#وحوى_ياوحوى_اياحه #الليله٣٢٥

#وحوى_ياوحوى_اياحه
#الليله٣٢٥

وحوى يا وحوى ... اياحه 
وكمان وحوى ... اياحه 

كلمه كلنا عارفينها يمكن منعرفش ان قائلها مطرب اسمه احمد عبد القادر وانها قديمه اوى من سنه ١٩٣٤ يعنى عمرها دلوقتى حوالى ٨٦ سنه 

وعلى قد ما نقول يااااه 😳

دى قديمه اوى 

وكل السنين دى وبتتقال كل سنه

بنفتكرها بنفس القوه كل سنه 

وعلى قد ما بتطلع اغانى جديده بيحاول المطربين يعملوها 

وعلى اد ما بتكون اغانى جميله زى اغالى محمد فوزى مثلا بس بردو دى اعلى وواخده قلب وعقل الناس اكتر 

كل ده وهى اغنيه جدودنا كانوا بيغنوها  وهم عيال صغيره من ٨٦ سنه بالفانوس ابو شمعه 

بس اللى منعرفوش ان عمر الغنوه 

اكبر من كده بكتير .... بأد ايه

بااااالااااف السنين 

وانها مش مرتبطه من البدايه برمضان ولكن ارتبطت باجدادنا الفراعنه 
يعنى قبل الصيام ورمضان و قبل الديانات السماويه ال٣ كمان 

والحكايه ان كلمة وحوي كلمه هيروغليفيه معناها  اهلا او مرحبا

 وإياحة معناها القمر وأصلها أياح

وسببها احتفال المصريين بملكه قديمه هى الملكه اياح حتب زوجة الملك سقنن رع

واصل الحكايه 

هى قصة طويله اغلبنا عارفها او عارف اصلها وعارفين ان بدايتها لما الهكسوس اتيحبوا على  الجزء الشمالى من مصر يعنى عند محافظه الشرقيه على شكل جماعات متفرقه لا هم جيش ولا هجوم وفضلوا يزيدوا ويكتروا لما بقوا اعداد كبيره خصوصا ان الجزء دا مكانش مفضل عند المصريين لانه يعنى يعتبر صحراوى ومش جذاب للسكنى لنا كمصريين عاوزين الزراعه والنيل يكون قريب منهم بس دا شجع الهكسوس انهم يكتروا اكتر  واستهبلوا لحد ما عملوا لهم ملك و جيش وعملوا عاصمه 

شويه شويه استقووا  لما بقوا بينافسوا ملك مصر اللى بيحكم طيبه سقنن رع 

وابتدا الملك دا يحاربهم بتشجيع من زوجته (قمر الزمان ) او اياح حتب 

الملكه الجميله قمر الزمان 

و من بعد ما مات ف احدى المعارك مع الهكسوس او (ملوك الرعاه) زى ما كان جدودنا كانوا مسمينهم 

ومن بعده شجعت الابن البكر كامس ولما مات 

تتهد الست وتحافظ ع الواد اللى فاضل حيلتها 

لاء .... كان عنده حوالى ١١ او ١٠  سنين لما مسك الحكم و اصبح الملك بعد اخوه كامس 

اه يعنى اد ابنك اللى ف رابعه ابتدائى ده وبتخافى يروح المدرسه لوحده او يعدى الشارع 

بالمناسبه احمس يعنى ابن القمر او الهلال يعنى 
يعنى لو الملك ده من قصص الف ليله وليله 
كان هيبقى اسمه 
الملك هلال ابن الملكه قمر الزمان 

 المهم نرجع للملكه اللى فضلت ورا ابنها لحد ما قاد الجيوش وطرد الهكسوس وخرجهم من عاصمتهم اواريس
وفضل يطاردهم لحد ما خرجوا من مصر 

ويسكت على كده لاء ... دا كمل وراهم لحد ما خرجوا من مصر خالص وطاردهم لخارج مصر 

المهم ان كلمة (وحوي ) فدى معناها: مرحبًا أو أهلاً

ويبقى جمله ترحيب باللغه المصريه القديمه معناها 

مرحباً مرحباً ... يا قمر الزمان 

وحوى وحوى ... اياح 

ودا كان ترجمه للى ممكن يكون داخل ف حياتنا من اللغه المصريه القديمه 

يا ترى ايه تانى ممكن تكون من كلمات مصريه قديمه بنتكلمها من غير ما تعرف ان اصلها اجدادنا قدماء المصريين

عموما على اد ما الاغنيه دى محبوبه لكل المصريين الا ان والدتى الله يرحمها كانت بتتغاظ منها 
وبتزعل منها بصوره شخصيه 
يا ترى ليه 
دا اللى هاحكيه ف حكايه مسليه من حواديت الجدود لما كانوا لسه اطفال 

