#لقاط_بن_لقاط #الليله٢٧٨ #الجزء_الرابع

#لقاط_بن_لقاط
#الليله٢٧٨
#الجزء_الرابع

زى ما قلنا الليله اللى فاتت ان الاميره اللى بقت زوجة مهرج القصر كان كل املها لما ييجى الليل 

و يفتحوا ابواب القصر لعامة الشعب يدخلوا يشوفوا الاميره  العروسه اللى هتطل عليهم من شرفتها 

وساعتها بقى ممكن تخرج من عشتها وتختلط وسط الناس و تتفرج ع الفرح معاهم  

 لما جه يوم الفرح 

كان القصر من الصبح مقلوب وكله بيجرى يجهز ويخلص والاميره قاعده ف عشتها مستنيه اللى هتتفرج عليه بالليل 

لكن ف نص اليوم جالها الامير ( المهرج ) وقالها تعالى افرجك على حاجه 

سألته مش انت مشغول معاهم ف تجهيزات الفرح بالليل

قالها لاء ابدا هناك الشغالين كتير وكل واحد عارف شغله ومش محتاجين مساعدتى 

ومحدش فاضى يخلى المهرج يضحكه دلوقتى 

خرجت معاه ولقته دخل على النفق السرى بتاعه

استغربت وهى خايفه يتقفشوا وهو يطمنها ان اللى ف القصر كلهم مشغولين ومحدش هيقرب من اى مكان هيروحوه وان النفق ده ميعرفوش الا الملك والامير  

وهو بعد ثقتهم الكبيره فيه 

وهم  اكيد مش هيقربوا ناحية النفق  النهارده

وخرج من النفق على الاوضه اللى جنب اوضته 

طبعا هو من اول ما خرجت من النفق وهى منبهره بجمال القصر 

هى  اه ... كانت دخلت القصر قبل كده بس دا ف اماكن شغل التفصيل ودا بعيد عن اجنحه المخادع  الملكيه

وبالتالى لما خدها على الجناح اللى هيكون فيه زفاف ولى العهد  ودخل بيها المخدع  وقالها مش انتى كنتى بتحكيلى على لبس الاميره العروسه

اديكى جيتى وتشوفي فساتينها كلهكم متجمعين ف دواليبها 

 وفعلا قعدت تقلب ف الفساتين بإنبهار 

وبعد كده دخلت على اماكن الزينه والمجوهرات 

وقالها دى هدايا الامير لعروسته 

هى كانت خايفه حد يطب عليهم وهو يطمنها ان محدش هيقرب من الجناح ده خالص 

الا لما يخلص الفرح بالليل وييجى العريس والعروسه 

وعلشان يطمنها اكتر 

قفل الباب عليهم بالمفتاح

علشان كده اتطمنت حبه وبدأت تستمتع بالجوله داخل مخدع العروسه باطمئنان 

بعد ما خلصت جولتها ف غرفة النوم وكل محتوياتها 

خصوصا لما مسكت المخده بين صوابعها وضغطت عليها وهى بتبصله وتضحك 

بصلها وهو فاهم بصتها

قالها وهو بيضحك ... اه  ايه مالها ما هى طرية زى اللى ف عشتنا 

ساعتها ضحكت وهزت راسها قالتله بالظبط

قرب منها .. وبص ف عنيها 

و قالها طبعا ندمانه انك مش عايشه العيشه دى 

وانك سيبتى سكن القصور وبقيتى من سكان العشش 

قالتله : ولا يفرق معايا اكون فين المهم انى اكون سعيده وراضيه 

يمكن زمان كنت مستحيل اقبل اعيش ف اقل من قصر ابويا 

قالها : يعنى مش بتحسدى العروسه ونفسك تكونى مكانها 

قالتله ابداً بالعكس 

المهم متكونش تافهه وتضيع كل ده بغرورها زى واحده اعرفها زمان 

عارف كل ما افتكر زمان انا كنت ايه ازعل من نفسى وادعى ربنا يسامحنى على غرورى 

قالها : زى ايه ؟؟؟

قوليلى اكتر حاجه ندمانه عليها

قالتله : مثلاً مره زمان من غرورى امرت بقتل امير علشان اكل رمانه من ع البساط مع ان البساط كان نضيف وهو كان باين عليه طيب وبيحاول يفهمنى انه اخد عليا وبيصرف عادى بدون تكلف 

بس انا بغبائى حمرت عنيا وامرت السياف يطير رقبته 

رفع الامير حواجبه كأنه مندهش من حكايتها

اما هى فكملت ...

صعبان عليا شبابه و ندمانه ...  وياما الاسابيع اللى فاتت بكيت وانا لوحدى ف العشه لما كنت بتبقى انت  ف القصر  على حالى زمان وع الغرور اللى كنت فيه والناس اللى ضريتهم بسببى 

و اتعلمت من الكام يوم اللى اختلط فيهم باهل البلد لما كنا بنجهز لبس العروسه 

ازاى ان مش لازم ابقى اميره علشان اكون سعيده وان حياتهم  البسيطه كانت جميله وعايشينها برضا وسعاده 

بندم على عمرى اللى ضاع قبل كده ف غرور وتكبرى 

وبستغفر ربنا ليل و نهار انه يسامحنى ويغفرلى 

سابها تنزل دمعه كانت محبوسه ف عينها 

وبعدها حضنها وطبطب عليها 

قالها ربنا بيغفر مادامت التوبه حقيقيه 

بعد كده مسح دمعة عينها  و ابتسم 

وخدها من ايدها على باب مقفول 

وفتحه لقته ... حمام 

طبعا مش هوصف فيه كتير 

بس اللى ممكن نقوله انه كان ولا الاحلام كل حاجه فيه من البلور والكريستال 

مليان بالعطور وادوات الزينه 

واخدها من ايدها وراح على البانيو وقالها هسيبك براحتك تغسلى همومك ف الميه الدافيه دى 

