#تحب_تتعلم_اللغه #الليله٣٠٦ #من_الهيروغليفيه_للسغه_لمون_رايح_جاى_والعكس🔄

#تحب_تتعلم_اللغه
#من_الهيروغليفيه_للسغه_لمون_رايح_جاى_والعكس🔄

اعلان احمد حلمى الجديد فكرنى بالسيم 
وقصة سيدنا موسى كانت سحبانى ف تفاصيلها فكتبت المقال ده بس مكملتوش ونسيته
 
ولما جيت اقلب ف البوم ذكرياتشى لقيته و قلت يا بت كملى واهه  ناخد فاصل خفيف ونواصل بعده الواضيع السمينه 

وفعلا الموضوع دا خفيف وعاوزه احكيه لما جت مناسبته

اللغه المره دى لغة العوالم 
والمقصود مش العوالم الاخرى والفضائيين والالينز وكده 

و لا هى .. العوالم الخفيه بتاعة عادل امام 
 
ولكن العوالم اللى هم💃 هى هى  الراقصات لامؤخذه

الفكره ان زمان وف مصر قديما كانت كل فئه من فئات الشعب لها لغه خاصه بها بيتكلموا مع بعض بيها و بالتالى الدخيل عنهم يبقى قرطاس جوافه ولا فاهم حاجه 

وكان فى يوم خالى مصطفى رحمه الله  عثر فى مكان ما لا اعلمه على ورقه بها بعض ( السيم ) والسيم ده يعنى اللغه الخاصه بكل مهنه او فئه 

اول لغه او سيم هى زى ما قلت لغة هيى هيييى العوالم 💃ولازم طبعاً اختمها  ب .... لا مؤخذه 

اللغه دى عدت علينا كلنا من  خلال اعمال فنيه واللى طبعا كان احدثهم اعلان احمد حلمى 

بس استخدمها مكى ف وقفة ناصية زمان  
سماح انور ف مسرحية راقصه قطاع عام
وطبعا الحوار اللى كان بيدور بين تحيه كاريوكا ونبيله السيد ف فيلم  خلى بالك من زوزو
ف الدقيقه ١،٢٥ من الفيلم  الحوار دار بينهم باللغه دى 

كذلك ف مسرحية راقصه قطاع عام كان كل الحوار بين سماح انور و محمد الشرقاوى وباقى اعضاء فرقتها بالسيم ده لما سرقوا (الستامه خرده) يعنى الختامه من يحى الفخرانى  

الموضوع ان كل كار 
وكار دا  بمعنى كلمه مهنه زمان

و زمان كانوا بيقولوا عليها كار 
 

فكل كار اخترع لغه له ميفهمهاش الا اصحابها 
فدى كانت لغة كار العوالم

وكار العوالم عمل حل بسيط وعبقرى 

الحرف الاول من الكلمه بنشيله ونحط مكانه حرف السين 
وناخد الحرف اللى شيلناه و نبدا به كلمه عاديه بتبدا ف العادى بالحرف ده بس هى ملهاش اى لازمه ف الجمله 

يعنى مثلا 

عامل ايه 
هتكون 
( عامل ) سامل عمر  ..
( إيه) سيه ايهاب 

مثال تانى 
جدد الباقه 
( جدد ) سدد جون ...
( الباقه ) الساقه بالون 

وبكده اى حد يحضر الحوار يبقى زى الاطرش ف الزفه ولا يفهم ايتوها حاجه 

كلام كتير بيقولوا انها لغة من لغات الشارع القديمه 

ودا قاله مكى او الناس اللى بيتكلموا عن اللغه دى على النت 
واتعملت صفحات ... وجروبات وفيديوهات ع اليوتيوب والتيك توك 

ومحدش منهم قال انها لغة العوالم 

معلش بأكد ع المعلومه لانها مهمه  
انت وانت بتتعلم اللغه دى تبقى عارف اصلها 

علفكره لذيد انك تكون عارف لغة بتتقال قدامك خصوصا لو بتتقال بالعربى بس بالفاظ غير مفهومه للى قدامك 

