#الغاوي_ينقط_بطاقيته #الليله٣٣٢

#الغاوي_ينقط_بطاقيته 
#الليله٣٣٢

طب اولا نشرح معاني المفردات بعد اذن صديقاتي وزميلاتى من كتيبه اللغه العربيه 

الغاوي : هو الشخص المولع بالشئ العاشق له

ينقط : دي كلمه عاميه مصريه يعني يعطي كهبه ممكن 
نستخدمها ف الولادات او الافراح او عند الغوازي😉

بطاقيته :  ودي كلنا عارفينها بس خلوا بالكوا من الاستخدام 

زمان كان لازم الراجل بيغطي راسه كنوع من الاحترام 

احترام .. مش حجاب 😅

احترام يلبس بقي طربوش 

طاقية 👲

عِمه 👳

لاسه

برنيطه حتي🤠

فاكرين اما كان الفلاح فى الافلام القديمه بتاعة الاربعينات وما قبلها زى فيلم زينب كده لما كان الغنى والفقير بيلبس طاقيه ولو فقير وطاقيته مخرمه ومقطوعه بس لابس طاقيه ودا للفلاحين او زى ما بنقول البحاروه 

اما الصعايده فكان لازم يلبس فوق الطاقيه العِمه وممكن معاها اللاسه او الشال او التلفيحه 

المهم ان الطاقيه دى شئ اساسى 

ولما ناخد رحله عبر مركب الزمن ونروح لايام اجدادنا هتلاقى ان الرأس كانت ف الغالب مغطاه و لو حتى  بشعر مستعار باروكه يعنى 

المهم انه مش مستغنى عن غطاء رأسه 
ولحد دلوقتى لو رحت اغلب البلاد العربيه هتلاقى الشال الفلسطينى والغُتره السعودى وغيرهم 

وطبعا الطربوش ودا له حكايه مسيرى احكيها 
ولما بدأ ينقرض هذا الطربوش كان من الخمسينات وما بعدها 

وان كان اللى بدأ بده الشباب كموضه وروشنه وكدا اما الاكبر سناً فكانوا متمسكين به 

حتي افلام زمان كانت بتحصل فيها مشاهد ان مثلا ممنوع يدخل الراجل المحكمه او الكنيسه  كده براسه مكشوفه من غير غطاء للرأس 

افتكر في فيلم الاستاذه فاطمه اما كان عبد الفتاح القصري لازم يدخل المحكمه والحاجب منعه الا بغطاء للرأس

واسماعيل ياسين ف فيلم اسماعيل يس في السجن اما كان محمد فرج بيقوله مسيرك تقع تحت ايدى 

القصد ..

فالطاقيه دي حاجه مهمه والراجل من غير طاقيته 

بينتقص من هيبته واهميته 

ولذلك ف الغاوي ينقط بطاقيته 

دليل علي انه سيبذل الغالي والثمين  لانه غاوي وعاشق ومدلوق ع الاخر 

وعلشان غاوى يضحى بكل غالى ونفيس يهزق نفسه ويهين كرامته 

ولو المقصود ان لو مفلس و ماحيلتوش الا طاقيته هينقط بيها ليه ؟؟؟
لانه غاوى 

ولو الغزيه او المعشوقه طلبت منه طاقيته وعلى قد غلاوتها الا انه مستعد ينقط بيها لو طلبتها 
ليه؟؟؟
شاطر لانه غاوى 
والغاااااااااااوي 

علي راي صباح ف الاغنيه 

من الاخر ممكن تدى وتضحى  باللى مينفعش حد يضحى به 

ممكن يكون وقتك او فلوسك او صحتك او حتى كرامتك وهيبتك ومكانتك الاجتماعيه بس علشان غاوى هتوهبه للى بتحبه 

متبقاش غاوى 
متضحيش بالغالى الا لو متأكد ان اللى بتضحى علشانه يستاهل والا يبقى بتهين نفسك 
مش بس قدام اللى بتحبه لاء دا كمان قدام الناس وقدام نفسك 

