#كل_مايعجبك_والبس_ما_يعجب_الناس #الملايه_اللف #الليله٣٠٩

#كل_مايعجبك_والبس_ما_يعجب_الناس
#الملايه_اللف
#الليله٣٠٩

والله ان لفيتوا العالم لف
والله ان صفيتوا العالم صف 
ما تلاقوا زى ملاية اللف .. ملاية  اللف .. ملاية اللف

وباغنية فيروز وتحيه كاريوكا ف فيلم فيروز هانم نبتدى نتكلم عن الملايه اللف 

واللى ذكرتها ف الليله اللى فاتت لما اتكمت عن البرقع والملايه اللف

يتنوع البس ويتغير اللبس من زمن للتانى 
والنهارده هتكلم عن الملايه اللف

طبعا البرقع دا قناع المفروض يدارى الوجه كنوع من الحشمه 

بس بما ان الشيطان مش هيسيب الناس ف حالها فشجع الستات انهم يوسعوا فتحات البرقع ويزودوا الخروم

ولكن كمان بقى مجال للجاذبيه علشان ابراز العنين والكحل ف عنيك السود جلاب الهوى زى عبد العزيز محمود ما بيقول 

 لحد ما بقى زى قِلته ف الحشمه وان كان له فايده لو عاوزه يستخدمه الست ف الاغراء ولنا فقصة الليله اللى فاتت خير مثال

لحد ما ربنا كرمنا بالاخوات الفضليات هدى شعراوى و صفيه زغلول الصحبه الكريمه والاخ قاسم امين (( مش مسامحاك يا قاسم على مرمطتنا ف الشغل دى ))
يالا بقى مش وقته 
المهم انهم شجعوا على خلع الحجاب وان الست مش هتبقى ست متقدمه الا لما تخرج من سيطرة ١٣ قرن على عقلها 
المهم ان النقاب والبرقع وكل اشكال تغطية الوجه بدات تنقرض حبه حبه 

لكن الملايه اللف لاء 
فضلت متبته 

اه ف التلاتينيات و الااربعينيات و الخمسينيات من القرن الماضى يعنى بدات تظهر الملابس المودرن الفساتين و التاييرات 
طبعا الموضه دايما بتبدأ من سيدات الطبقات الارقى وتنزل ف الطبقات المتوسطه ف الاقل لحد ما تنتشر بين عامة الشعب
اصل نساء القاهره زمان كانوا نوعين : 
نوع بيلبس الملايه 
ونوع بيلبس مودرن ودا ف النص التاني من القرن العشرين يعني لحد الخمسينيات تقريبا 
اه فى اللى متمسكين بالملايه ولا يقبلون لها بديلاً
فى اللى عملوا ميكس يلبسوا الملايه لو رايحه مشوار قريب او مكسله تكوى  اللبس بتاعها مثلا 

وبالتالى بردو لسه الستات بتلبس الملايه اللف ودى الستات البلدى  
لما نشوف الملايه القديمه هتلاقيها مختلفه خالص عن اللى بيلبسوها فرقة رضا ف استعراضاتهم او اى استعراضات بنشوفها ف اى مكان 

لاء الملايه اللف الحقيقيه  قدها مرتين او  ٣ 

ودي قطعه قماش كبيره مستطيله  قد نص ملايه  السرير كده 

بيكون لونها اسود .. ومن نسيج خاص كده فيه تضليعه خفيفه فيه منه شبه الستان ودا للستات العايقه او بيكون مط يعنى من لون مطفى 

دا علي ما افتكر ... من طفولتي

الشابات  بقي تمردوا علي الملايه وبقوا يلبسوا فساتين وجيبه وبلوزه وكل المعتاد دلوقتي ده 

اما الاكبر سننا ف تمسكوا بالعادات والتقاليد واهمها الملايه 
لحد تقريبا السبعينيات والثمانييات 
لما اتت هجمة السفر للخليج للعمل هناك ورجع الرجاله لزوجاتهم بالعبايه الخليجيه اللي حلت مكان الملايه شويه شويه 

واختفت وانقرضت.

وفضلت رمز لبنات بحرى ف استعراضات الرقص بس 

انما تبقى الملايه اللف الزىّ الاكثر انتشاراً للمرأه فى القرنين الماضيين 
 
طول عمرى بحب الملايه اللف وطول عمرى بحب لبسها 
خالتى كان عندها ملايه لف كنت بعشق ف طفولتى البسها وامشى اتكعبل فيها 😅😅😅