بتكلم بها انا وابنى وبنت اخويا 
بس بنتكلم بها زى ما بنقرا الفرانكو 

بلجلجه وتهتهه 
اتعلم اللغه بس متنساش تتعلم اصل وفصل  اللغه  

وبكره هكمل كلامى ف سيم بتاع مهن تانيه 

علشان لما تقف معاهم تبقى فاهم بيقولوا ايه 

من الهيروغليفيه للسغه لمون ... اصلح
 
اه ...
ف النهايه اكتبولى  جمله فى الكومنتات بالسيم وانا اترجمها للعربى او العكس 

ياريت 

#ابتسام

تعليقات

إرسال تعليق

المشاركات الشائعة من هذه المدونة

#ليه_طيب_اكسر_وراه_قله؟ج٢#الليله٦٠٨

صورة
#ليه_طيب_اكسر_وراه_قله؟ج٢ #الليله٦٠٨ اما بقى الحدوته التانيه فبتقولك ان زمان وبردو ايام الفراعنه كانت لما الانسان يموت بيكسروا وراه اناء من الفخار  يعنى هنا كانت عاده مرتبطه بالجنائز  وطبعا كلنا عارفين اهمية الموت و الحياه الابديه والكلام دا كله عند المصريين القدماء واظن انى لسه مخلصه سلسلة ايزيس وازوريس اللى بتحكى باستفاضه ف اهمية الدفن والليله دى  طب بردو ليه نكسر وراه حاجه فخار واللى رسيت ع القله لاننا بقينا نستخدم معادن وصينى واوانى تانيه حاليا  انما القله فهى اللى كانت مكمله حتى دخول التلاجه الايديال ال ٨ قدم لكل بيت نرجع لكسر القله الفكره انهم مش بس بيكسروا القله لاء وكمان بياخدوها ويدفنوها جنب قبر المرحوم طيب الله ثراه ... ودا ليه؟ علشان لما ترجع الكا يعنى (الروح) على بيته مره تانيه مره ماتأذيش اهل البيت اللى موجودين فيه دول كانوا بيعملوا الاكل ف البيت وياخدوه عند مكان المقبره وياهم وهناك ياكلوا وبعدين يكسروا الاوانى دى ويسيبوا الفخار الكسر هناك  واللى كانوا بيسموه الشِقف جمع شقفه لدرجة ان المتخصصين فى الآثار وهم بينقبوا لو لقوا ف مكان ما آنيه  فخاري...
قراءة المزيد

#هو_صحيح_الجوع_كافر_بس_مش_للدرجه_دى؟؟؟ج٢#الليله٦٥٠

صورة
#هو_صحيح_الجوع_كافر_بس_مش_للدرجه_دى؟؟؟ج٢ #الليله٦٥٠  زى ما قولنا كان الموسم الزراعي في شمال العراق اواخر عام ١٩١٧ سئ جداً ومطر قليل ومحصول ضعيف و بيقول محمد امين العمري  واللى كان ف الوقت ده ضابط اعاشة في الجيش السادس التركي ويعتبر شاهد عيان ع الفتره دى بيحكى ويقول : انه كتب تقرير للقائد خليل باشا وضح فيه الخطر اللي هيحصل في ولاية الموصل بسبب قلة الحبوب و انهم ضرورى يستعدوا ويجيبوا مؤن من اسطنبول و يلحقوا الدنيا قبل فوات الاوان   لكن خليل باشا كبر دماغه و مهتمش للتحذير ده وقال له  ان ولاية الموصل هي مستودع تموين العراق و هي مش  محتاجة تموين يجي لها من بره يا حبيبى احنا ناخد ومنديش بس زى ما توقع محمد امين العامرى بدأت المجاعه حصل ايه ف المجاعه ؟ هل تداركت الحكومه الغير واعيه سوء الحال ؟ ولا ايه اللى حصل؟ ازاى اتعامل اهل الموصل مع المجاعه؟ اقولكم اولا زى ما توقع ضابط الاعاشه بدأت المجاعة تستفحل وشملت الموصل والمنطقة الواسعة اللى ف الشمال منها لحد بحيرة ((وان)) وبدأت جموع من الجياع تهجر ديارها في الاناضول وتتوجه ناحية الموصل  ما الكل بقى فاكرها مليانه خير...
قراءة المزيد

#زئرده #الليله١٠١

صورة
#زئرده #الليله١٠١ الحدوته المرادى حقيقيه زى حكايه #الشنطه_المعجزه  اللى ده الرابط بتاعها https://www.facebook.com/102264164820545/posts/142331610813800/ بردو جيران ماما زمان ف الحى العريق والشارع الجميل (( ابن الرشيد )) اللى لا اتولدت فيه ولا عشت فيه بس حبيته من حب امى فيه ومن حكاياتها عنه  (( زئرده ))  دى واحده جارتهم وباين من اسمها -اللى طبعا مش اسمها الحقيقى - ولكن الناس كانوا مسمينها كده لانها كانت صغننه الحجم  تقريبا كان اسمها نوال بس اللى كانت الدنيا كلها بتناديها بيه كان زيئرده كانت متجوزه بس معهاش اولاد وجوزها كان بيشتغل ف بلد تانيه وبييجى يشوفها كل فتره  وعلشان كده كانت عايشه ف شقه ف بيت اهلها بس بتبات لوحدها ف شقتها كان الناس كلها عارفين انهم مرتاحين ماديا  وف ليله صيفيه حاره حين لم يكن يوجد لا تكييف ولا حتى مروحه فى هذا الزمان القديم  و حيث لا يوجد حل سوى ان تنهى ليلتك بدش بارد لتذهب للنوم متأخراً على ١١ونص ١٢ بالليل كده  بعد ساعه ولا ٢ اما المدينه كلها تغرق فى سبات عميق مفيش صاحى  كانت كالعاده بايته لوحدها وحست بحركه معاها ف اوضة ...
قراءة المزيد