#حكايه_ورا_كل_مثل 
#فين_طاقيتك_ياواد_نقطت_بيها_ياما
#ابتسام

تعليقات

إرسال تعليق

المشاركات الشائعة من هذه المدونة

#ليه_طيب_اكسر_وراه_قله؟ج٢#الليله٦٠٨

صورة
#ليه_طيب_اكسر_وراه_قله؟ج٢ #الليله٦٠٨ اما بقى الحدوته التانيه فبتقولك ان زمان وبردو ايام الفراعنه كانت لما الانسان يموت بيكسروا وراه اناء من الفخار  يعنى هنا كانت عاده مرتبطه بالجنائز  وطبعا كلنا عارفين اهمية الموت و الحياه الابديه والكلام دا كله عند المصريين القدماء واظن انى لسه مخلصه سلسلة ايزيس وازوريس اللى بتحكى باستفاضه ف اهمية الدفن والليله دى  طب بردو ليه نكسر وراه حاجه فخار واللى رسيت ع القله لاننا بقينا نستخدم معادن وصينى واوانى تانيه حاليا  انما القله فهى اللى كانت مكمله حتى دخول التلاجه الايديال ال ٨ قدم لكل بيت نرجع لكسر القله الفكره انهم مش بس بيكسروا القله لاء وكمان بياخدوها ويدفنوها جنب قبر المرحوم طيب الله ثراه ... ودا ليه؟ علشان لما ترجع الكا يعنى (الروح) على بيته مره تانيه مره ماتأذيش اهل البيت اللى موجودين فيه دول كانوا بيعملوا الاكل ف البيت وياخدوه عند مكان المقبره وياهم وهناك ياكلوا وبعدين يكسروا الاوانى دى ويسيبوا الفخار الكسر هناك  واللى كانوا بيسموه الشِقف جمع شقفه لدرجة ان المتخصصين فى الآثار وهم بينقبوا لو لقوا ف مكان ما آنيه  فخاري...
قراءة المزيد

#هو_صحيح_الجوع_كافر_بس_مش_للدرجه_دى؟؟؟ج٢#الليله٦٥٠

صورة
#هو_صحيح_الجوع_كافر_بس_مش_للدرجه_دى؟؟؟ج٢ #الليله٦٥٠  زى ما قولنا كان الموسم الزراعي في شمال العراق اواخر عام ١٩١٧ سئ جداً ومطر قليل ومحصول ضعيف و بيقول محمد امين العمري  واللى كان ف الوقت ده ضابط اعاشة في الجيش السادس التركي ويعتبر شاهد عيان ع الفتره دى بيحكى ويقول : انه كتب تقرير للقائد خليل باشا وضح فيه الخطر اللي هيحصل في ولاية الموصل بسبب قلة الحبوب و انهم ضرورى يستعدوا ويجيبوا مؤن من اسطنبول و يلحقوا الدنيا قبل فوات الاوان   لكن خليل باشا كبر دماغه و مهتمش للتحذير ده وقال له  ان ولاية الموصل هي مستودع تموين العراق و هي مش  محتاجة تموين يجي لها من بره يا حبيبى احنا ناخد ومنديش بس زى ما توقع محمد امين العامرى بدأت المجاعه حصل ايه ف المجاعه ؟ هل تداركت الحكومه الغير واعيه سوء الحال ؟ ولا ايه اللى حصل؟ ازاى اتعامل اهل الموصل مع المجاعه؟ اقولكم اولا زى ما توقع ضابط الاعاشه بدأت المجاعة تستفحل وشملت الموصل والمنطقة الواسعة اللى ف الشمال منها لحد بحيرة ((وان)) وبدأت جموع من الجياع تهجر ديارها في الاناضول وتتوجه ناحية الموصل  ما الكل بقى فاكرها مليانه خير...
قراءة المزيد

#زئرده #الليله١٠١

صورة
#زئرده #الليله١٠١ الحدوته المرادى حقيقيه زى حكايه #الشنطه_المعجزه  اللى ده الرابط بتاعها https://www.facebook.com/102264164820545/posts/142331610813800/ بردو جيران ماما زمان ف الحى العريق والشارع الجميل (( ابن الرشيد )) اللى لا اتولدت فيه ولا عشت فيه بس حبيته من حب امى فيه ومن حكاياتها عنه  (( زئرده ))  دى واحده جارتهم وباين من اسمها -اللى طبعا مش اسمها الحقيقى - ولكن الناس كانوا مسمينها كده لانها كانت صغننه الحجم  تقريبا كان اسمها نوال بس اللى كانت الدنيا كلها بتناديها بيه كان زيئرده كانت متجوزه بس معهاش اولاد وجوزها كان بيشتغل ف بلد تانيه وبييجى يشوفها كل فتره  وعلشان كده كانت عايشه ف شقه ف بيت اهلها بس بتبات لوحدها ف شقتها كان الناس كلها عارفين انهم مرتاحين ماديا  وف ليله صيفيه حاره حين لم يكن يوجد لا تكييف ولا حتى مروحه فى هذا الزمان القديم  و حيث لا يوجد حل سوى ان تنهى ليلتك بدش بارد لتذهب للنوم متأخراً على ١١ونص ١٢ بالليل كده  بعد ساعه ولا ٢ اما المدينه كلها تغرق فى سبات عميق مفيش صاحى  كانت كالعاده بايته لوحدها وحست بحركه معاها ف اوضة ...
قراءة المزيد