والحكايه هاحكيها الليله الجايه باذن الله

#ذكريات_رمضان_لازم_يدخل_فيهاالتاريخ_الفرعونى 
#ابتسام

تعليقات

إرسال تعليق

المشاركات الشائعة من هذه المدونة

#ليه_طيب_اكسر_وراه_قله؟ج٢#الليله٦٠٨

صورة
#ليه_طيب_اكسر_وراه_قله؟ج٢ #الليله٦٠٨ اما بقى الحدوته التانيه فبتقولك ان زمان وبردو ايام الفراعنه كانت لما الانسان يموت بيكسروا وراه اناء من الفخار  يعنى هنا كانت عاده مرتبطه بالجنائز  وطبعا كلنا عارفين اهمية الموت و الحياه الابديه والكلام دا كله عند المصريين القدماء واظن انى لسه مخلصه سلسلة ايزيس وازوريس اللى بتحكى باستفاضه ف اهمية الدفن والليله دى  طب بردو ليه نكسر وراه حاجه فخار واللى رسيت ع القله لاننا بقينا نستخدم معادن وصينى واوانى تانيه حاليا  انما القله فهى اللى كانت مكمله حتى دخول التلاجه الايديال ال ٨ قدم لكل بيت نرجع لكسر القله الفكره انهم مش بس بيكسروا القله لاء وكمان بياخدوها ويدفنوها جنب قبر المرحوم طيب الله ثراه ... ودا ليه؟ علشان لما ترجع الكا يعنى (الروح) على بيته مره تانيه مره ماتأذيش اهل البيت اللى موجودين فيه دول كانوا بيعملوا الاكل ف البيت وياخدوه عند مكان المقبره وياهم وهناك ياكلوا وبعدين يكسروا الاوانى دى ويسيبوا الفخار الكسر هناك  واللى كانوا بيسموه الشِقف جمع شقفه لدرجة ان المتخصصين فى الآثار وهم بينقبوا لو لقوا ف مكان ما آنيه  فخاري...
قراءة المزيد

#هو_صحيح_الجوع_كافر_بس_مش_للدرجه_دى؟؟؟ج٢#الليله٦٥٠

صورة
#هو_صحيح_الجوع_كافر_بس_مش_للدرجه_دى؟؟؟ج٢ #الليله٦٥٠  زى ما قولنا كان الموسم الزراعي في شمال العراق اواخر عام ١٩١٧ سئ جداً ومطر قليل ومحصول ضعيف و بيقول محمد امين العمري  واللى كان ف الوقت ده ضابط اعاشة في الجيش السادس التركي ويعتبر شاهد عيان ع الفتره دى بيحكى ويقول : انه كتب تقرير للقائد خليل باشا وضح فيه الخطر اللي هيحصل في ولاية الموصل بسبب قلة الحبوب و انهم ضرورى يستعدوا ويجيبوا مؤن من اسطنبول و يلحقوا الدنيا قبل فوات الاوان   لكن خليل باشا كبر دماغه و مهتمش للتحذير ده وقال له  ان ولاية الموصل هي مستودع تموين العراق و هي مش  محتاجة تموين يجي لها من بره يا حبيبى احنا ناخد ومنديش بس زى ما توقع محمد امين العامرى بدأت المجاعه حصل ايه ف المجاعه ؟ هل تداركت الحكومه الغير واعيه سوء الحال ؟ ولا ايه اللى حصل؟ ازاى اتعامل اهل الموصل مع المجاعه؟ اقولكم اولا زى ما توقع ضابط الاعاشه بدأت المجاعة تستفحل وشملت الموصل والمنطقة الواسعة اللى ف الشمال منها لحد بحيرة ((وان)) وبدأت جموع من الجياع تهجر ديارها في الاناضول وتتوجه ناحية الموصل  ما الكل بقى فاكرها مليانه خير...
قراءة المزيد

#زئرده #الليله١٠١

صورة
#زئرده #الليله١٠١ الحدوته المرادى حقيقيه زى حكايه #الشنطه_المعجزه  اللى ده الرابط بتاعها https://www.facebook.com/102264164820545/posts/142331610813800/ بردو جيران ماما زمان ف الحى العريق والشارع الجميل (( ابن الرشيد )) اللى لا اتولدت فيه ولا عشت فيه بس حبيته من حب امى فيه ومن حكاياتها عنه  (( زئرده ))  دى واحده جارتهم وباين من اسمها -اللى طبعا مش اسمها الحقيقى - ولكن الناس كانوا مسمينها كده لانها كانت صغننه الحجم  تقريبا كان اسمها نوال بس اللى كانت الدنيا كلها بتناديها بيه كان زيئرده كانت متجوزه بس معهاش اولاد وجوزها كان بيشتغل ف بلد تانيه وبييجى يشوفها كل فتره  وعلشان كده كانت عايشه ف شقه ف بيت اهلها بس بتبات لوحدها ف شقتها كان الناس كلها عارفين انهم مرتاحين ماديا  وف ليله صيفيه حاره حين لم يكن يوجد لا تكييف ولا حتى مروحه فى هذا الزمان القديم  و حيث لا يوجد حل سوى ان تنهى ليلتك بدش بارد لتذهب للنوم متأخراً على ١١ونص ١٢ بالليل كده  بعد ساعه ولا ٢ اما المدينه كلها تغرق فى سبات عميق مفيش صاحى  كانت كالعاده بايته لوحدها وحست بحركه معاها ف اوضة ...
قراءة المزيد