#حبل_الكذب_قصير #الليله٢٧٩

#حبل_الكذب_قصير
#الليله٢٧٩

كان ياما كان ف بلاد العرب زمان 

تاجر غنى اوى  معندوش زوجه ولا اولاد 
 
بس عنده من الخدم ١٠ بيعاملهم زى ما يكونوا من الاسره 

وعلشان كده كان لهم مطمن 

و شايل فلوسه ف البيت وعليهم مستأمن 

ما اصل خدمه ال ١٠ دول هو اللى مربيهم  ولما يعوزوا بيديهم 

دايما مشبعهم و من ماله بيكسيهم  

وعلشان كده كان دايما يقول 
محدش ممكن يخون الامانه 
ويخل بعهد الامان 

بس ف يوم من الايام لقى كيس دنانير ناقص 

ويعد فلوسه تانى وتالت 

اه ... فعلا  ١٠٠٠ دينار منه اتسرقت  

وعدهم تانى وتالت واتأكد 

وسألهم : 

حد خد فلوس من هنا ؟؟

حد سد تمن حاجه ؟؟

ولا اشترى حاجه ونسى يقول ؟؟

طب حد احتاج ياخد بس مكسوف 
يحكيلى وعقاب مش هينول ؟؟

بس  كله انكر 

لكن التاجر عارف ان حد سرقه 
ومفيش دليل على انه اللص كان

فلان ولاعلان 

علشان كده 

فكر التاجر واحتار 

ما زعلش على فلوسه اللى كانت كتير  اد ما زعل ان ف بيتة لص خان الامانه 

علشان كده  خرج وسابهم 

وبعد ساعة جابهم وندههم وقالهم  انا واخد قرارى

وقال مفيش قدامى غير اعمل زى ما كان والدى الله يرحمة بيعمل لما كان عايش ف الجبال والصحارى

كان ماسك ف ايده الحبال ومسكهم وفردهم 

واللى يشوفه يقول دا جاى يربطهم ويعذبهم 

لحد ما اللى اخد الفلوس يقر ويعترف على مكانهم 

بس هو معملش كده 

هو فرد الحبال جنب بعض

ووراهم ان كل حبل قد التانى بالظبط

و ادى الخدم كل واحد منهم حبل 

وقالهم خدوا الحبال وبيتوهم معاكوا مكان ما بتناموا 

و اللى سرق فلوسى حلاقى بكره الحبل بتاعه  زايد  شبر 

ودا هو السحر اللى اتعلمته من والدى 

ولاخر مره بقول لو خدت الفلوس اعترف وبلاش كِبر 

لانى لما هاعرفك هعاقبك ومفيش عفو وانتهى الامر  

و طبعا 

تانى يوم جم الخدم وقدموا الحبال للتاجر 

اللى مسكهم وقاسهم على بعض 

واكيد  متوقعين ان ٩ من  الحبال كانت طول واحد زى ما خدوهم منه

ماعدا حبل واحد حبل اللص الكذاب 

لاء ... مكانش زايد شبر

كان ناقص  شبر 

اصل الحبال لا هتطول ولا حاجه 

ولا فى سحر ولا شعوذة 

كل الحكايه ان اللص هيخاف ان حبله يطول علشان كده قص منه شبر  

علشان ميتكشفش 

وعلشان التاجر كان عارف كده ومتوقعه وقال ان الحبال هتزيد  

وباقى الخدم لما شافوا كده خرجوا وحكوا للناس .... والناس قالوا 

(( حبل الكذب قصير ))

ومن ساعتها بقى مثل الناس بتقوله 

وطبعا اللص دخل السجن والفلوس رجعت للتاجر الذكى

طبعا الله اعلم مدى مصداقيه القصه 
بس احنا دايما بنقول ان حبل الكذب قصير لان اللى بيألف كلام مش حقيقى ويكذب به على الناس ميقدرش يستمر يسترسل ف الكلام ده 

وهييجى عليه وقت يتكشف لو انت فضلت تسرسبه ف الكلام وتشد منه حبل الكلام هتلاقيه قصير وتلاقيه ف النص هنج ومعرفش يطول ف الكلام ليه لان حبل الكذب قصير 

