#هو_انت_على_راسك_ريشه #الليله٣٣١

#هو_انت_على_راسك_ريشه
#الليله٣٣١

الحكايه ملخبطه حبتين ولو دورنا على اصل المثل دا نلاقى له ٣ روايات 

وزى ما اتكلمنا الليله اللى فاتت عن اللي علي راسه بطحه 
وقلنا انها مش بطحة بمعنى جرح او تعويره ولكن البطحه هنا مجازيه مقصود بها غلطه او جريمه ماشى بيحاول يداريها زى البطحه اللى مفيش حاجه تداريها 

ماشى  وهو ف اى وقت حاسس ان جريمته هتتكشف علشان كده اول ما شيخ الجامع قال ان اللى سرق الفرخه على راسه ريشه من الفرخه 

البطحه النفسيه اللى عنده خلته يحط ايده على راسه ويكشف نفسه  مع ان منطقى ان السرقه كانت الليله اللى فاتت واكيد وهو جاى يصلى  هيكون اتوضى واكيد اى ريش جه على راسه من العشه ساعة السرقه وقع من ساعتها بس الريشه اوالبطحه النفسيه خلته يحسس على دماغه 

٢ - وتانى ايه معنى اللي علي راسه ريشه 
و نرجع لورا اوى لايام قدماء المصريين الريشه من زمان لها اهميه تاريخيه ودينيه من ايام الفراعنه لما كانت الالهه ماعت بيرمز لها بريشه  
طب اشمعنى الريشه فاكرين لم اتكلمنا عن العالم الاخر عن اجدادنا القدماء والحياه بعد الموت من وجهة نظرهم والحساب ف الاخره اللى بيبقى محاكمه رئيسها الاله ازوريس و يتوزن قلبه ف كفه فى ميزان مع الالهه ماعت وف الكفة التانيه ريشه 
بتحطها ف كفة ميزان الحساب ف الاخره ويوضع ف الكفه الاخري قلب المتوفي ولو الريشه ثقلت عن القلب يبقي كده هو انسان كويس وقلبه قلب خسايه 

ولو القلب هو اللي طب يبقي دا انسان قلبه مليان شر ويلقي لوحوش مفترسه لتعاقبه ف الاخره اللي هي مقابل النار عندنا 

طب دي اهمية الريشه زمان ... بس مالهاش علاقه اوي بالراس 

يمكن المقصود ريشه تانيه 

نشوف 
 
يلف الزمان ويدور ويأتي العهد الاسلامي وبنلاحظ ان الخلفاء كانوا بيحرصوا انهم يزينوا العمه بجوهره وريشه 

فاكرين مسلسلات رمضان الدينيه 

وخصوصا السلاطين العثمانيين 

هتلاقي تحت صور لبعضهم بالعمة والريشه 

وعلشان كده نشوف امتى بنستخدم المثل 
هل ف الحاله الاولى يعنى مذنب وخايف يتكشف يبقى لا لا ابدا مالهوش دعوه 

طب لها دعوه بالاخره والحساب بعد الموت بردو لاء

انما بنستخدم المثل ده لما نلاقى حد مغرور ... شايف نفسه على غيره وحاسس انه احسن من غيره 

علشان كده لما بتقول لحد انت علي راسك ريشه 

كأنك بتقوله انت منفوخ ومغرور وشايف نفسك علي 

ايه ؟؟؟

انت امير ولا سلطان ؟؟؟!!!

