#ليله_ف_عشق_الفول_بيصارو #الليله٢٣٩ #الجزء_الثالث_والاخير

#ليله_ف_عشق_الفول_بيصارو
#الليله٢٣٩
#الجزء_الثالث_والاخير

الليله بقت ليالى .... بس زى ما قال عبد الوهاب 

وعشق الفول مالوش اخر لكن عشق البصل فانى 
عشق البصل فانى 

وبمناسبه عشق الفول فى حكايه ظريفه عن الفول وعشق الفول من رأس المملكه المصريه الملك فاروق اللى كان بيحب الفول اوى خصوصا من ايد راجل من دمنهور بحيره اسمه على العاصى 

وعلى دا كان بيعمل كل يوم ٦ قدر  (جمع قدره ) من الفضه فول  مدمس ويبعتها للقصر اللى متواجد فيه الملك سواء المنتزه او القبه او عابدين يقابلهم طبيب بيطرى ف محطة القطر ويكشف عليهم ويقفل عليهم بالشمع الاحمر لحد ما يوصلوا القصر 

ولما الملك ربنا رزقه بولى عهده احمد فؤاد اهدى عم على للملك قدره دهب وزنها ٤٦٠ جرام دهب 
وهى حالياً موجوده دلوقتى ف مقتنيات متحف قصر المنتزه 

٣ - البصاره 

اما البصاره فبردو زى ما  ال (فا لا فيل) اللى اتحول لفلافل   

والفيل نفسه اتحول لفول

البيصورو : هى كمان الاكله اللى بنعملها بالفول المدشوش والخضره والبصل والتوم و اتحولت لبصاره
اكله مصريه عمرها الالاف السنين 

ومن ذكريات امى اللى حكتهالى انها بعد ما اتجوزت بابا ب اسبوع كده وف عز ما العرسان بيتدلعوا من اهاليهم واشى بط واشى حمام داخل بيتهم وميخرجش منه الا عضم
 
الا ويقوم سى منير ويقولها اعمليلى بصاره
ولما استغربت 
قالها ايه متعرفيش تعمليها ولا ايه ؟؟

وعلى وشه تعبيرات ذكى رستم وهو بيكلم نوال فى فيلم نهر الحب كده 

فقالت لاء بعرف 
وقامت عملتها ولما عملتها واكلها وشكر فيها 

قالها كنت بمتحنك 
لان اللى تعرف تعمل بصاره حلوه تبقى شاطره ف اى حاجه تانيه 

ومش عارفه تفكير الحاج الله يرحمه ولا فاهمه وجهة نظره 
يعنى هو سيادتك جاى تمتحنها بعد اسبوع من الجواز 

ولو فرضنا معرفتش هترجعها لاهلها تانى 

وتفسيرى بعد العمر الطويل اللى كنت بفكر فيه من ساعة ما سمعت الحكايه 
انه حب يريح بطنه من كتر اللحوم بتاعة العرسان ... ويديها اكل نباتى وصحى ومفيد

وطول عمرى من ساعة ما اتجوزت وانا نفسى جوزى يعملى اختبار البصاره ده 
بس هو عمره ما طلبها ولما عدى شوية وقت كتير بقيت اعملها كل فتره كده 

لحد ما عدت فتره كبيره معملتهاش وجيت مره افتكرتها وعملتها وصبيتها فى الاطباق زى ما مامتى الله يرحمها  علمتنى 

الا وييجى ابنى اللى كان صغير ف الوقت ده واتخض لما شافها 
وقالى ازاى عامله رز بلبن اخضر 

ولما قلت انها مش رز بلبن وقبل ما اوضح لقيته بيرفض يدوق وازى يدوق مهلبيه خضرا
وبيقول ف دماغه انى مجنونه لان مفيش ف الدنيا اكل اخضر 

