#لقاط_ابن_لقاط #الليله٢٧٦ #الجزء_التانى

#لقاط_ابن_لقاط
#الليله٢٧٦
#الجزء_التانى 

وقفنا الليله اللى فاتت لما الاميره حبت المهرج واتعلقت بيه وهى متعرفش ان هو جوزها الامير لانها ولا مره شافت وشه الحقيقى اللى دايما مخبيه باصباغ المهرج 

هى خلاص حبته واتعلقت به اوى وبعد ما وصل لانه يبات على باب  مخدعها كان سهل انه يقرب اكتر 

والحب بهدله ... 

وهى لما حبته مفكرتش انها اميره وهو مهرج وهى كانت بتعد نفسها ارمله بعد ما امرت بقتل الامير اللقاط اللى بياكل الرمان من ع البساط 

ولما الحب ولع ف الدره ضعفت و ....

وبعد ما اصبحت حامل خافت من الفضيحه ومن انتقام ابوها الملك منها 

وكانت فكرته انهم لازم يهربوا قبل ما فضيحتها تبان 

هربت معاه قبل ما اهلها يعرفوا ((للى عاوز يحكيها لاطفال او قُصر علشان اهرب من الحته دى وانا بحكى بقول هربت معاه وبعد كده اتجوزوا ف بلد تانيه جنبهم علشان متبقاش قليلة الادب - ههههه زى ما شاديه كانت بتعمل ف كل افلامها زمان - ))

المهم انهم هربوا وخدها ومشى بيها من البلد 

وهم بيباتوا ف الشوارع وع الطريق 
وطبعا وهى بتهرب سابت كل لبسها ومجوهراتها هو رفض انها تاخد اى حاجه ودا شرطه لانه ميقبلش مراته تصرف عليه 

كمان علشان اى جواهر معاهم خطر عليهم لو قابلهم لصوص  

هى فاهمه ان ابوها الملك هيقلب الدنيا عليها بعد ما يكتشف انها هربت مع المهرج  

دا اللى هى فاكراه ... بس الحقيقه ان 

الامير كان دايما بيتواصل مع ابوها الملك ومفهمه انه بيضطر يسافر بلده وبيرجع لمراته ويسافر تانى بسرعه 

ودا ايام اما كان عامل مهرج وبالتالى لما حب يسافر كان سهل يبلغه انه راجع بلده وواخد مراته معاه 

و ابوها ولا دور عليها ولا سأل فيها ... هو مطمن انها مع جوزها 

اللى ميعرفش انها امرت بقتله ،
و طبعاً هى مش هتروح و تقول لابوها انها قتلت جوزها فسكتت 

و لما الملك ابوها مسألهاش عنه ولا جاب سيرته وان كانت مستغربه دا ومش فاهمه ليه  مبيسألهاش عنه 

فكانت بتتجنب تتقابل معاه 

وكانت بتقول بركه يا جامع 

وبعد انتقال من بلد لبلد ومن قريه لقريه وبعد بهدله ومرمطه عمرها ما كانت تتخيلها 

بس هى اللى اختارت 

وزى ما قلنا الحب بهدله 

طبعا هو فهمها طول الطريق انهم لازم يبعدوا اوى عن بلدها علشان جند ابوها ميجيبوهمش ويقتلوهم 

لحد ما ف النهايه وصلوا لبلاده

 ساعتها اما سألته اشمعنى البلد دى ؟؟

قالها علشان هو يعرف فيها شخص ممكن يشوفله شغل فيها

ولما وصلوا البلد سابها خارج السور بتاع المدينه ودخل المدينه بالليل 

ودور على  الخادم بتاعه وخلاه جابله اللبس بتاعه كأمير ودخل على اهله سلم عليهم وطمنهم عليه وخرج بعد ما ساب المساعد بتاعة يجهزله طلباته ... 

