#ليله_ف_عشق_الفول #الليله٢٣٧

#ليله_ف_عشق_الفول
#الليله٢٣٧

كنت مجهزه موضوع احكى حكايته الليله دى ، بس  مشكله ظريفه اتعرضت ف صفحة عن الاكل خلتنى اغير الموضوع 

وياريت كل مشاكل الدنيا لذيذه كده 

صاحبة المشكله بتقول :
(( فول بالطحينه وعملت فول بزيت لمون وعملت فول ببيض وعملت فول بسمن بلدى وعملت قولولى افكار تانى للفول عشان زهقت 😁 ))

ولانى عاشقه محترفه لانواع الفول  وتصنيفاته فانا ادليت بدلوى ودى كانت اجابتى :

١ - فول بالطماطم
٢ - فول بتقلية التوم زى اللى بسمنه بس معاهم فصين توم فلفل اسود
٣ - فول بالسلطه الخضرا 
٤ - فول متخرط عليه بصل 
٥ - فول متسخن معاه البصل المتخرط على النار 
٦ - فول بالطحينه 
٧ - ودا غير الفول بسلطه الطحينه 
٨ - فول مقلى عليه بيض
٩ - فول متقطع عليه بيض مسلوق
١٠ - فول بالزيت الحار  
١١ - بالتسبيكه تقليه زيت وبصل وتوم فلفل اخضر حامى وتتطش بصلصة الطماطم و لما تتسبك يضاف الفول
١٢ - فول بالليمون والكمون والزيت 
١٣ - فول بالزبده نقدح الزبده ونطشها بالفول

ودى كانت اجاباتى علشان تعمل فول للسحور

اما لو فكرنا ف الفول كوجبه تتاكل اى وقت اثناء النهار فى غير ايام رمضان فنكمل  و هنلاقى التالى :-
١٤ - الطعميه
١٥ - البصاره
١٦ - الكوزبريه ودى فول مدشوس منقوع يضاف على تسبيكه طماطم بالبصل والطماطم وحفنه ارز ويغمس كوجبة غداء قرديحى (بلا لحمه)
١٧ - الفول المشيوى ودا قرون فول حيراتى تسلق ف قليل من الماء على النار ويضاف لها الملح و الكمون ويؤكل فيها الاخضر واليابس 
اقصد الفول بالقشر الاخضر بعد تسويته ويرمى فقط الخيوط الجانيبه والطرفين

وبما انى بحب الفول ومن مدمنينه وبما ان الفول دا صديق المصريين زى ما ابو قردان صديق الفلاح كده
وبما انى بتكلم عن عمايل الفول بحب  وانا دايما بحب الفول 

فاحب اقول ان الفول طلع مظلوم من تهمة انه بيخلينا نتنح ونبنج بعد ما ناكله 
والكلام اللى قاله سمير غانم ف مسرحية المتزوجون على اد ما ضحكنا 
بس كان كل المعلومات اللى قالها غلط×غلط
 
وتعالى بقى اقولك اللى حصل :

أثبتت الدراسات الحديثة أن المخ بيرسل عدد  من المواد الكيميائية  للجسم بعد ما تاكل  الفول  اسمها الموصلات العصبية تساعد على  الشعور بالسعادة والنشاط  لأن الجسم يحصل على تغذية متكاملة تضمن له كل اللى  بيحتاجه  ودا هيخلى مزاجك  يتحسن كمان وتشعر بالسعاده 

وتعالوا نفصص الموضوع علميا ماهومش اى هجص وخلاص :

١ - يحتوي الفول على السيروتونين
 وهي موصلات عصبية  تنظم النوم 
وتقلل القلق
 
٢ - استييل كولين : 

تساعد على تقوية الذاكرة 

٣ - دوبامين وادرينالين

 ودى بتساعد على  التحكم في التوتر والقلق 

يعنى الفول المدمس  بيساعد الجسم على :  

١ : تكوين موصلات السعادة 
٢ : وتحقيق قوة الأداء والتقليل من سرعة الشعور بالإجهاد والتوتر

٣ : بيقوى الذاكره 

من الاخر فوّل التانك فول ف السحور وانت مطمن بس لو زى حلاتى قولونك مبيحبش الفول اضربه ضرباً مبرحا ف الخلاط الفول مش القولون 

بالمناسبه لما كنت صغيره وبسمع كلمة فوّل التانك او فول العربيه كنت فاكره ان الكلمه جايه من الفول لان زى ما الفول اساسى لحياتنا ومينفعش نعيش من غيره 
يبقى بيشبهوا البنزين بانه فول العربيه وان العربيه مش هتمشى من غير ما يفولها زى ما انت لازم ان فطارك يكون معاه فول 

محدش يفتكرنى كنت عبيطه 
انا كنت عارفه ان العربيه بتمشى بالبنزين طبعا بس هم بيستخدموا كلمة يفوّل دى مجازاً يعنى 
مش full يعنى ملئ .... واضح طبعا 

واضح طبعا .... انى كنت عبيطه 
لازم اواجه الحقيقه ... ولا داعى للانكار 

حطيت اسم كل نوع فول على صورته 
بالمناسبه فى خدمه  خاصه بقدمها النهارده فى حب الفول اللى عاوز يعمل اى نوع من الانواع اللى ذكرتها وعاوز  يسال على الطريقه انا موجوده 
الخدمن دى مقدمه برعاية مثل اكفى القدره على فمها ... لان كاتبة هذا المقال اتعلمت كل انواع الفول دى من امها 

