#انت_بتتنطط_زى_لمونة_الملوحه #الليله٣٧١
#انت_بتتنطط_زى_لمونة_الملوحه
#الليله٣٧١
الحقونى انا بمتحن ...
انا اللى خلصت تعليم من ٢٩ سنه بمتحن
انا اللى عايشه حياتى وباكل عيشى من امتحان الناس ومراظيتهم ..
لف الزمن ودار وبقيت ممتحنَه
اسمعوا حكايتى من الاول :
صديقه على الصفحه علقت ف الليله اللى فاتت وقالت :
((كانت والدتي رحمة الله تعالى عليها تكثر من استخدام الامثال الشعبيه في كلامها ، و كان الوالد رحمة الله تعالى عليه لها بالمرصاد كلما ذكرت مثل امامه قال له : هل تعرفي حكاية المثل ده ايه او اصل المثل ده ايه ؟ ههههه
رب ارحمهما كما ربياني صغيرا ،
جزاك الله خيرا وبارك فيك ولك يا استاذة ابتسام))
فانا رديت ببرائه وحُسن نيه وقلت :
((اللى فاكراه من الامثال دى قوليه نحكيه)) ...
غلطش انا ؟
قولولى اه ... غلطتى وانسحبتى من لسانك زى عادتك
والمفاجأه دا كان ردها
((ذات مرة الوالدة قالت لاحد الصغار المشاغبين : اهدأ شوية انت ليه عامل زي ليمونة الملوحة ( الملوحة هي الفسيخ في الصعيد قديما ) ، المهم بابا الله يرحمه كالعادة ، كان يحب يناغشها ، قال لها : طيب عارفة ليه بيقولوا ليمونة الملوحة ؟
و ياقلبي المسكينة الله يرحمها ، و كان ردها : ما اعرفش لكن طلعنا لقناهم يقولوا للعيل ( الطفل) كثير الحركة : انت زي ليمونة الملوحة ،
الوالد الله يرحمه و ينور قبره و الوالدة وجميع موتى المؤمنين ، فسر لنا سبب الكلمة ،
و انا هاسيبك تفكري في السبب ، زي ما بتعملي فينا في قصصك الجميلة المشوقة التي يفوح منها عبق الماضي الجميل .))
مش هاقول لكم رديت قلت ايه شوفوا الكومنتات ف بوست الليله ال٣٦٩ اللى هى الليله قبل اللى فاتت 🤨
بس قبلت التحدى😎
وهرد عليها ...
اهدى شويه انت ليه عامل زى لمونة الملوحه
طب ايه حكاية ؟
الملوحه من اسمها اكله مليانه ملح وكمان طريقة تصنيعه فيها شئ من استخدام لبكتريا التحلل
يعنى من النهايه حاجه شديدة الضرر للبدن على كافة المستويات ومن كافة المحتويات
ودا كلام اطباء العصر الحديث
والاكله قديمه قِدم الفراعنه اللى اخترعوها
بس الفراعنه مش قليلين ف علم الطب واكيد عارفين اضرار الملوحه مع انهم لا عندهم معامل ولا تحاليل
علشان كده قالوا
الملوحة يجب ان يلازمها الليمون
فتعالى شوف المصريين ربطوا ازاى بين الليمون والملوحه
١ - يعنى مثلا نغسل الملوحه بالخل المخفف والليمون علشان قتل الميكروبات
٢ - لو حطينا السمكه على الملوحايه الواحده كوبايه صغيره من عصير الليمون بيقتل اى ميكروبات بها
٣ - شرب عصير ليمون مع مياه كثيره بعد ما ناكل الملوحه لتجنب اثارها الضاره
٤ - شرب عصير لمون بالنعناع علشان يقلل الانتفاخ والحموضه
٥ - كمان مشروبات ساخنه زى الليمون المحلى بعسل النحل علشان يساعد على الهضم وطرد الاملاح من الجسم
يعنى من الاخر ...
نجهز الملوحه بالليمون ونغسلها به قبل ما ناكلها
نعصرها عليها واحنا بناكلها
نخلص اكل نحط الشاى ع النار ومننساش نعصر عليه لمون
ونعمل لمون بنعناع ولمون بعسل ونشرب ليمون سخن
طبعاً احنا ياستات اللى بنتدبس ف تنضيف الملوحه وتجهيزها وبكده بناخد اكبر قدر من الزفاره ... فنعمل ايه ؟
ندعك ايدينا بالليمون ودا هيقلل الريحه
مش هيطردها الا لو غسلنا ايدينا بمية نار
وساعتها ممكن باذن الله يدوب الجلد وتفضل الريحه ف ايدينا عادى
ومن اجل ذلك
الليمونه مدوخينها معانا ف الملوحه ...
مش هى الليمونه هى بتدوخنا زى لعبة زمان دوخينى يا لمونه ولا اغنيه سعاد حسنى
لاء اللمونه عماله تتنطط من خطوه لخطوه من اول دخول الملوحه البيت لحد ما تنتهى اثارها من ايدينا بعد اسبوعين تلاته
زى الولد الشقى اللى مش مبطل حركه من هنا لهنا
و دا .... كان تفسيرى اتمنى يكون صح
ولو كان غلط وكنت بهجص وبفتى
ادينى قلت حاجات مفيده عن اهمية الليمون مع الملوحه
واللى يعرف يفسر المثل يقوله ينوبكم ثواب اخوكوا مزنوق
وطبعا من الاخر يعنى عارفين حواديتى مبيخلصوش ...
وانتوا كمان ف الايك و الكومنت والشير متقصروش ☺
#ابتسام
تعليقات
إرسال تعليق