#هو_انت_فاكر_نفسك_ابن_بارم_ديله #الليله٣٣٣

#هو_انت_فاكر_نفسك_ابن_بارم_ديله 
#الليله٣٣٣

طب، مبدايا المثل ده صعب شويه 

لان بردو له ٣ حكايات او يعنى له ٣ تفسيرات لاصل الحكايه او تفسير المثل يعنى 

١ - الحكايه الاولى المفبركه 

الحكايه دى  انتشرت ع الفيسبوك مؤخرا فى بوست بيتكلم  عن اصل بعض الكلمات او الامثال المتداوله

ان كان في واحد ف مصر اسمه بارون ديلون و بالتالي ف ابنه ابن البارون ديلون بقي ابن بارم ديله 

مع  التحريفات المعتاده من المصريين 

بس مين البارون ديلون مفيش حد اتكلم ف التاريخ المصري عن حد اسمه كده 

وبالتالي هو اصلا مش موجود علشان يتشهر ابنه لدرجة انه يتقال اسم ابنه ف الامثال 

يبقى دى فشره منتشره

شفت زيها حواديت يمكن تقنعك الحكايه وتستغرب التانيه والتالته بس تحس بعد الرابعه و الخامسه انها مؤلفه والحكايات اللى بتكلم عنها حكاية ام لطفى اللى بتنور وتطفى وام ترتر وام تيتى تحس ان فى حد قاعد يخاد الكلمات المنتشره والغريب ان اصل كل الشخصيات دى ف القصه دى جاى من اسكندريه ... مش عارفه بس لما فجأه تلاقى قصة منتشره ف كل حته بنفس الصيغه لا فيها زياده ولا نقص وبالتالى حسيت ان الموضوع مفبرك 
واهه اللى بيألف اختار المرادى اسم المفروض انه يكون مشهور اصل لقب بارون دا لقب كبير فلو فى بارون جه وعاش ف مصر وحتى ابنه اتشهر حيبقى ازاى محدش عارفه هو شخصيا 

٢ - الاله ست او سث

ودا  الاحتمال التاني ودا ملخفن وملفلف كده 

يقولك ان الاله ست ف الاساطير الفرعونيه كان بيرمز له بحيوان شبه الكلب كده او الذئب وان ديله مرفوع 

ومبروم كده زي ديل الكلب فبردو يبقي انك فاكر 

نفسك مين يعني ابن الاله ست 

بس مش منطقي ولا مقنع خصوصا ان الحكايه لافه 

وحاولت اختصرها وابسطها علشان نطلع بالصوره دي كده 

٣ - ودي بقي حكاها الجبرتي وكمان ذكرها الدكتور جمال كمال فى كتابه "العسكريين الأرمن" وان الراجل ده كان عايش  عام ١٦٩٠م

وبالتالي الموضوع له 

مصداقيه وثقل تاريخي يؤيده 

الحكايه ان ايام الحكم العثماني لمصر كان في امير ف مصر كان مملوك واسمه (سليمان بك الارمني ) واللي كان مشهور باسم بارم ديله متعرفش اللقب ده ايه مناسبته بس اللى حصل ان دا كان لقبه 

كان علي رتبه صنجق زي لواء دلوقتي و رئيس اقليم 
او زى ما تقول كده محافظ 
وكان حاجه عظمه وله شنه ورنه وماسك كشوفات المنوفيه والغربيه وعند بقى فلوس وخدم وحاشيه وكان حاجه ايمه وسيما ووظيفه ميرى وعلشان الولد سر ابيه 
وعلشان ابن الوز عوام 
وعلشان كفايه كده امثال والهدف وصل 
ف المهم ان سليمان بك خلف ولد وسماه عثمان جلبى 
وعثمان بك ده ورث من ابوه مكانته وصفاته وزود عليهم كمان الثقافه والشجاعه وبالتالى بقى حاجه اخر عظمه وبالتالى 

يبقي  عثمان جلبى ابن بارم ديله ده هو بطل حدوتنا ( ابن بارم ديله )

لان بعد شهرة والده اتشهر الشاب الجامد عثمان جلبي 

وورث عثمان الصنجقه 

وبيحكي عنه الجبرتي انه كان : جميلا ً... وجيهاً ... 

حاذقاً ( ذكي يعني )

بيحب الشعر وفارس شجاع

وطبعا زي ما كلنا عارفين عن تاريخ المماليك انه كان 

كله صراعات 

وف سنه ١٧١٥ حصل قتال مع محمد بك قطامش 

و هرب عثمان جلبى  واستخبا واتنهب بيته وعدي ٥ سنين وهو مختفي لحد ما مات وهو عنده ٣٧ 
ف عز شبابه يا ضنايا 

ومن كتر ما كان غني وذكي ومثقف و شجاع ومقدام واتخطف كده

بقي الناس بتضرب به المثل 

ولما حد يكون شايف نفسه يقولوله ليه يعني 

هو انت ابن بارم ديله 
بمعنى يعنى متشوفش نفسك اوى مهما هتوصل مش هتكون زى ابن بارم ديله اللى كان ف ايده كل حاجه وانتهى النهايه دى فمتتمرعش اوى وتعمل نفسك ابن بارم ديله 

