#شد_السكينه_يا_هيثم #الليله٣٦٥ #قصة_تشويق_حدث_بالفعل
#شد_السكينه_يا_هيثم
#الليله٣٦٥
#قصة_تشويق_حدث_بالفعل
اجازه بقى وفاضيين لا فى تلاميذ ولا حصص قوم قامت ف دماغنا نعمل رحله جماعيه لمدرسات المدرسه وبقالنا ف المشاورات اسبوعين
غيرنا فيها كل حاجه اكتر من مره
اتفقنا على مكان وغيرناه اتفقنا على مواعيد وغيرناها كتييييير
ونتفق ونختلف ونختلف ونختلف
بس مثابرين على الفكره وحريصين على تنفيذها خصوصا اننا بلغنا كتاكيتنا الصغيرين اللى اشتغلوا ف الزن وبالتالى بقى لا تراجع و لا استسلام
ومع الافكار والاماكن تداعت الذكريات
وافتكرت لما جت عينى فعينه ....
يوووه مش وقته ...
انا بتكلم عن الرحلات دلوقتى
افتكرت التالى .....
ف يوم من ايام الصيف الجميله خرجنا انا وزوجى وولادى اللى كانوا صغيرين احمد ٧ سنين ومحمد ٤ واخى وزوجته وطفلته حديثه الولاده ذات ال٣ شهور تقريبا
المهم نروح فين ؟؟؟
قلنا نروح الملاهى تعالوا نروح دريم لاند
كان يوم جميل لعبنا
واتنططنا من لعبه للعبه
ولعبنا كل لعبه كذا مره
وكان محمد الصغير يا حرام اللى عنده ٤ سنين و عند كل لعبه فى مقياس بالسنتيمتر ومحددين الحد الادنى لطول اللى يدخل اللعبه والا الامن ميدخلش اللى اقل من المقياس ده
ومش عاوزه اقول ان محمد طوله كان اقل من اغلب اللعب 🙄
وبذالك ف بعد كام مره يحصل ان المجموعه كلها تركب ويستنى حد جنب محمد وضحى البيبى وطبعا الشنط اللى مكناش نعرف ان فى مكان عند البوابه نحفظ فيها شنطنا فشيلنا الشنط على قلبنا طول الوقت
بس المهم بعد كذا مره وبعد ما اتأكدنا ان المكان متأمن جامد والامن يتحايل علينا ف كل لعبه انه واخد باله كويس وبعد ما شفنا امثله كتيره مشابهه سايبين اولادهم
وكده كده العيال شايفينهم ف كل الالعاب تقريبا
و علشان نكون كلنا مع بعض فبقينا نسيب محمد وشنطة البيبى دودو وشنطنا مع الامن بره ونركب اللعبه سوا كابلز كده واحمد محشور ف النص بينى وبين باباه
ولفينا كل شبر فى دريم
لقينا كذا لعبه اسمها قطر
قطر الشرق السريع
وقطر الميه الشهير بالشلال
وقطر الرعب
قطر الطفل
المهم ....
كان فى لعبه اسمها قطر الظلام
فنص اليوم رحنا بس مدخلناش مش فاكره ليه
ساعتها قالوا مقفول يمكن كانوا بيصلحوه
بس مخدناش ف بالنا
المهم بعد ما جولتنا قاربت على الانتهاء
والملاهى قربت تقفل
افتكرنا اننا مدخلناش قطر الظلام ده
وفؤاد قال انا عديت ولقيتهم فتحوه وشغال
طب ما تعالوا بقى ندخل علشان ميبقاش حاجه ف الملاهى مدخلنهاش والتذكره الvib مراحتش ع الفاضى
اه دا حنا دافعين
وعلى طريقه وجع البطن ولا كبّ الطبيخ
روحنا قطر الظلام
اللى فؤاد كان بيقول هو مش جامد اوى يعنى هو حاجه خايبه كده
عباره عن مبنى حوالى ٣ ادوار والقطر ده بيلف فيهم بس يعنى مش حاجه واو اوى
مش زى التورنيدو
ولا حتى حصل مركب القرصان
وطبعا ميجيش حاجه ف قطر الموت اللى بيتقلب بينا
واللى ركبناه مرتين
بس نقول ايه
نسيبه يعنى
رحنا قطر الظلام وطبعا و كالعاده محمد اقل من طول اللعبه
والامن واقف وسيبنا معاه محمد وضحى والشنط
ودخلنا ....
والمرادى الدخول من باب كده يعنى مش شايفين الكتكوتين اللى بره
وهنا تحصل الكارثه ....
يا تري تفتكروا ايه اللى حصل ؟؟؟
شريره👿 ومش هاقول الا بكره
علشان الكومنت والشير اللى بتستخسروهم دول وبتكتفوا باللايك وساعات بتطنشوها كمان
ماهو انا لو كتبت اعملوا ١٥ كومنت وانا اكمل زى الاشرار اللى بيعملوا كده كنتوا عملتوا
واسمها بتبقى قصص سارقينها مش من بنات افكارهم زى بنات افكارى اللى مشحططاهم ف كل بوست شويه
عموما من هنا واريح هابقا شريره ونياهاهاها😈😈 😈وكده
#رحلات_تاااانى
#ابتسام
تعليقات
إرسال تعليق