ايه هى طلباته ؟؟؟

دا اللى هنعرفه بكره باذن الله

#ابتسام

تعليقات

إرسال تعليق

المشاركات الشائعة من هذه المدونة

#ليه_طيب_اكسر_وراه_قله؟ج٢#الليله٦٠٨

صورة
#ليه_طيب_اكسر_وراه_قله؟ج٢ #الليله٦٠٨ اما بقى الحدوته التانيه فبتقولك ان زمان وبردو ايام الفراعنه كانت لما الانسان يموت بيكسروا وراه اناء من الفخار  يعنى هنا كانت عاده مرتبطه بالجنائز  وطبعا كلنا عارفين اهمية الموت و الحياه الابديه والكلام دا كله عند المصريين القدماء واظن انى لسه مخلصه سلسلة ايزيس وازوريس اللى بتحكى باستفاضه ف اهمية الدفن والليله دى  طب بردو ليه نكسر وراه حاجه فخار واللى رسيت ع القله لاننا بقينا نستخدم معادن وصينى واوانى تانيه حاليا  انما القله فهى اللى كانت مكمله حتى دخول التلاجه الايديال ال ٨ قدم لكل بيت نرجع لكسر القله الفكره انهم مش بس بيكسروا القله لاء وكمان بياخدوها ويدفنوها جنب قبر المرحوم طيب الله ثراه ... ودا ليه؟ علشان لما ترجع الكا يعنى (الروح) على بيته مره تانيه مره ماتأذيش اهل البيت اللى موجودين فيه دول كانوا بيعملوا الاكل ف البيت وياخدوه عند مكان المقبره وياهم وهناك ياكلوا وبعدين يكسروا الاوانى دى ويسيبوا الفخار الكسر هناك  واللى كانوا بيسموه الشِقف جمع شقفه لدرجة ان المتخصصين فى الآثار وهم بينقبوا لو لقوا ف مكان ما آنيه  فخاري...
قراءة المزيد

#هو_صحيح_الجوع_كافر_بس_مش_للدرجه_دى؟؟؟ج٢#الليله٦٥٠

صورة
#هو_صحيح_الجوع_كافر_بس_مش_للدرجه_دى؟؟؟ج٢ #الليله٦٥٠  زى ما قولنا كان الموسم الزراعي في شمال العراق اواخر عام ١٩١٧ سئ جداً ومطر قليل ومحصول ضعيف و بيقول محمد امين العمري  واللى كان ف الوقت ده ضابط اعاشة في الجيش السادس التركي ويعتبر شاهد عيان ع الفتره دى بيحكى ويقول : انه كتب تقرير للقائد خليل باشا وضح فيه الخطر اللي هيحصل في ولاية الموصل بسبب قلة الحبوب و انهم ضرورى يستعدوا ويجيبوا مؤن من اسطنبول و يلحقوا الدنيا قبل فوات الاوان   لكن خليل باشا كبر دماغه و مهتمش للتحذير ده وقال له  ان ولاية الموصل هي مستودع تموين العراق و هي مش  محتاجة تموين يجي لها من بره يا حبيبى احنا ناخد ومنديش بس زى ما توقع محمد امين العامرى بدأت المجاعه حصل ايه ف المجاعه ؟ هل تداركت الحكومه الغير واعيه سوء الحال ؟ ولا ايه اللى حصل؟ ازاى اتعامل اهل الموصل مع المجاعه؟ اقولكم اولا زى ما توقع ضابط الاعاشه بدأت المجاعة تستفحل وشملت الموصل والمنطقة الواسعة اللى ف الشمال منها لحد بحيرة ((وان)) وبدأت جموع من الجياع تهجر ديارها في الاناضول وتتوجه ناحية الموصل  ما الكل بقى فاكرها مليانه خير...
قراءة المزيد

#زئرده #الليله١٠١

صورة
#زئرده #الليله١٠١ الحدوته المرادى حقيقيه زى حكايه #الشنطه_المعجزه  اللى ده الرابط بتاعها https://www.facebook.com/102264164820545/posts/142331610813800/ بردو جيران ماما زمان ف الحى العريق والشارع الجميل (( ابن الرشيد )) اللى لا اتولدت فيه ولا عشت فيه بس حبيته من حب امى فيه ومن حكاياتها عنه  (( زئرده ))  دى واحده جارتهم وباين من اسمها -اللى طبعا مش اسمها الحقيقى - ولكن الناس كانوا مسمينها كده لانها كانت صغننه الحجم  تقريبا كان اسمها نوال بس اللى كانت الدنيا كلها بتناديها بيه كان زيئرده كانت متجوزه بس معهاش اولاد وجوزها كان بيشتغل ف بلد تانيه وبييجى يشوفها كل فتره  وعلشان كده كانت عايشه ف شقه ف بيت اهلها بس بتبات لوحدها ف شقتها كان الناس كلها عارفين انهم مرتاحين ماديا  وف ليله صيفيه حاره حين لم يكن يوجد لا تكييف ولا حتى مروحه فى هذا الزمان القديم  و حيث لا يوجد حل سوى ان تنهى ليلتك بدش بارد لتذهب للنوم متأخراً على ١١ونص ١٢ بالليل كده  بعد ساعه ولا ٢ اما المدينه كلها تغرق فى سبات عميق مفيش صاحى  كانت كالعاده بايته لوحدها وحست بحركه معاها ف اوضة ...
قراءة المزيد