رحم الله بارم ديله وابن بارم ديله 

#حكايه_ورا_كل_مثل 
#ابتسام

تعليقات

إرسال تعليق

المشاركات الشائعة من هذه المدونة

#ليه_طيب_اكسر_وراه_قله؟ج٢#الليله٦٠٨

صورة
#ليه_طيب_اكسر_وراه_قله؟ج٢ #الليله٦٠٨ اما بقى الحدوته التانيه فبتقولك ان زمان وبردو ايام الفراعنه كانت لما الانسان يموت بيكسروا وراه اناء من الفخار  يعنى هنا كانت عاده مرتبطه بالجنائز  وطبعا كلنا عارفين اهمية الموت و الحياه الابديه والكلام دا كله عند المصريين القدماء واظن انى لسه مخلصه سلسلة ايزيس وازوريس اللى بتحكى باستفاضه ف اهمية الدفن والليله دى  طب بردو ليه نكسر وراه حاجه فخار واللى رسيت ع القله لاننا بقينا نستخدم معادن وصينى واوانى تانيه حاليا  انما القله فهى اللى كانت مكمله حتى دخول التلاجه الايديال ال ٨ قدم لكل بيت نرجع لكسر القله الفكره انهم مش بس بيكسروا القله لاء وكمان بياخدوها ويدفنوها جنب قبر المرحوم طيب الله ثراه ... ودا ليه؟ علشان لما ترجع الكا يعنى (الروح) على بيته مره تانيه مره ماتأذيش اهل البيت اللى موجودين فيه دول كانوا بيعملوا الاكل ف البيت وياخدوه عند مكان المقبره وياهم وهناك ياكلوا وبعدين يكسروا الاوانى دى ويسيبوا الفخار الكسر هناك  واللى كانوا بيسموه الشِقف جمع شقفه لدرجة ان المتخصصين فى الآثار وهم بينقبوا لو لقوا ف مكان ما آنيه  فخاري...
قراءة المزيد

#هو_صحيح_الجوع_كافر_بس_مش_للدرجه_دى؟؟؟ج٢#الليله٦٥٠

صورة
#هو_صحيح_الجوع_كافر_بس_مش_للدرجه_دى؟؟؟ج٢ #الليله٦٥٠  زى ما قولنا كان الموسم الزراعي في شمال العراق اواخر عام ١٩١٧ سئ جداً ومطر قليل ومحصول ضعيف و بيقول محمد امين العمري  واللى كان ف الوقت ده ضابط اعاشة في الجيش السادس التركي ويعتبر شاهد عيان ع الفتره دى بيحكى ويقول : انه كتب تقرير للقائد خليل باشا وضح فيه الخطر اللي هيحصل في ولاية الموصل بسبب قلة الحبوب و انهم ضرورى يستعدوا ويجيبوا مؤن من اسطنبول و يلحقوا الدنيا قبل فوات الاوان   لكن خليل باشا كبر دماغه و مهتمش للتحذير ده وقال له  ان ولاية الموصل هي مستودع تموين العراق و هي مش  محتاجة تموين يجي لها من بره يا حبيبى احنا ناخد ومنديش بس زى ما توقع محمد امين العامرى بدأت المجاعه حصل ايه ف المجاعه ؟ هل تداركت الحكومه الغير واعيه سوء الحال ؟ ولا ايه اللى حصل؟ ازاى اتعامل اهل الموصل مع المجاعه؟ اقولكم اولا زى ما توقع ضابط الاعاشه بدأت المجاعة تستفحل وشملت الموصل والمنطقة الواسعة اللى ف الشمال منها لحد بحيرة ((وان)) وبدأت جموع من الجياع تهجر ديارها في الاناضول وتتوجه ناحية الموصل  ما الكل بقى فاكرها مليانه خير...
قراءة المزيد

#زئرده #الليله١٠١

صورة
#زئرده #الليله١٠١ الحدوته المرادى حقيقيه زى حكايه #الشنطه_المعجزه  اللى ده الرابط بتاعها https://www.facebook.com/102264164820545/posts/142331610813800/ بردو جيران ماما زمان ف الحى العريق والشارع الجميل (( ابن الرشيد )) اللى لا اتولدت فيه ولا عشت فيه بس حبيته من حب امى فيه ومن حكاياتها عنه  (( زئرده ))  دى واحده جارتهم وباين من اسمها -اللى طبعا مش اسمها الحقيقى - ولكن الناس كانوا مسمينها كده لانها كانت صغننه الحجم  تقريبا كان اسمها نوال بس اللى كانت الدنيا كلها بتناديها بيه كان زيئرده كانت متجوزه بس معهاش اولاد وجوزها كان بيشتغل ف بلد تانيه وبييجى يشوفها كل فتره  وعلشان كده كانت عايشه ف شقه ف بيت اهلها بس بتبات لوحدها ف شقتها كان الناس كلها عارفين انهم مرتاحين ماديا  وف ليله صيفيه حاره حين لم يكن يوجد لا تكييف ولا حتى مروحه فى هذا الزمان القديم  و حيث لا يوجد حل سوى ان تنهى ليلتك بدش بارد لتذهب للنوم متأخراً على ١١ونص ١٢ بالليل كده  بعد ساعه ولا ٢ اما المدينه كلها تغرق فى سبات عميق مفيش صاحى  كانت كالعاده بايته لوحدها وحست بحركه معاها ف اوضة ...
قراءة المزيد