#لا_غدر_زى_غدر_البحر_ولا_حقد_زى_حقد_الجمل #الليه٣٣٧ #الجمل_الغلاوي

#لا_غدر_زى_غدر_البحر_ولا_حقد_زى_حقد_الجمل 
#الليه٣٣٧
#الجمل_الغلاوي

يمكن المثل دا مش منتشر اوى اللى بها نحطه ف سلسله الامثال 

بس الحكايه اللى بتتحكى وتنطبق اوى عليه خلتنى اذكره 

وزى ما اتكلمنا قبل كده عن الجمل 

واد ايه هو حيوان متميز وفيه صفات كتيره حلوه لدرجة ان ربنا سبحانه وتعالى ذكر اسمه بين الامثله الضخمه زى الارض والسما والجبال ودا حكيناه ف حدوتة المثل اللى هسيب الرابط بتاعه ف الكومنتات تحت👇 كداب كدب الابل

وعلشان البوست المره اللى فاتت كان طويل فمردتش اطوله بكل المعلومات اللى عاوزه احكيها بس ممكن يتقسم لاكتر من موضوع
ونكمل ف صفات ابو حفص ...الشهير ب ابو ايوب .. يووه  قصدى الإبل 

وبتتميز الابل بذاكرة قوية  تقدر  تعرف الأماكن التي نشأت فيها

وكمان تقدر تفتكر المكان اللى شربت منه اول مرة و ترجع له لو عطشت 

كمان بتساعد البدو على انهم  يعرفوا الطريق اللى عاوزين يوصلوله لو تاهو في الصحرا هم ينسوا بس هى فاكره 

ومن ذكائها كمان أنها بتعرف حركات صاحبها والإشارات الحركات بتاعته وتقدر تفسرها زعلان او مبسوط 

ومع اننا خلُصنا الى ان الجمل مظلوم ومش بيكدب 

بس من الصفات اللى اتكلمنا عليها ف الجمل هى الغل والحقد وانه ما بينساش الاسيه 
 من أسباب حقد الجمل على الإنسان سوء المعاملة والضرب المستمر بقوة فيتحول الى حالة هستيرية ويصبح هدفه الوحيد الإنتقام من اللى ضربه ويفضل يراقب ويتحين الفرصة 

ملاك الإبل عارفينه وفاهمين حقده الكثير وخصوصاً في وقت الهياج لانهم عارفين ان قلبه اسود

وبالتالى بسبب الذاكره القويه و بسبب انه غلاوى وحقود ومش بينسى الاسيه 
فهنحكى الحكايه الليله 

و الحكايه نقلا عن احد البدو اللي طول عمره بيربي ابل

بيحكى وبيقول  فى يوم من ذات الايام .... الجمل بتاعه عصبه اوي فضربه جامد واتغابى عليه 

وعلشان هو عارف غله وسواد قلبه خده باعه ف نفس اليوم اه ما هو ياروح مش بعدك روح 

وعدى زمن ونسى الجمل وحكايته 
بس بعد فتره كبيره كان مسافر ونزل علي قيبله 

وعلي حظه شاف الجمل عندهم بعد ما الجمل اتنقل بين ايد لايد عند اكتر من مشتري وكانت عدت ع الحكايه سنين

هو عرف الجمل ... والجمل عرفه

علشان كده وضب المكان اللى المفروض انه هينام فيه وحرص ان يكون الجمل شايفه وهو بيوضب مكانه  للنوم 

وفعلا بالليل قام الجمل قطع عقاله وفك رباطه ونزل علي المكان اللي وضبه الراجل علشان  ينام فيه
ونزل رفص وبرك وهبد لما اتفرتك الراجل هو واللبس بتاعه
 وساعتها ارتاح الجمل

 بس اللى ميعرفهوش الجمل ان الراجل بعد ما وضب المكان واتأكد ان الجمل شافه قلع هدومه وحشاها حجاره ورمل وحتى الغتره والعقال بتوع راسه حطهم على الماكيت اللى عمله ده وغطاه كويس ويكأنه هو اللي نايم

وجرى بعيد يستخبى وطبعا هو كده فلت خلاص من عقاب الجمل فهرب من القبيله دى قبل ما يشوفه الجمل ده تانى 

