#عاوزه_يبقى_شعرك_زى_شريهان #الليله٣٢٤ #حدوته_من_قلب_الحدث_وركوب_للتريند

#عاوزه_يبقى_شعرك_زى_شريهان
#الليله٣٢٤
#حدوته_من_قلب_الحدث_وركوب_للتريند

الاعلان بتاع شريهان كان حديث الناس اول وتانى يوم رمضان 

وانقسم الناس ل ٣ فئات :

الفئه الاولى :

اللى مش فاهمين حاجه وشايفين انه اعلان رخم ومجهول وغامض

ودول الجيل الجديد مواليد ما بعد الالفيه ميعرفوش عن شريهان الا انها كانت صاحبة نيللى 

او انها اسم ايمى سمير غانم فى مسلسل يحمل نفس الاسمين  نيللى وشيريهان  

ودول يسمحولى اشرحلهم فكرة الاعلان 

و هى عن قصة حياتها الكلمات بتتكلم اننا لما نقع نقف تانى 
شريهان عملت حادثه كبيره اوى 
مثلتها فى الاعلان لما انها ف عربيه وطارت منها

وبعدين قالوا اتشلت وسافرت باريس تتعالج 
وعملت ييجى ٣٠ عمليه كل واحده اصعب من التانيه 
الدكتور الفرنساوى قال لو وقفت على رجليها تانى تبقى معجزه 
وخفت ورجعت تعمل افلام واستعراضات 
بعدها قالوا جالها كانسر
وفضلت مده كبيره تقاومه هى متكلمتش عنه ف الاعلان بس هو ده اللى بعدها عن التمثيل 
واتجوزت وخلفت بنتين  تقريبا 

فهى بتقول انك لازم تقاتل وكل ما تقع تقف تانى

والفئه التانيه :

هى فئه جيل الوسط والجيل القديم ودول اللى عارفين شيريهان 

وكانوا بيقطعوا بعض كل سنه هى احسن ولا نيللى 

طب مين احسن فاطيماه وكاريماه ولا حاليمه (زى طريقة نطقهم) ف حلقات الف ليله وليله 

وفاهمين فكرة الاعلان وبيفكروا هل حادثه العربيه بتاعها سببها مبارك علشان يبعدها عن جمال ابنه (لاء مش ابنه اللى جميل هو اسمه كده)
تعديل :

 الناس قالولى انه كان عيلاء مبارك مش جمال 

ولا سببها صفوت الشريف بإس (ايعاز يعنى) من سوزان مبارك 

وموت صفوت هو اللى رجعها للتليفزيون تانى 

وفى حبه مننا الجيل الوسط بيقول (ودول الستات) 

بنقول ازى بقت هى واسعاد يونس اصحاب😏
 بعد ما قطعوا بعض ف الصحافه لما قامت بدور خطافة الرجاله واتجوزت جوز اسعاد🙄 

وفى فئه بتقول هل صفوت هو اللى ورا حادثه الاميره ديانا
ومش بعيد يكون صفوت اللى اغتال كينيدى ويجوز يرجع له السبب فى حادثة اغتيال ابرهام لينكولين

الفئه التالته :

ودول لا همهم قصتها ولا هامهم اعلانها 
كل اللى هاممهم طول شعرها وازاى بالجمال ده 

وعلشان ابسط الموضوع 

اولا : 
شيريهان طول عمرها شعرها حلو وطويل

ثانيا : لو عاوزه شعرك يبقى كده واحسن كمان هاقولك ع الحل ببساطه ومن غير سحر وشعوذه 

عارفين  وسط البلد عارفين صيدلية دلمار اللى ف شارع  ٢٦ يوليو 

دايما عندها حاجات حلوه ومستورده وبتجيب من الاخر 

 تدخلى الصيدليه وتسألى البنت  لو ولد اللى واقف يبيع منصحكيش لانه مش هعرف يجاوبك ولا هيفهم اساساً

المهم تسالى البنت  اللى هناك عن بتاع البوستيجات والبواريك اللى هناك 

هتشاورلك ع الرصيف اللى قدامها
هتنقى اللون والطول اللى يعجبك و فى ثوانى هيكون شعرك زيها او اطول لو عاوزه 

