#اللي_اختشوا_ماتوا #الليله٢٨٠

#اللي_اختشوا_ماتوا 

#الليله٢٨٠

المثل ده يقال انه من المغرب العربي 

ويقال انه قصه حقيقيه 

الحكايه ان زمان كانت الحمامات العامه هي المنتشره 

قبل وصول الميه للبيوت و انتشار حمامات البيوت 

والبانيو وكده 

الحكايه ان كانت في مجموعه سيدات ف حمام عام 

و اشتعلت ف الحمام حريقه كبيره 

و لان مفيش وقت يدوروا على لبسهم ف النار والدخان

ساعتها في مجموعه .... اللي خافوا وجريوا بسرعه من الحمام ... من غير ملابسهم 

اما المجموعه التانيه فاتكسفوا

او اختشوا يخرجوا كده 

فاختنقوا وماتوا 

ومن ساعتها طلع مثل اللي اختشوا ماتوا 

يعني خليك بجح علشان تعيش 

مع ان موت وحياه كل انسان مقدره ربنا قبل خلقنا اساسا 

و مع اني اعتقد اللي ماتوا دول ماتوا شهدا..  لانهم  خافوا علي عرضهم من ان الناس تتفرج عليهم 

 واكيد التانيين عاجلا او اجلا ... ماتوا بس الفرق انهم دول ماتوا بكرامتهم 

ف النهايه كلنا هنموت

صح كده 😉

بمناسبه الحكايه دي

افتكرت حكايه مشابهه كنت عليها شاهد عيان 

زمان ايام ما كنت ف الجامعه 

ف يوم  ركبنا اتوبيس الكليه من عند كلية البنات كانت الساعه يا دوب  معديه ٢ وشويه كده 

ولسه الاتوبيس بيتحرك  من شارع المرغنى 

الا ولقينا ستات كتيره لابسين ملابس نوم خفيفه وبعضها فاضح 🙃

وفى ستات بلبس بيت مينفعش تفتح به باب الشقه مش تنزل به الشارع 

ورجاله لابسين فانلات وكلسونات جل 

حيث ان الوقت ده كان الجل هو الرداء الرسمى الوحيد للملابس الداخليه الرجالى سواء ف مصر الجديده او كل احيائك يا مصر قديمها وجديدها

لا كان فى دايس و لا قطونيل 

ولا .. هلا ... هلا ...ع الفانله

سعتها كبنات جامعيات محترمات على نياتنا قلنا دى شقه مسكها بوليس الاداب 

بس لما لقينا العماره اللى بعدها ... واللى بعدها عرفنا بذكائنا الخارق ونيتنا الطيبه  ان دى شبكة اداب مش شقه 

بس لما لقينا الشارع كله بقى استغفر الله العظيم كده

 

قلنا لاء بقى دا ولا بوليس الاداب فى كل مصر وضواحيها يقدر تنزل العدد دا كله ف الشارع 

بس بعدها بسرعه عرفنا ان دا زلزال 

اه نسيت اقولكم احنا كنا ف ٢ اكتوبر ١٩٩٢

طبعا بعد الساعه ٢ وف شهر ١٠ اللى يعتبر حر والناس راجعه من اشغالها 

او ف قيلوله ومتخففه من هدومها 

الا والدنيا اتهزت بهم 

وشارع المرغنى كله ابراج وطبعا عارفين كل ما زاد ارتفاع البناء كل ما زاد الاحساس بالهزات الارضيه 

مش عارفين ؟؟

اديكم عرفتوا 

طبعا مش كل الناس نزلوا الشارع ناس كتير فضلوا ف بيوتهم وهم بردو خايفين بس استنوا قضا ربنا ف مكانهم زى اللى اختشوا ف المثل 

والحمد لله مجرالهمش حاجه 

اعرف زوجين جُمال الله يرحم الزوجه ويبارك ف الزوج اذا كان عايش ويرحمه اذا كان مات 

حكولى انهم ساعتها قعدوا مكانهم ماسكين اديهم ف ادين بعض 

والبيت بيتهز حواليهم والنيش بيتفتح واللى فيه بيقع وهم ماسكين ادين بعض لحد ما الهزة انتهت 

الزوج كان يقدر ينزل بس هى متقدرش فاستنى معاها 

وفى فئة تانيه مبتخافش خالص زى والدتى الله يرحمها 😂😂

كل همها انها تصحى اخويا فؤاد وتقوله قوم يا فؤاد شوف الزلزال 

😅 كأنه فيلم عرض اول وخايفه يفوته الفرجه 

المهم ان الثوانى دى كانت من اللحظات فارقه فى حياة المصريبن 

لما اتكلم التليفزيون بعدها عن خسائر اليوم ده 

لقينا ان كام بيت قديم اوى من الاحياء العريقه ف القاهره واللى موقعش على سكانه ولكن الهزات شرخته والناس اغلبهم خرجوا بسلام الا حالات قليله اوى 

فى مثلا بيت قديم واحد من سكانه وكان شاب قوى بس خاف يقع عليه نط من البلكونه وساعتها رجليه الاتنين اتكسروا 

ودا كان المصاب الوحيد من البيت ده اللى كل سكانه نزلوا من على السلم بامان 

انما اكتر عدد من الضحايا كانوا من تلامذة المدارس اللى ف الوقت ده كانت شغاله 

ومن خوف بعض المدرسين و( الاوبل )  ..المدرسات  يعنى  زى ما بنت كانت بتقول ف التليفزيون خافوا وجريوا وبالتالى الاطفال جريوا وراهم وتدافعهم فى الطرقات وع السلالم كان هو القاتل اكتر من الهزات والهدد

كمان منساش عماره هليوبلس اللى وقعت نتيجه غش ف الاساسات 

واللى بعد ٥ ايام خرج من تحت انقاضها راجل على قيد الحياه 

كان مهندس واسمه اكثم وفضل تحت الانقاض كل المده دى 

وللاسف اللى خاف من اللى بيحصل وخرج بلبس خفيف او نط من بلكونه او جريوا على السلالم هم اللى اتفضحوا اوماتوا او اتصابوا   

اما اللي اختشوا فمماتوش ولا حاجه

وبعدين اين يفرون من قدر الله 

#اللي_اختشوا_ماتوا_واللي_مختشوش_هيموتو_مش_هيروحوا_مارينا

#ذكرياتشي_من_الجامعه

#الزلزال

#ابتسام