ومن ساعتها بقيت باكلها هديه من صاحبتى اللى باكل من ايديها احلى بيصارو زى ما اجدادنا كانوا مسميينها 
وبمناسبة اجدادنا افتكرت الغنوه دى واتمنى حد يكملها لانى مش فاكره الباقى 

هى اغنيه سمعتها وانا طفله  من اللى اكبر و الحته دى بس اللى  افتكرتها و مش عارفه اكمل 

دخلت حاره 
من جوه حاره 
لقيت نصارى
بياكلوا بصاره 
خطفت لقمه 
جريوا ورايا 

وواضح ان الغنوه دى معموله ايام زمان 
وانها بتتكلم عن الصيام الكبير عند المسيحيين 
والعيل الرزل بطل الغنوه خطف منهم لقمه وهم بياكلوا 
فجريوا وراه 
حرامى ورزل وفقرى رايح يسرق منهم لقمة بصاره مش يخطف ورك فرخه 

باقى الغنوه مش عارفاه او مش فاكراه اللى فاكرها يكملهالى ف الكومنتات 

وزى ما اتكلمنا عن فوايد الفول الليله اللى فاتت نفسياً 
واد ايه مصدر للسعاده والراحه بيساعد المخ انه بيشجع او بيساعد  الموصلات العصبيه  والسيراتونين والدوبامين 

هنتكلم الليله عن اهميته  الصحيه ف منح المعادن والبروتينات 
 
١ - بروتينات  فيتامينات  و أملاح معدنية  زى  الحديد والفسفور

٢ ـ يقاوم التوتر والإجهاد 

٣ ـ  يحتوي على مركّبات كيمائيه  تقاوم سرطان   الفم

٤ ـ مفيد للقلب لانه  بيزيد  الكولسترول الصحى في الدم

٥ ـ  خفض ضغط الدم  للنساء في مرحلة سن اليأس

٦ ـ يحافظ على مستوى السكر في الدّم

٧ ـ يحتوي على مواد تقوّي مناعة الجسم ضّد الأمراض المختلفة

٨ ـ قشور الفول تكافح الإمساك 
٩ ـ لأزهار الفول خاصّية زيادة إدرار البول

يعنى نص الصيدليه موجوده فى طبق الفول
وياسلام لو زودت عليه بصلايه 
اصل بالنسبه لى عشق البصل  زى عشق  الفول  دايم 

#فى_عشق_امى_اللى_علمتنى_اعمل_الفول_وعلمتنى_احبه_الله_يرحمها
#ابتسام

تعليقات

إرسال تعليق

المشاركات الشائعة من هذه المدونة

#ليه_طيب_اكسر_وراه_قله؟ج٢#الليله٦٠٨

صورة
#ليه_طيب_اكسر_وراه_قله؟ج٢ #الليله٦٠٨ اما بقى الحدوته التانيه فبتقولك ان زمان وبردو ايام الفراعنه كانت لما الانسان يموت بيكسروا وراه اناء من الفخار  يعنى هنا كانت عاده مرتبطه بالجنائز  وطبعا كلنا عارفين اهمية الموت و الحياه الابديه والكلام دا كله عند المصريين القدماء واظن انى لسه مخلصه سلسلة ايزيس وازوريس اللى بتحكى باستفاضه ف اهمية الدفن والليله دى  طب بردو ليه نكسر وراه حاجه فخار واللى رسيت ع القله لاننا بقينا نستخدم معادن وصينى واوانى تانيه حاليا  انما القله فهى اللى كانت مكمله حتى دخول التلاجه الايديال ال ٨ قدم لكل بيت نرجع لكسر القله الفكره انهم مش بس بيكسروا القله لاء وكمان بياخدوها ويدفنوها جنب قبر المرحوم طيب الله ثراه ... ودا ليه؟ علشان لما ترجع الكا يعنى (الروح) على بيته مره تانيه مره ماتأذيش اهل البيت اللى موجودين فيه دول كانوا بيعملوا الاكل ف البيت وياخدوه عند مكان المقبره وياهم وهناك ياكلوا وبعدين يكسروا الاوانى دى ويسيبوا الفخار الكسر هناك  واللى كانوا بيسموه الشِقف جمع شقفه لدرجة ان المتخصصين فى الآثار وهم بينقبوا لو لقوا ف مكان ما آنيه  فخاري...
قراءة المزيد

