#كداب_كدب_الابل #الليله٣٣٥

#كداب_كدب_الابل

#الليله٣٣٥

الابل مش كدابه 

دايماً مظلومه ومتاخده ف الرجلين اونطه كده 

طب بالذمه فى جمل كدب على حد فيكم 

طب حد سأل جمل على حاجه وماقالوش الحقيقه 

ليه كده الاوشاعات على المعلم سفينه الصحراء المحترم 

كل الحكايه انها مبتعرفش تقعد ساكته كده وقافله بقها 

لااااااء 

فهمتوا غلط مش بتنم ولا بترغى 

وبمناسبة كلمة ترغى  بس حقيقه القصه بتاعة الرغى دى طلعت حكايه🤔 

اقولها بعدين لان الموضوع حلو ويستاهل اننا نرغى فيه 

بس نرجع لموضوع الجمل وهو ان الجمال من طبعها انها بتحب تحرك فمها او تلوك كده  

بفمها اللي بنقول عليها بتتلمض يعني وتحرك شفايفها وهي بؤها فاضي 

اللي بيحصل ان اللي يشوفها يقول دي بتاكل وبما انهم بيكونوا ف الصحرا احيانا منتشرين بيدورو علي الاكل والكلاء لحيوانتهم

فالرعاه بتوع الجمال  يبقوا عنيهم هتخرج على شوية اكل لحيواناتهم فيلاقوا الجمل باشا ده كانه بيمضغ كده 

فيروحوا عنده جرى يدوروا حواليه بياكل ايه؟؟  

يلاقوا الدنيا فاضيه 

ومن غيظهم منه قالوا بيكدب 

وهو يا حبيبي بيلعب بقه ع الفاضي فكرت انه ممكن يكون ساعتها بيجتر اصل الجمل يعنى بيجيب الاكل من بعد ما يلف لفته من معدته الاولى للمعده التانيه وبكده بيرجع للفم يمضغه علشان يرجعه للمعده ...  اه المعده الثالثه اللى منها للامعاء 

اصل ابو صفوان فيه اوبشن ٣ معده و٢ امعاء 

شفت المعجزه ٢ امعاء 😳

ايه مش دى المعجزه🤔 بتقولوا الاتنين امعاء دول  موجودين عادى ف الاوبشن البشرى بتاعنا 😒

اه معلش ننبهر من الاول تانى☺

٣ معده دول بتوع سفينه😳 

المهم بقى اللى يشوفه وهو بيمضغ يقولك دا بياكل وان هو لقى ف الارض الفاضيه اللى واقفين فيها دى شوية عشب 

بس لما يقرب ياخد مقلب و يلاقى ابو ايوب مفيش قدامه اكل ولا عشب فيفتكره بيضحك عليه وبيغزّله و من الاخر يفتكره بيكدب 

بقي كده يبقي كداب بالذمه ؟؟؟

حبيبي مظلوم طول عمره 

العرب على اد ما بيطلعوا عليه اشاعات انه كداب وكده بس والله بيحبوه من كتر ما بيحبوه سموه كذا اسم 

تعرفوا بيقولوا عليه :

ابو ايوب ، ابو صفوان ، البعير ، الابل 

و الجمل: الذكر 

و الناقة:  الأُنثى المودام يعنى 

دهامج: يعنى الجمل ابو سنامين  

ضائل: الذكر القوي

حفض: اللى بيحمل الأمتعة.

 اما النونو بتاعه فاسمه 

قعود  (الذكر) 

بكرة  (الأنثى)

ومن اسامى النونو كل ما بيكبر بيغيروا اسمه 

الحوار. مخلول. مفرود. الحِق. جِذع. ثني. رباع. سداس. ابن لبون

ربنا ذكره ف القرآن كتير 

 

و قالنا تحديدا 

 

( أَفَلا يَنْظُرُونَ إِلَى الإِبِلِ كَيْفَ خُلِقَتْ )

سورة الغاشيه(17)

دا خلاني استغل الموضوع النهارده واطقس حواليه

وانفذ امر الله بالنظر فيه 

واشمعني ده من الحيوانات اللي ربنا سبحانه يذكره وسط ذِكرة تعالى للمعجزات الضخمه اللى هى  الارض والجبال والسماء الا لو له ميزه عن غيره من الحيوانات 

ولقيت شوية معلومات حلوه

١ - زي مثلا انه بيبكي لما ييجوا يدبحوه علشان كده

 ساعات بيغطوا وشه علشان ميشوفوش، دموعه

يعنى صعبان عليهم 

٢ - الجمل، بيغير علي حريمه ولو جة ذكر جديد ف القطيع ممكن يتقاتلوا الا لو فصل بينهم صاحبهم

٣ - ذاكرته قويه ومبينساش، ودا ياخدنا لرقم ٤

٤ - منتقم قولنا مبينساش، علشان كده مبينساش الاسيه 

اه هو حمال الاسيه وظالمينك حبايبى وبس دا مش بينسى الاسيه زى فايزه احمد 

ودا يخليك تخلي بالك لو ظروفك خلتك تتعامل معاه

 مستغباش معاه علشان ميستغباش عليك بعد كده 

ودا بيشجعنا اننا نروح لحكايه عنه مع الانتقام

 

بس مش هاقولها دلوقتي علشان مطولش اوي 

وف الاخر ظلموه وقالوا عليه كداب وهو برئ

وهي الجمال غلبانه بتلعب بؤها وشفايفها ع الفاضي 

اه مده الحمل ف انثاه حوالي سنه تزيد كام يوم او تنقص 

ساعات بتجيب توائم بس قليل،  بتولد ف عمرها 

حوالي ٦ مرات 

متوسط عمره ٤٠ ل ٤٥ سنه 

طبعا دا غير انه ممكن يعيش بالشهرين من غير ميه 

وانه عنده خزانين ميه ممكن يحوشوا ييجي ١٣٠ لتر ميه 

والسنام ممكن يخزن ٤٥ ك دهون ممكن يحولها لاكل 

وميه

دا غير ال ٣ امعيه جمع معده اللى قلنا عليهم 

وهنحكى حكيات كتيره فتحها علينا الجمل 

زى موضوع الرغى 

وزى الحيوانات اللى عندها ٣ معدات او ٤ 

وزى ما حضرتك مروش نفسك وجايب نضارة شمس وحركات احب اقولك ان ابو ايوب هو كمان عنده نظاره شمس ربنا مديهاله وهى انه عنده جفن ثالث بينزله على العين علشان يقلل من تأثير اشعة الشمس اما تكون حاميه دا غير الرموش اللى ادوار ادور اجدع من رموش سعاد حسنى ف افلام الابيض والاسود

وبكده خلصت حكايه مثل الليله وشوية تفاصيل مقدرتش اعدى على الجمل من غير ما اقولها 

وفى النهايه فى حاجات مرضيتش اتكلم فيها دلوقتى زى المعدات ال٣ او ٤ عند حيوانات تانيه 

وزى موضوع الرغى 

 المواضيع دى وغيرها كتير هتكون حواديت الليالى اللى جايه واللى بعدها 

بس شجعونى كده بكومنت وشير 

#حكايه_ورا_كل_مثل

#البعير_هلك 

#قلبه_قاسي_اه_بس_مبيكديش

#يخليك_تخلى_فقر_لغوى🙄

#ابتسام