#فى_عشق_امى_اللى_علمتنى_اعمل_الفول_وعلمتنى_احبه_الله_يرحمها
#ابتسام

تعليقات

إرسال تعليق

المشاركات الشائعة من هذه المدونة

#ليه_طيب_اكسر_وراه_قله؟ج٢#الليله٦٠٨

صورة
#ليه_طيب_اكسر_وراه_قله؟ج٢ #الليله٦٠٨ اما بقى الحدوته التانيه فبتقولك ان زمان وبردو ايام الفراعنه كانت لما الانسان يموت بيكسروا وراه اناء من الفخار  يعنى هنا كانت عاده مرتبطه بالجنائز  وطبعا كلنا عارفين اهمية الموت و الحياه الابديه والكلام دا كله عند المصريين القدماء واظن انى لسه مخلصه سلسلة ايزيس وازوريس اللى بتحكى باستفاضه ف اهمية الدفن والليله دى  طب بردو ليه نكسر وراه حاجه فخار واللى رسيت ع القله لاننا بقينا نستخدم معادن وصينى واوانى تانيه حاليا  انما القله فهى اللى كانت مكمله حتى دخول التلاجه الايديال ال ٨ قدم لكل بيت نرجع لكسر القله الفكره انهم مش بس بيكسروا القله لاء وكمان بياخدوها ويدفنوها جنب قبر المرحوم طيب الله ثراه ... ودا ليه؟ علشان لما ترجع الكا يعنى (الروح) على بيته مره تانيه مره ماتأذيش اهل البيت اللى موجودين فيه دول كانوا بيعملوا الاكل ف البيت وياخدوه عند مكان المقبره وياهم وهناك ياكلوا وبعدين يكسروا الاوانى دى ويسيبوا الفخار الكسر هناك  واللى كانوا بيسموه الشِقف جمع شقفه لدرجة ان المتخصصين فى الآثار وهم بينقبوا لو لقوا ف مكان ما آنيه  فخاري...
قراءة المزيد

#هو_صحيح_الجوع_كافر_بس_مش_للدرجه_دى؟؟؟ج٢#الليله٦٥٠

صورة
#هو_صحيح_الجوع_كافر_بس_مش_للدرجه_دى؟؟؟ج٢ #الليله٦٥٠  زى ما قولنا كان الموسم الزراعي في شمال العراق اواخر عام ١٩١٧ سئ جداً ومطر قليل ومحصول ضعيف و بيقول محمد امين العمري  واللى كان ف الوقت ده ضابط اعاشة في الجيش السادس التركي ويعتبر شاهد عيان ع الفتره دى بيحكى ويقول : انه كتب تقرير للقائد خليل باشا وضح فيه الخطر اللي هيحصل في ولاية الموصل بسبب قلة الحبوب و انهم ضرورى يستعدوا ويجيبوا مؤن من اسطنبول و يلحقوا الدنيا قبل فوات الاوان   لكن خليل باشا كبر دماغه و مهتمش للتحذير ده وقال له  ان ولاية الموصل هي مستودع تموين العراق و هي مش  محتاجة تموين يجي لها من بره يا حبيبى احنا ناخد ومنديش بس زى ما توقع محمد امين العامرى بدأت المجاعه حصل ايه ف المجاعه ؟ هل تداركت الحكومه الغير واعيه سوء الحال ؟ ولا ايه اللى حصل؟ ازاى اتعامل اهل الموصل مع المجاعه؟ اقولكم اولا زى ما توقع ضابط الاعاشه بدأت المجاعة تستفحل وشملت الموصل والمنطقة الواسعة اللى ف الشمال منها لحد بحيرة ((وان)) وبدأت جموع من الجياع تهجر ديارها في الاناضول وتتوجه ناحية الموصل  ما الكل بقى فاكرها مليانه خير...
قراءة المزيد

#زئرده #الليله١٠١

صورة
#زئرده #الليله١٠١ الحدوته المرادى حقيقيه زى حكايه #الشنطه_المعجزه  اللى ده الرابط بتاعها https://www.facebook.com/102264164820545/posts/142331610813800/ بردو جيران ماما زمان ف الحى العريق والشارع الجميل (( ابن الرشيد )) اللى لا اتولدت فيه ولا عشت فيه بس حبيته من حب امى فيه ومن حكاياتها عنه  (( زئرده ))  دى واحده جارتهم وباين من اسمها -اللى طبعا مش اسمها الحقيقى - ولكن الناس كانوا مسمينها كده لانها كانت صغننه الحجم  تقريبا كان اسمها نوال بس اللى كانت الدنيا كلها بتناديها بيه كان زيئرده كانت متجوزه بس معهاش اولاد وجوزها كان بيشتغل ف بلد تانيه وبييجى يشوفها كل فتره  وعلشان كده كانت عايشه ف شقه ف بيت اهلها بس بتبات لوحدها ف شقتها كان الناس كلها عارفين انهم مرتاحين ماديا  وف ليله صيفيه حاره حين لم يكن يوجد لا تكييف ولا حتى مروحه فى هذا الزمان القديم  و حيث لا يوجد حل سوى ان تنهى ليلتك بدش بارد لتذهب للنوم متأخراً على ١١ونص ١٢ بالليل كده  بعد ساعه ولا ٢ اما المدينه كلها تغرق فى سبات عميق مفيش صاحى  كانت كالعاده بايته لوحدها وحست بحركه معاها ف اوضة ...
قراءة المزيد