#هو_صحيح_الجوع_كافر_بس_مش_للدرجه_دى؟؟؟ج٢#الليله٦٥٠

صورة
#هو_صحيح_الجوع_كافر_بس_مش_للدرجه_دى؟؟؟ج٢ #الليله٦٥٠  زى ما قولنا كان الموسم الزراعي في شمال العراق اواخر عام ١٩١٧ سئ جداً ومطر قليل ومحصول ضعيف و بيقول محمد امين العمري  واللى كان ف الوقت ده ضابط اعاشة في الجيش السادس التركي ويعتبر شاهد عيان ع الفتره دى بيحكى ويقول : انه كتب تقرير للقائد خليل باشا وضح فيه الخطر اللي هيحصل في ولاية الموصل بسبب قلة الحبوب و انهم ضرورى يستعدوا ويجيبوا مؤن من اسطنبول و يلحقوا الدنيا قبل فوات الاوان   لكن خليل باشا كبر دماغه و مهتمش للتحذير ده وقال له  ان ولاية الموصل هي مستودع تموين العراق و هي مش  محتاجة تموين يجي لها من بره يا حبيبى احنا ناخد ومنديش بس زى ما توقع محمد امين العامرى بدأت المجاعه حصل ايه ف المجاعه ؟ هل تداركت الحكومه الغير واعيه سوء الحال ؟ ولا ايه اللى حصل؟ ازاى اتعامل اهل الموصل مع المجاعه؟ اقولكم اولا زى ما توقع ضابط الاعاشه بدأت المجاعة تستفحل وشملت الموصل والمنطقة الواسعة اللى ف الشمال منها لحد بحيرة ((وان)) وبدأت جموع من الجياع تهجر ديارها في الاناضول وتتوجه ناحية الموصل  ما الكل بقى فاكرها مليانه خير...
قراءة المزيد

#زئرده #الليله١٠١

صورة
#زئرده #الليله١٠١ الحدوته المرادى حقيقيه زى حكايه #الشنطه_المعجزه  اللى ده الرابط بتاعها https://www.facebook.com/102264164820545/posts/142331610813800/ بردو جيران ماما زمان ف الحى العريق والشارع الجميل (( ابن الرشيد )) اللى لا اتولدت فيه ولا عشت فيه بس حبيته من حب امى فيه ومن حكاياتها عنه  (( زئرده ))  دى واحده جارتهم وباين من اسمها -اللى طبعا مش اسمها الحقيقى - ولكن الناس كانوا مسمينها كده لانها كانت صغننه الحجم  تقريبا كان اسمها نوال بس اللى كانت الدنيا كلها بتناديها بيه كان زيئرده كانت متجوزه بس معهاش اولاد وجوزها كان بيشتغل ف بلد تانيه وبييجى يشوفها كل فتره  وعلشان كده كانت عايشه ف شقه ف بيت اهلها بس بتبات لوحدها ف شقتها كان الناس كلها عارفين انهم مرتاحين ماديا  وف ليله صيفيه حاره حين لم يكن يوجد لا تكييف ولا حتى مروحه فى هذا الزمان القديم  و حيث لا يوجد حل سوى ان تنهى ليلتك بدش بارد لتذهب للنوم متأخراً على ١١ونص ١٢ بالليل كده  بعد ساعه ولا ٢ اما المدينه كلها تغرق فى سبات عميق مفيش صاحى  كانت كالعاده بايته لوحدها وحست بحركه معاها ف اوضة ...
قراءة المزيد