ضحكت وقالتله همومى بس 

دا شوية الميه اللى كنت بتجيبهوملى ف العشه علشان استحمى كل كام يوم مكانوش بيعملوا حاجه خالص

ضحك وقالها عندك مية دافيه زى ما انتى عاوزه 

وعندك كل انواع الصابون والزيوت والعطور 

وتخافيش قبل ما تقولى خايفه حد ييجى انا هاخرج بره الحمام واقفل الباب عليكى ومحدش هيقرب من الحمام  و الاوضه خالص وانا اللى هاحرسك بنفسى من بره 

اطمنى وخدى راحتك 

وفعلاً خلصت الاميره حمامها وخرجت اتعطرت و مشطت شعرها و  ندهت عليه من جوه 

قالها اخرجى بصلها وهو معجب بجمالها اللى اظهره الحمام واللى زاده جمالها الداخلى اللى نورها زياده 

قالها تعالى محضرلك مفاجأه 

ضحكت وقالته تانى مش كفايه الليله مفاجأت دا كفايه مفاجأه الحمام دى افضل اشكرك عليها شهور 

ابتسم لها وقالها بس استنى انتِ لسه شفتى حاجه 

ولقته بيطلع فستان الفرح الابيض بتاع العروسه وقالها البسى ده 

 طبعا اتخضت و رفضت  بس هو قالها متخافيش عاوز بس اشوفه عليكى ثوانى بس ...

نفسى تلبسيلى فستان زفاف 

نسيتى ان زواجنا كان من غير فرح

بعد ضغطه عليها لبسته

و حطت من ادوات الزينه اللى زودت جمالها على قد ما حطتها بسيطه بس كانت شاطره ف انها تحط رتوش بسيطه تزيد جمالها من غير مبالغه او تكلف 

 وهو سابها وراح خارج من المكان اللى هى فيه بس ف اوضه تانيه من الجناح بينهم باب مفتوح بيكلمها منه وبترد عليه لحد ما كان بيقولها خلصتى وهو داخل عليها

ردت و قالت اه من غير ما تشوفه بس لما بصت لقته لابس هدوم الامير اللى هيلبسها ف الفرح طبعا لسه هتصرخ فيه لقته شايل الالوان من على وشه ولما دققت لقته هو عريسها اللى امرت بقتله من حوالى شهرين تلاته 

وبسرعه قبل ما تقع من طولها من الصدمه 

جرى عليه وهو ماسك زجاجة عطر قويه شممهالها وبسرعه شرح لها انه هو فعلا زوجها الامير 

وازاى ان السياف بتاعها كان حكيم انه منفذش امرها بقتله 

و هو بيحكى وهى دموعها بتنزل 

ف النهايه فهمها انهم هما الاتنين خدوا فرصه تانيه للحياه 

هو لما السياف مموتوش 

وهى لما اتعلمت تحب الناس وتبعد عن الغرور 

قالتله السياف ده هخلى والدى يرقيه لدرجة فارس 😄

طبعا الباقى معروف خرجوا وكانت المفاجاه انه جاب ابوها وامها اللى وضح لها انهم طول الوقت اللى فات فاكرينها سافرت معاه من اول يوم 

ومش هربانه ولا حاجه

وانهم جايين يحتفلوا ففرحها ف بلده زى ما احتفلوا بفرحها ف بلدها 

وكمان بيحتفلوا بولى العهد اللى ف السكه

وبالنسبه لاهله فهم فاهمين انها جايه النهارده مع اهلها من بلدها واحتفالهم بها وبولى العهد اللى هيفرح العيلتين 

وعملوا زفاف كبير 

امتدت الافراح لاسبوع كامل وعاشوا ف تبات ونبات وخلفوا صبيان وبنات 

وكنت عندهم وجيت حتى العشا ما اتعشيت

وتوته توته خلصت الحدوته 

حلوه ولا ملتوته 

صراحة انا لتيت شويه تفاصيل كتيره من عندى ما انا لازم احط التاتش بتاعى ...  يعنى من الاخر خدت الهيكل بتاع الحدوته من ماما و عملت حدوته جديده ☺

عموما حاجه اخيره القصه دى زى ما قلت من حواديت امى الله يرحمها 

يمكن انا ضفت فيها تفاصيل كتيره 

بس الاصل منها واللى اكيد عرفته من والدتها او حد من كبار زمانها حكهالها وهى طفله زى ماحكتهالى وانا طفله 

بس الفكره موجوده ف الحضاره البشريه متعرفش مين جابها منين 

يعنى هتلاقيها عند شكسبير 

اه والله خدها شكسبير وعمل قصه اسمها ترويض النمره 

وخدها برنارد شو وسماها بجماليون 

مثلتها اليزببث تايلور وعملت فيلم ترويض الشرسه

ومثلته  لبنى عبد العزيز ف فيلم اه من حوا 

وعملتها شويكار ف مسرحيه سيدتى الجميله 

وعملتها نيلى وغيرهم كتير 

الكلام دا بقوله علشان لو كان فى حد   بيقول مين صاحب الروايه الاصليه 

دى مش قصتى بس اضفت لها

#حكايات_امى_ادعولها_بالرحمه

#لقاط_ابن_لقاط_ياكل_الرمان_من_عالبساط_خد_راسه_يا_سياف

#ابتسام