و هرب الراجل و عدي وقت كتير ... وتانى نسى الجمل وحكايته وكمان الجمل اتطمن انه انتقم وخد بتاره 

بس الحكايه منتهتش على كده لان ف يوم وهو ف 

السوق شاف الجمل والجمل شافه

لكن اللي حصل غريب جدا

 الجمل اول ما شافه قلبه وقف ... ووقع ميت 

وهنا يحضرنى غبى منه فيه وهو بيقول ياعينى دا اتصدم

يمكن اتصدم صدمه انك عايش بعد اللي عملته فيك

او قال عليه يا راجل يا عفريت ياللى ب٧ اروح

او قال جاي ينتقم بعد ما موته اخر مره 😂

المهم انه مستحملش الصدمه ومات

وطلع قلبه الصغير لا يتحمل هذه الصدمه 

فى النهايه الجمل طلع صاحب مرض وكان عاوز د.مجدى يعقوب يعالجه ويغيرله صمام الغل او شريان الغباوه يمكن كان استحمل يشوف الراجل ده على وش الدنيا 

وتوته توته خلصت الحدوته 

مكنتش عارفه ان الجمل غلاوي وغضوب وسمعت زمان عن صبره وتحمله بس غلة دا ياربى منه 

ونرجع نتكلم عن جمال الجمل و صفاته اللى مفيش زيها 

من عظمة الخالق أنه جعل جواه كيسين في بطنه على شكل قارورة لتخزين الماء فيهما 

طب انتوا عارفين انه فى خلال  ١٠ دقايق ممكن يشرب  ما يقارب حجم ثلث جسمه من المياه وقد  توصل الكميه دى  ل١٣٠ لترا

وللجمل قدرة عجيبة على تحمل العطش ممكن تتراوح بين شهرين  لاربع أشهر من غير ما  يشرب ميه ويكتفي بس باللى  بياكله من نباتات خضراء غنية بالماء ودا ف الخريف والشتا

اما بقى في الصيف اللى طبعا عارفين بيكون شديد الحراره ازاى 

ممكن الجمل  يتحمل العطش بمدة تتراوح ما بين ٦ أيام ل ١٠ وممكن توصل لاسبوعين أو أكثر

ودا  لانه مش بيتنفس من فمه و زى ما قلنا لا يلهث أبدًا مهما اشتد الحر

وهو بكده يتجنب تبخر  الماء من جسمه عن طريق الفم

 كمان الكليتين بيقتصدوا الماء  بصورة مذهلة
متكلمتش عن شعره ولا عن رجليه ولا عن بقه وعنيه 

مسم ... لو قعدت اتغزل ف حبيبى الجمل هقول شعر اكتر من اللى قالته ولاّدة   فى ابن زيدون

حواديتى مبيخلصوش ...
وانتوا كمان ف الليك و الكومنت والشير متقصروش ☺

#حكايه_ورا_كل_مثل
#احترس_من_الجمل
#ابتسام

تعليقات

إرسال تعليق

المشاركات الشائعة من هذه المدونة

#ليه_طيب_اكسر_وراه_قله؟ج٢#الليله٦٠٨

صورة
#ليه_طيب_اكسر_وراه_قله؟ج٢ #الليله٦٠٨ اما بقى الحدوته التانيه فبتقولك ان زمان وبردو ايام الفراعنه كانت لما الانسان يموت بيكسروا وراه اناء من الفخار  يعنى هنا كانت عاده مرتبطه بالجنائز  وطبعا كلنا عارفين اهمية الموت و الحياه الابديه والكلام دا كله عند المصريين القدماء واظن انى لسه مخلصه سلسلة ايزيس وازوريس اللى بتحكى باستفاضه ف اهمية الدفن والليله دى  طب بردو ليه نكسر وراه حاجه فخار واللى رسيت ع القله لاننا بقينا نستخدم معادن وصينى واوانى تانيه حاليا  انما القله فهى اللى كانت مكمله حتى دخول التلاجه الايديال ال ٨ قدم لكل بيت نرجع لكسر القله الفكره انهم مش بس بيكسروا القله لاء وكمان بياخدوها ويدفنوها جنب قبر المرحوم طيب الله ثراه ... ودا ليه؟ علشان لما ترجع الكا يعنى (الروح) على بيته مره تانيه مره ماتأذيش اهل البيت اللى موجودين فيه دول كانوا بيعملوا الاكل ف البيت وياخدوه عند مكان المقبره وياهم وهناك ياكلوا وبعدين يكسروا الاوانى دى ويسيبوا الفخار الكسر هناك  واللى كانوا بيسموه الشِقف جمع شقفه لدرجة ان المتخصصين فى الآثار وهم بينقبوا لو لقوا ف مكان ما آنيه  فخاري...
قراءة المزيد