وعلى مين .. على مين .. على مين

وكل سنه وانتم طيبين

#ابتسام

تعليقات

إرسال تعليق

المشاركات الشائعة من هذه المدونة

#ليه_طيب_اكسر_وراه_قله؟ج٢#الليله٦٠٨

صورة
#ليه_طيب_اكسر_وراه_قله؟ج٢ #الليله٦٠٨ اما بقى الحدوته التانيه فبتقولك ان زمان وبردو ايام الفراعنه كانت لما الانسان يموت بيكسروا وراه اناء من الفخار  يعنى هنا كانت عاده مرتبطه بالجنائز  وطبعا كلنا عارفين اهمية الموت و الحياه الابديه والكلام دا كله عند المصريين القدماء واظن انى لسه مخلصه سلسلة ايزيس وازوريس اللى بتحكى باستفاضه ف اهمية الدفن والليله دى  طب بردو ليه نكسر وراه حاجه فخار واللى رسيت ع القله لاننا بقينا نستخدم معادن وصينى واوانى تانيه حاليا  انما القله فهى اللى كانت مكمله حتى دخول التلاجه الايديال ال ٨ قدم لكل بيت نرجع لكسر القله الفكره انهم مش بس بيكسروا القله لاء وكمان بياخدوها ويدفنوها جنب قبر المرحوم طيب الله ثراه ... ودا ليه؟ علشان لما ترجع الكا يعنى (الروح) على بيته مره تانيه مره ماتأذيش اهل البيت اللى موجودين فيه دول كانوا بيعملوا الاكل ف البيت وياخدوه عند مكان المقبره وياهم وهناك ياكلوا وبعدين يكسروا الاوانى دى ويسيبوا الفخار الكسر هناك  واللى كانوا بيسموه الشِقف جمع شقفه لدرجة ان المتخصصين فى الآثار وهم بينقبوا لو لقوا ف مكان ما آنيه  فخاري...
قراءة المزيد

#هو_صحيح_الجوع_كافر_بس_مش_للدرجه_دى؟؟؟ج٢#الليله٦٥٠

صورة
#هو_صحيح_الجوع_كافر_بس_مش_للدرجه_دى؟؟؟ج٢ #الليله٦٥٠  زى ما قولنا كان الموسم الزراعي في شمال العراق اواخر عام ١٩١٧ سئ جداً ومطر قليل ومحصول ضعيف و بيقول محمد امين العمري  واللى كان ف الوقت ده ضابط اعاشة في الجيش السادس التركي ويعتبر شاهد عيان ع الفتره دى بيحكى ويقول : انه كتب تقرير للقائد خليل باشا وضح فيه الخطر اللي هيحصل في ولاية الموصل بسبب قلة الحبوب و انهم ضرورى يستعدوا ويجيبوا مؤن من اسطنبول و يلحقوا الدنيا قبل فوات الاوان   لكن خليل باشا كبر دماغه و مهتمش للتحذير ده وقال له  ان ولاية الموصل هي مستودع تموين العراق و هي مش  محتاجة تموين يجي لها من بره يا حبيبى احنا ناخد ومنديش بس زى ما توقع محمد امين العامرى بدأت المجاعه حصل ايه ف المجاعه ؟ هل تداركت الحكومه الغير واعيه سوء الحال ؟ ولا ايه اللى حصل؟ ازاى اتعامل اهل الموصل مع المجاعه؟ اقولكم اولا زى ما توقع ضابط الاعاشه بدأت المجاعة تستفحل وشملت الموصل والمنطقة الواسعة اللى ف الشمال منها لحد بحيرة ((وان)) وبدأت جموع من الجياع تهجر ديارها في الاناضول وتتوجه ناحية الموصل  ما الكل بقى فاكرها مليانه خير...
قراءة المزيد

#زئرده #الليله١٠١

صورة
#زئرده #الليله١٠١ الحدوته المرادى حقيقيه زى حكايه #الشنطه_المعجزه  اللى ده الرابط بتاعها https://www.facebook.com/102264164820545/posts/142331610813800/ بردو جيران ماما زمان ف الحى العريق والشارع الجميل (( ابن الرشيد )) اللى لا اتولدت فيه ولا عشت فيه بس حبيته من حب امى فيه ومن حكاياتها عنه  (( زئرده ))  دى واحده جارتهم وباين من اسمها -اللى طبعا مش اسمها الحقيقى - ولكن الناس كانوا مسمينها كده لانها كانت صغننه الحجم  تقريبا كان اسمها نوال بس اللى كانت الدنيا كلها بتناديها بيه كان زيئرده كانت متجوزه بس معهاش اولاد وجوزها كان بيشتغل ف بلد تانيه وبييجى يشوفها كل فتره  وعلشان كده كانت عايشه ف شقه ف بيت اهلها بس بتبات لوحدها ف شقتها كان الناس كلها عارفين انهم مرتاحين ماديا  وف ليله صيفيه حاره حين لم يكن يوجد لا تكييف ولا حتى مروحه فى هذا الزمان القديم  و حيث لا يوجد حل سوى ان تنهى ليلتك بدش بارد لتذهب للنوم متأخراً على ١١ونص ١٢ بالليل كده  بعد ساعه ولا ٢ اما المدينه كلها تغرق فى سبات عميق مفيش صاحى  كانت كالعاده بايته لوحدها وحست بحركه معاها ف اوضة ...
قراءة المزيد