تحبوا نتكلم تانى عن ايه 
فتحولى مواضيع نحكى عليها حواديت 

#ابتسام

تعليقات

إرسال تعليق

المشاركات الشائعة من هذه المدونة

#ليه_طيب_اكسر_وراه_قله؟ج٢#الليله٦٠٨

صورة
#ليه_طيب_اكسر_وراه_قله؟ج٢ #الليله٦٠٨ اما بقى الحدوته التانيه فبتقولك ان زمان وبردو ايام الفراعنه كانت لما الانسان يموت بيكسروا وراه اناء من الفخار  يعنى هنا كانت عاده مرتبطه بالجنائز  وطبعا كلنا عارفين اهمية الموت و الحياه الابديه والكلام دا كله عند المصريين القدماء واظن انى لسه مخلصه سلسلة ايزيس وازوريس اللى بتحكى باستفاضه ف اهمية الدفن والليله دى  طب بردو ليه نكسر وراه حاجه فخار واللى رسيت ع القله لاننا بقينا نستخدم معادن وصينى واوانى تانيه حاليا  انما القله فهى اللى كانت مكمله حتى دخول التلاجه الايديال ال ٨ قدم لكل بيت نرجع لكسر القله الفكره انهم مش بس بيكسروا القله لاء وكمان بياخدوها ويدفنوها جنب قبر المرحوم طيب الله ثراه ... ودا ليه؟ علشان لما ترجع الكا يعنى (الروح) على بيته مره تانيه مره ماتأذيش اهل البيت اللى موجودين فيه دول كانوا بيعملوا الاكل ف البيت وياخدوه عند مكان المقبره وياهم وهناك ياكلوا وبعدين يكسروا الاوانى دى ويسيبوا الفخار الكسر هناك  واللى كانوا بيسموه الشِقف جمع شقفه لدرجة ان المتخصصين فى الآثار وهم بينقبوا لو لقوا ف مكان ما آنيه  فخاري...
قراءة المزيد

#هو_صحيح_الجوع_كافر_بس_مش_للدرجه_دى؟؟؟ج٢#الليله٦٥٠

صورة
#هو_صحيح_الجوع_كافر_بس_مش_للدرجه_دى؟؟؟ج٢ #الليله٦٥٠  زى ما قولنا كان الموسم الزراعي في شمال العراق اواخر عام ١٩١٧ سئ جداً ومطر قليل ومحصول ضعيف و بيقول محمد امين العمري  واللى كان ف الوقت ده ضابط اعاشة في الجيش السادس التركي ويعتبر شاهد عيان ع الفتره دى بيحكى ويقول : انه كتب تقرير للقائد خليل باشا وضح فيه الخطر اللي هيحصل في ولاية الموصل بسبب قلة الحبوب و انهم ضرورى يستعدوا ويجيبوا مؤن من اسطنبول و يلحقوا الدنيا قبل فوات الاوان   لكن خليل باشا كبر دماغه و مهتمش للتحذير ده وقال له  ان ولاية الموصل هي مستودع تموين العراق و هي مش  محتاجة تموين يجي لها من بره يا حبيبى احنا ناخد ومنديش بس زى ما توقع محمد امين العامرى بدأت المجاعه حصل ايه ف المجاعه ؟ هل تداركت الحكومه الغير واعيه سوء الحال ؟ ولا ايه اللى حصل؟ ازاى اتعامل اهل الموصل مع المجاعه؟ اقولكم اولا زى ما توقع ضابط الاعاشه بدأت المجاعة تستفحل وشملت الموصل والمنطقة الواسعة اللى ف الشمال منها لحد بحيرة ((وان)) وبدأت جموع من الجياع تهجر ديارها في الاناضول وتتوجه ناحية الموصل  ما الكل بقى فاكرها مليانه خير...
قراءة المزيد

#زئرده #الليله١٠١

صورة
#زئرده #الليله١٠١ الحدوته المرادى حقيقيه زى حكايه #الشنطه_المعجزه  اللى ده الرابط بتاعها https://www.facebook.com/102264164820545/posts/142331610813800/ بردو جيران ماما زمان ف الحى العريق والشارع الجميل (( ابن الرشيد )) اللى لا اتولدت فيه ولا عشت فيه بس حبيته من حب امى فيه ومن حكاياتها عنه  (( زئرده ))  دى واحده جارتهم وباين من اسمها -اللى طبعا مش اسمها الحقيقى - ولكن الناس كانوا مسمينها كده لانها كانت صغننه الحجم  تقريبا كان اسمها نوال بس اللى كانت الدنيا كلها بتناديها بيه كان زيئرده كانت متجوزه بس معهاش اولاد وجوزها كان بيشتغل ف بلد تانيه وبييجى يشوفها كل فتره  وعلشان كده كانت عايشه ف شقه ف بيت اهلها بس بتبات لوحدها ف شقتها كان الناس كلها عارفين انهم مرتاحين ماديا  وف ليله صيفيه حاره حين لم يكن يوجد لا تكييف ولا حتى مروحه فى هذا الزمان القديم  و حيث لا يوجد حل سوى ان تنهى ليلتك بدش بارد لتذهب للنوم متأخراً على ١١ونص ١٢ بالليل كده  بعد ساعه ولا ٢ اما المدينه كلها تغرق فى سبات عميق مفيش صاحى  كانت كالعاده بايته لوحدها وحست بحركه معاها ف اوضة ...
قراءة المزيد