وبتوع زمان قالوا اذا كنت كذوباً فكن ذكورا 

#من_سلسله_حكايه_ورا_كل_مثل
#ابتسام

تعليقات

إرسال تعليق

المشاركات الشائعة من هذه المدونة

#ليه_طيب_اكسر_وراه_قله؟ج٢#الليله٦٠٨

صورة
#ليه_طيب_اكسر_وراه_قله؟ج٢ #الليله٦٠٨ اما بقى الحدوته التانيه فبتقولك ان زمان وبردو ايام الفراعنه كانت لما الانسان يموت بيكسروا وراه اناء من الفخار  يعنى هنا كانت عاده مرتبطه بالجنائز  وطبعا كلنا عارفين اهمية الموت و الحياه الابديه والكلام دا كله عند المصريين القدماء واظن انى لسه مخلصه سلسلة ايزيس وازوريس اللى بتحكى باستفاضه ف اهمية الدفن والليله دى  طب بردو ليه نكسر وراه حاجه فخار واللى رسيت ع القله لاننا بقينا نستخدم معادن وصينى واوانى تانيه حاليا  انما القله فهى اللى كانت مكمله حتى دخول التلاجه الايديال ال ٨ قدم لكل بيت نرجع لكسر القله الفكره انهم مش بس بيكسروا القله لاء وكمان بياخدوها ويدفنوها جنب قبر المرحوم طيب الله ثراه ... ودا ليه؟ علشان لما ترجع الكا يعنى (الروح) على بيته مره تانيه مره ماتأذيش اهل البيت اللى موجودين فيه دول كانوا بيعملوا الاكل ف البيت وياخدوه عند مكان المقبره وياهم وهناك ياكلوا وبعدين يكسروا الاوانى دى ويسيبوا الفخار الكسر هناك  واللى كانوا بيسموه الشِقف جمع شقفه لدرجة ان المتخصصين فى الآثار وهم بينقبوا لو لقوا ف مكان ما آنيه  فخاري...
قراءة المزيد

#هو_صحيح_الجوع_كافر_بس_مش_للدرجه_دى؟؟؟ج٢#الليله٦٥٠

صورة
#هو_صحيح_الجوع_كافر_بس_مش_للدرجه_دى؟؟؟ج٢ #الليله٦٥٠  زى ما قولنا كان الموسم الزراعي في شمال العراق اواخر عام ١٩١٧ سئ جداً ومطر قليل ومحصول ضعيف و بيقول محمد امين العمري  واللى كان ف الوقت ده ضابط اعاشة في الجيش السادس التركي ويعتبر شاهد عيان ع الفتره دى بيحكى ويقول : انه كتب تقرير للقائد خليل باشا وضح فيه الخطر اللي هيحصل في ولاية الموصل بسبب قلة الحبوب و انهم ضرورى يستعدوا ويجيبوا مؤن من اسطنبول و يلحقوا الدنيا قبل فوات الاوان   لكن خليل باشا كبر دماغه و مهتمش للتحذير ده وقال له  ان ولاية الموصل هي مستودع تموين العراق و هي مش  محتاجة تموين يجي لها من بره يا حبيبى احنا ناخد ومنديش بس زى ما توقع محمد امين العامرى بدأت المجاعه حصل ايه ف المجاعه ؟ هل تداركت الحكومه الغير واعيه سوء الحال ؟ ولا ايه اللى حصل؟ ازاى اتعامل اهل الموصل مع المجاعه؟ اقولكم اولا زى ما توقع ضابط الاعاشه بدأت المجاعة تستفحل وشملت الموصل والمنطقة الواسعة اللى ف الشمال منها لحد بحيرة ((وان)) وبدأت جموع من الجياع تهجر ديارها في الاناضول وتتوجه ناحية الموصل  ما الكل بقى فاكرها مليانه خير...
قراءة المزيد

#زئرده #الليله١٠١

صورة
#زئرده #الليله١٠١ الحدوته المرادى حقيقيه زى حكايه #الشنطه_المعجزه  اللى ده الرابط بتاعها https://www.facebook.com/102264164820545/posts/142331610813800/ بردو جيران ماما زمان ف الحى العريق والشارع الجميل (( ابن الرشيد )) اللى لا اتولدت فيه ولا عشت فيه بس حبيته من حب امى فيه ومن حكاياتها عنه  (( زئرده ))  دى واحده جارتهم وباين من اسمها -اللى طبعا مش اسمها الحقيقى - ولكن الناس كانوا مسمينها كده لانها كانت صغننه الحجم  تقريبا كان اسمها نوال بس اللى كانت الدنيا كلها بتناديها بيه كان زيئرده كانت متجوزه بس معهاش اولاد وجوزها كان بيشتغل ف بلد تانيه وبييجى يشوفها كل فتره  وعلشان كده كانت عايشه ف شقه ف بيت اهلها بس بتبات لوحدها ف شقتها كان الناس كلها عارفين انهم مرتاحين ماديا  وف ليله صيفيه حاره حين لم يكن يوجد لا تكييف ولا حتى مروحه فى هذا الزمان القديم  و حيث لا يوجد حل سوى ان تنهى ليلتك بدش بارد لتذهب للنوم متأخراً على ١١ونص ١٢ بالليل كده  بعد ساعه ولا ٢ اما المدينه كلها تغرق فى سبات عميق مفيش صاحى  كانت كالعاده بايته لوحدها وحست بحركه معاها ف اوضة ...
قراءة المزيد