#هو_صحيح_الجوع_كافر_بس_مش_للدرجه_دى؟؟؟ج٢#الليله٦٥٠

صورة
#هو_صحيح_الجوع_كافر_بس_مش_للدرجه_دى؟؟؟ج٢ #الليله٦٥٠  زى ما قولنا كان الموسم الزراعي في شمال العراق اواخر عام ١٩١٧ سئ جداً ومطر قليل ومحصول ضعيف و بيقول محمد امين العمري  واللى كان ف الوقت ده ضابط اعاشة في الجيش السادس التركي ويعتبر شاهد عيان ع الفتره دى بيحكى ويقول : انه كتب تقرير للقائد خليل باشا وضح فيه الخطر اللي هيحصل في ولاية الموصل بسبب قلة الحبوب و انهم ضرورى يستعدوا ويجيبوا مؤن من اسطنبول و يلحقوا الدنيا قبل فوات الاوان   لكن خليل باشا كبر دماغه و مهتمش للتحذير ده وقال له  ان ولاية الموصل هي مستودع تموين العراق و هي مش  محتاجة تموين يجي لها من بره يا حبيبى احنا ناخد ومنديش بس زى ما توقع محمد امين العامرى بدأت المجاعه حصل ايه ف المجاعه ؟ هل تداركت الحكومه الغير واعيه سوء الحال ؟ ولا ايه اللى حصل؟ ازاى اتعامل اهل الموصل مع المجاعه؟ اقولكم اولا زى ما توقع ضابط الاعاشه بدأت المجاعة تستفحل وشملت الموصل والمنطقة الواسعة اللى ف الشمال منها لحد بحيرة ((وان)) وبدأت جموع من الجياع تهجر ديارها في الاناضول وتتوجه ناحية الموصل  ما الكل بقى فاكرها مليانه خير...
قراءة المزيد

#زئرده #الليله١٠١

صورة
#زئرده #الليله١٠١ الحدوته المرادى حقيقيه زى حكايه #الشنطه_المعجزه  اللى ده الرابط بتاعها https://www.facebook.com/102264164820545/posts/142331610813800/ بردو جيران ماما زمان ف الحى العريق والشارع الجميل (( ابن الرشيد )) اللى لا اتولدت فيه ولا عشت فيه بس حبيته من حب امى فيه ومن حكاياتها عنه  (( زئرده ))  دى واحده جارتهم وباين من اسمها -اللى طبعا مش اسمها الحقيقى - ولكن الناس كانوا مسمينها كده لانها كانت صغننه الحجم  تقريبا كان اسمها نوال بس اللى كانت الدنيا كلها بتناديها بيه كان زيئرده كانت متجوزه بس معهاش اولاد وجوزها كان بيشتغل ف بلد تانيه وبييجى يشوفها كل فتره  وعلشان كده كانت عايشه ف شقه ف بيت اهلها بس بتبات لوحدها ف شقتها كان الناس كلها عارفين انهم مرتاحين ماديا  وف ليله صيفيه حاره حين لم يكن يوجد لا تكييف ولا حتى مروحه فى هذا الزمان القديم  و حيث لا يوجد حل سوى ان تنهى ليلتك بدش بارد لتذهب للنوم متأخراً على ١١ونص ١٢ بالليل كده  بعد ساعه ولا ٢ اما المدينه كلها تغرق فى سبات عميق مفيش صاحى  كانت كالعاده بايته لوحدها وحست بحركه معاها ف اوضة ...
قراءة المزيد