#البخيل_والنخيل #من_حواديت_امى #الليله٢٧١

#البخيل_والنخيل
#من_حواديت_امى
#الليله٢٧١

 هقول حدوته صغننه ....

من تراث امى اللى كان لا يفنى ولا يستحدث من العدم ولكن ننتقل من حدوته لاخرى 

وكان عندها مثل لكل موقف الله يرحمها 
كان ياما كان 

ف بلد بعيد ... مش ف المنوفيه خالص

فى واحد بخيل اوى مش بيحب يضايف حد و لو اضطر يضايف فهو  مش هيأكل الضيف
  
وف يوم جاله ضيف من سفر بعيد 

وبالتالى مضطر يغديه والراجل ده صاحبه وياما كرمه قبل كده و كان موجب معاه جامد اما كان بيزوره  وبالتالى الواجب عليه  يرد جمايله  

 يعنى لازم يأكله .. لازم يأكله 

طب يعمل ايه ؟؟؟

الراجل ده كان ساكن ف منطقه حواليه من كل حته نخيل والوقت كان وقت موسم البلح   

الراجل فضل راكن الضيف عنده ف المضيفه لا اكل ولاشرب لما الراجل كان هيفطس من الجوع 

بس عمال يأهل ويرحب ع الناشف من غير حتى ما يبل ريقه بشوية عصير 
ااأآ 
شويه وناداى  على ابنه وقاله خد الضيف وفرجه على النخل🌴 🌴اللى حوالينا 🌴🌴🌴

وساب الضيف يسبق ابنه خطوتين  👣  👣  وناداى على ابنه تانى .. 

وقال لابنه بهمس علشان الضيف ميسمعش اللى هيقوله لابنه

اول ما تلاقيه بيمسح البلحه  هاته وتعالى 

الفكره ان الراجل هيموت من الجوع ...

وطبعا اول ما هيشوف البلح اللى واقع على الارض هاياخده وياكله علطول 

من جوعه مش هياخد باله انه واقع ف الرمل وانه مترب ومش نضيف 

بس اما بقرب يشبع هيلاحظ انه بياكل بلح مليان تراب وبيقرمش رمل ف بقه فهيبدأ يمسح البلحه ساعتها بس هيكون ملا بطنه وبدأ يفوق للى بياكله 
 
وبكده لما الولد يرجع بيه البيت يكون قرب يشبع وماياكلش كتير😂😂

وتوته توته ... فرغت الحدوته ....  حلوه ولا ملتوته

#امايمسح_البلحه_ادعولها_بالرحمه
#ابتسام

تعليقات

إرسال تعليق

المشاركات الشائعة من هذه المدونة

#ليه_طيب_اكسر_وراه_قله؟ج٢#الليله٦٠٨

صورة
#ليه_طيب_اكسر_وراه_قله؟ج٢ #الليله٦٠٨ اما بقى الحدوته التانيه فبتقولك ان زمان وبردو ايام الفراعنه كانت لما الانسان يموت بيكسروا وراه اناء من الفخار  يعنى هنا كانت عاده مرتبطه بالجنائز  وطبعا كلنا عارفين اهمية الموت و الحياه الابديه والكلام دا كله عند المصريين القدماء واظن انى لسه مخلصه سلسلة ايزيس وازوريس اللى بتحكى باستفاضه ف اهمية الدفن والليله دى  طب بردو ليه نكسر وراه حاجه فخار واللى رسيت ع القله لاننا بقينا نستخدم معادن وصينى واوانى تانيه حاليا  انما القله فهى اللى كانت مكمله حتى دخول التلاجه الايديال ال ٨ قدم لكل بيت نرجع لكسر القله الفكره انهم مش بس بيكسروا القله لاء وكمان بياخدوها ويدفنوها جنب قبر المرحوم طيب الله ثراه ... ودا ليه؟ علشان لما ترجع الكا يعنى (الروح) على بيته مره تانيه مره ماتأذيش اهل البيت اللى موجودين فيه دول كانوا بيعملوا الاكل ف البيت وياخدوه عند مكان المقبره وياهم وهناك ياكلوا وبعدين يكسروا الاوانى دى ويسيبوا الفخار الكسر هناك  واللى كانوا بيسموه الشِقف جمع شقفه لدرجة ان المتخصصين فى الآثار وهم بينقبوا لو لقوا ف مكان ما آنيه  فخاري...
قراءة المزيد