انت انسان عادي يعني مش علي راسك ريشه

المره الجايه هيكون الغاوى ينقط بطاقيته 

ونختار لليله اللى بعدها 

1- ابن بارم ديله 

2- هو انا مغسل ، وضامن جنه 

#حكايه_ورا_كل_مثل
#فاكر_نفسه_ابن_بارم_ديله 
#ابتسام

تعليقات

إرسال تعليق

المشاركات الشائعة من هذه المدونة

#ليه_طيب_اكسر_وراه_قله؟ج٢#الليله٦٠٨

صورة
#ليه_طيب_اكسر_وراه_قله؟ج٢ #الليله٦٠٨ اما بقى الحدوته التانيه فبتقولك ان زمان وبردو ايام الفراعنه كانت لما الانسان يموت بيكسروا وراه اناء من الفخار  يعنى هنا كانت عاده مرتبطه بالجنائز  وطبعا كلنا عارفين اهمية الموت و الحياه الابديه والكلام دا كله عند المصريين القدماء واظن انى لسه مخلصه سلسلة ايزيس وازوريس اللى بتحكى باستفاضه ف اهمية الدفن والليله دى  طب بردو ليه نكسر وراه حاجه فخار واللى رسيت ع القله لاننا بقينا نستخدم معادن وصينى واوانى تانيه حاليا  انما القله فهى اللى كانت مكمله حتى دخول التلاجه الايديال ال ٨ قدم لكل بيت نرجع لكسر القله الفكره انهم مش بس بيكسروا القله لاء وكمان بياخدوها ويدفنوها جنب قبر المرحوم طيب الله ثراه ... ودا ليه؟ علشان لما ترجع الكا يعنى (الروح) على بيته مره تانيه مره ماتأذيش اهل البيت اللى موجودين فيه دول كانوا بيعملوا الاكل ف البيت وياخدوه عند مكان المقبره وياهم وهناك ياكلوا وبعدين يكسروا الاوانى دى ويسيبوا الفخار الكسر هناك  واللى كانوا بيسموه الشِقف جمع شقفه لدرجة ان المتخصصين فى الآثار وهم بينقبوا لو لقوا ف مكان ما آنيه  فخاري...
قراءة المزيد

#هو_صحيح_الجوع_كافر_بس_مش_للدرجه_دى؟؟؟ج٢#الليله٦٥٠

صورة
#هو_صحيح_الجوع_كافر_بس_مش_للدرجه_دى؟؟؟ج٢ #الليله٦٥٠  زى ما قولنا كان الموسم الزراعي في شمال العراق اواخر عام ١٩١٧ سئ جداً ومطر قليل ومحصول ضعيف و بيقول محمد امين العمري  واللى كان ف الوقت ده ضابط اعاشة في الجيش السادس التركي ويعتبر شاهد عيان ع الفتره دى بيحكى ويقول : انه كتب تقرير للقائد خليل باشا وضح فيه الخطر اللي هيحصل في ولاية الموصل بسبب قلة الحبوب و انهم ضرورى يستعدوا ويجيبوا مؤن من اسطنبول و يلحقوا الدنيا قبل فوات الاوان   لكن خليل باشا كبر دماغه و مهتمش للتحذير ده وقال له  ان ولاية الموصل هي مستودع تموين العراق و هي مش  محتاجة تموين يجي لها من بره يا حبيبى احنا ناخد ومنديش بس زى ما توقع محمد امين العامرى بدأت المجاعه حصل ايه ف المجاعه ؟ هل تداركت الحكومه الغير واعيه سوء الحال ؟ ولا ايه اللى حصل؟ ازاى اتعامل اهل الموصل مع المجاعه؟ اقولكم اولا زى ما توقع ضابط الاعاشه بدأت المجاعة تستفحل وشملت الموصل والمنطقة الواسعة اللى ف الشمال منها لحد بحيرة ((وان)) وبدأت جموع من الجياع تهجر ديارها في الاناضول وتتوجه ناحية الموصل  ما الكل بقى فاكرها مليانه خير...
قراءة المزيد

#زئرده #الليله١٠١

صورة
#زئرده #الليله١٠١ الحدوته المرادى حقيقيه زى حكايه #الشنطه_المعجزه  اللى ده الرابط بتاعها https://www.facebook.com/102264164820545/posts/142331610813800/ بردو جيران ماما زمان ف الحى العريق والشارع الجميل (( ابن الرشيد )) اللى لا اتولدت فيه ولا عشت فيه بس حبيته من حب امى فيه ومن حكاياتها عنه  (( زئرده ))  دى واحده جارتهم وباين من اسمها -اللى طبعا مش اسمها الحقيقى - ولكن الناس كانوا مسمينها كده لانها كانت صغننه الحجم  تقريبا كان اسمها نوال بس اللى كانت الدنيا كلها بتناديها بيه كان زيئرده كانت متجوزه بس معهاش اولاد وجوزها كان بيشتغل ف بلد تانيه وبييجى يشوفها كل فتره  وعلشان كده كانت عايشه ف شقه ف بيت اهلها بس بتبات لوحدها ف شقتها كان الناس كلها عارفين انهم مرتاحين ماديا  وف ليله صيفيه حاره حين لم يكن يوجد لا تكييف ولا حتى مروحه فى هذا الزمان القديم  و حيث لا يوجد حل سوى ان تنهى ليلتك بدش بارد لتذهب للنوم متأخراً على ١١ونص ١٢ بالليل كده  بعد ساعه ولا ٢ اما المدينه كلها تغرق فى سبات عميق مفيش صاحى  كانت كالعاده بايته لوحدها وحست بحركه معاها ف اوضة ...
قراءة المزيد