تقول الجندى دا كان مثقف وله ف اليونانيه القديمه اللى بتدرس ف الجامعات عندهم ف الوقت ده
فقال الحجر ده شكله مفيد
ولان الحمله جايه مصر معاها علماء لدراسه كل حاجه ف مصر
قالوا هاتوا الحجر ده نقرأ الكلام اليونانى اللى عليه يمكن نعرف حاجه عن المصريين القدماء
وبسرعه العلماء عملوا منه كذا نسخه من الجبس ووزعوها على العلماء ف انحاء اوربا
ف الوقت ده اتهزم نابليون واتاخد الحجر للندن ومازال ف متحف لندن حتى الان
المهم شاب صغير فرنساوى اقل من ١٦ سنه اسمه شامبليون
جه كده سنة ١٨٠٦ وقال انه قدر يفسر بعض الرموز لحجر رشيد
وبقت فى منافسه بينه وبين واحد تانى انجليزى اسمه يونج ف ترجمة الرموز الهيروغليفيه
عرف انها عكس ما كتير من العلماء ما كانوا فاكرين انها خاصه بالديانات المصريه القديمه يبقى صعب نترجمها
ومالوش لازمه اساسا نترجمها كلها كلام خاص بديانة قدماء المصريين وفلسفة هذه الديانه
لكن عم شامبليون اكتشف الاسرار بانه يقارن الاقسام الثلاثه ببعض
واكتشف ان الكهنه كانوا بيكتبوا ايم الملك داخل شكل بيضاوى اللى بيتقال عليه دلوقتى خرطوش
فبالملاحظه دى قارن بين النصوص الثلاثه وعرف انه كلام واحد بس بلغات مختلفه و بدأ ياخد الحروف اللى جوه الخرطوش ويبقى دا باليونانى المعلوم هو ... هو اللى بالهيروغليفى
وكده كل ما يتكرر الحرف ده ف اللوحه يبقى هو ده معناه وحبه ... حبه فك بعض الرموز
وبقى يغنى زى محمود عبد العزيز اتعلمت اللغه
ومش بس كده دا اخترع علم مازال يدرس حتى الان اسمه علم المصريات
ومات يا ضنايا وهو عمره يادوب ٤١ سنه
بس اللى بعده كملوا وبقت قرأه الجداريات الفرعونيه ممكن اى حد يقرأها وتلاقى زاهى حواس عمال يتكلم فرعونى لِبلب
وانت تقول يتكلم براحته هو يعنى فى حد هيقوله انت بتقول غلط و مكانش المفروض تعطش الجيم هنا ولا تكسر الباء مش تفتحها
بس خلى بالك اذا كنا احنا ف البلالا فى الهيروغليفيه ففى ناس اجانب بيعرفوا يقرأوها زى البربنط فاكرين فيلم
The mummy باجزائه 😉
وبكده بدأ علماء المصريات يقرأوا اعمال الفراعنه واسامى الملوك وانتصارتهم
ويقروا اللى وصلوله من اكتشافات طبيه .. وفلكيه .. وكميائيه بهرت العالم ومازالت بتبهره كل ما يكتشفوا حاجه جديده
اما بقى الكلام المنقول شفاهه من الام والاب لاولادهم فمازلنا بنقوله
زى ما كانوا بيقولوه من اكتر من ٥٠٠٠ سنه
مش مصدقين بكره اثبت لكم
اتكلمت كتير بس الكلام لسه مخلصش
فاضل حته اكملها بكره ☺
لو عاوزين اكمل يعنى 😊
#ابتسام
تعليقات
إرسال تعليق