#هو_صحيح_الجوع_كافر_بس_مش_للدرجه_دى؟؟؟ج٢#الليله٦٥٠

صورة
#هو_صحيح_الجوع_كافر_بس_مش_للدرجه_دى؟؟؟ج٢ #الليله٦٥٠  زى ما قولنا كان الموسم الزراعي في شمال العراق اواخر عام ١٩١٧ سئ جداً ومطر قليل ومحصول ضعيف و بيقول محمد امين العمري  واللى كان ف الوقت ده ضابط اعاشة في الجيش السادس التركي ويعتبر شاهد عيان ع الفتره دى بيحكى ويقول : انه كتب تقرير للقائد خليل باشا وضح فيه الخطر اللي هيحصل في ولاية الموصل بسبب قلة الحبوب و انهم ضرورى يستعدوا ويجيبوا مؤن من اسطنبول و يلحقوا الدنيا قبل فوات الاوان   لكن خليل باشا كبر دماغه و مهتمش للتحذير ده وقال له  ان ولاية الموصل هي مستودع تموين العراق و هي مش  محتاجة تموين يجي لها من بره يا حبيبى احنا ناخد ومنديش بس زى ما توقع محمد امين العامرى بدأت المجاعه حصل ايه ف المجاعه ؟ هل تداركت الحكومه الغير واعيه سوء الحال ؟ ولا ايه اللى حصل؟ ازاى اتعامل اهل الموصل مع المجاعه؟ اقولكم اولا زى ما توقع ضابط الاعاشه بدأت المجاعة تستفحل وشملت الموصل والمنطقة الواسعة اللى ف الشمال منها لحد بحيرة ((وان)) وبدأت جموع من الجياع تهجر ديارها في الاناضول وتتوجه ناحية الموصل  ما الكل بقى فاكرها مليانه خير...
قراءة المزيد

#زئرده #الليله١٠١

صورة
#زئرده #الليله١٠١ الحدوته المرادى حقيقيه زى حكايه #الشنطه_المعجزه  اللى ده الرابط بتاعها https://www.facebook.com/102264164820545/posts/142331610813800/ بردو جيران ماما زمان ف الحى العريق والشارع الجميل (( ابن الرشيد )) اللى لا اتولدت فيه ولا عشت فيه بس حبيته من حب امى فيه ومن حكاياتها عنه  (( زئرده ))  دى واحده جارتهم وباين من اسمها -اللى طبعا مش اسمها الحقيقى - ولكن الناس كانوا مسمينها كده لانها كانت صغننه الحجم  تقريبا كان اسمها نوال بس اللى كانت الدنيا كلها بتناديها بيه كان زيئرده كانت متجوزه بس معهاش اولاد وجوزها كان بيشتغل ف بلد تانيه وبييجى يشوفها كل فتره  وعلشان كده كانت عايشه ف شقه ف بيت اهلها بس بتبات لوحدها ف شقتها كان الناس كلها عارفين انهم مرتاحين ماديا  وف ليله صيفيه حاره حين لم يكن يوجد لا تكييف ولا حتى مروحه فى هذا الزمان القديم  و حيث لا يوجد حل سوى ان تنهى ليلتك بدش بارد لتذهب للنوم متأخراً على ١١ونص ١٢ بالليل كده  بعد ساعه ولا ٢ اما المدينه كلها تغرق فى سبات عميق مفيش صاحى  كانت كالعاده بايته لوحدها وحست بحركه معاها ف اوضة ...
قراءة المزيد