#كتر_خير_اللى_افتكرنى #الليله٣٦٢ #الجزء_الثانى
#كتر_خير_اللى_افتكرنى
#الليله٣٦٢
#الجزء_الثانى
فتحت ف الامثال وانا لما بفتح حقيبة الذكريات مبتتقفلش
وخرجت من مثل لمثل
ومن مثل ياماجاب الغراب لامه اللى مر عليه سنه
لمثل كتر خير اللى افتكرنى ولو جاب شوية ترب وعفرنى
ووقفنا الليله اللى فاتت عند النوع التانى من الستات اللى تقول لجوزها ياما جاب الغراب لامه
و دى بقى بتكون الست المستقويه اللى فارده عضلاتها بطريقه منفره عامله نفسها ند لجوزها ان مكانتش كمان مسترجله عنه كمان
ودى لازم جوزها يستسلم لها لو عاوز يعيش ويربى عياله ويمكن كتر خيرها تسمحله يربى شنبه كمان
كنوع من الكرم الحاتمى ويعيش الزوج يجيب الحاجه ويتقاله ياما جاب الغراب لامه و ياكل عيش وهو ساكت
على طريقه ساميه رشدى اسكت انت متتكلمش زى فيلم غصن الزيتون
او سعاد احمد مرات حنفى وهتنزل المرادى
او علويه جميل هنزل صورهم تحت 👇للى ناسيهم
بالمناسبه علويه جميل الله يرحمها
فلها حكايات وحكايات مع محمود المليجى
لدرجة انك تحس ان ادورارها ف السينما كانت مستقاه من حياتها الواقعيه
بداية اسمها الياصبات من طماى الزهايره بلد ام كلثوم مولوده سنه ١٩١٠
اتجوزت وهى عندها ١٣ سنه
اه متستغربوش دا كان السن الطبيعى لزواج البنات ف النصف الاول من القرن الماضى
يعنى جدتى وعمتى اتجوزوا ف سن ال١٢
مش فاهمه يعنى هم كانوا بيلاقوا يأكلوهم عادى بس دا نوع من سترة البنت وحاجات غريبه كده لدرجة ان ماما كانت بتقولى اللى توصل للعشرين ومتجوزتش دى تعتبر بارت
نرجع لاياصبات او علويه جميل اشتغلت ف فرقة يوسف وهبى وهى عندها ١٥ سنه
مستعجله اوى الست دى واخده كل حاجه بدرى بدرى
المهم بعد ما خلفت ٣ ولدين و بنت
ايزيس وجمال ومرسى
كانت بتتنبأ باسماء حكام مصر تقريبا
اطلقت من جوزها
قلنا هى مواليد ١٥ ديسمبر ١٩١٠
قوم يا مؤمن يعد ما اتولدت باسبوع يعنى ف ٢٢ ديسمبر ١٩١٠
ف حى المغربيلين ف القاهره اتولد ولد ومسموهوش عبد الصمد
وسموه محمود واتنقل بعد فتره اهله لحى الحلمية الارستقراطى واتعلم ف المدارس ابتدائى وثانوى
زمان مكانش فى اعدادى
الا ف مسرحيه عاملها ف المدرسه وشافته فاطمه رشدى (بتاعة الانارب ياسى محمد فى فيلم العزيمه ) وكانت صاحبة مرسح كبير اه هم بيسموه زمان مرسح ومش عارفه ليه ...ولا مين الصح ومين الغلط احنا ولا هم
المهم اشتغل ف الفرقه ب ٤ جنيه واحترف التمثيل والاشيه بقت معدن
واتنقل بعد فتره لفرقة رمسيس بتاعة يوسف وهبى
ومين اللى كان شغال ف الفرقه ف الوقت ده؟؟
صح .... شاطرين
الست علويه هى كانت ف الوقت ده اتطلقت واتفرغت لشغلها ف التمثيل وبقت شابه عندها ٢٧
الا وف مره الفرقه بتعرض ف اسكندريه ويوصل للمليجى خبر وفاة امه
وهنا بكا محمود امه اللى ماتت
وبكى فلسه اللى ميخليهوش يقدر يرجع مصر ( القاهره ) ما بالك بمصاريف الجنازه
وهنا اتصرفت الست الجدعه علويه وخرجت ورجعت وهى بايعه دهبها وادته ٢٠ جنيه
وقالتله متجيبش سيره لحد
مش عارفه ازاى موضوع سر ازاى ومتقولش لحد
وانا مفيش مقاله عنها او عنه الا جت فيه سيرة ال٢٠ جنيه السلف ف السر دا لو كانوا عملوا اعلان ف الجرايد كان الناس اللى اتكلمت ف موضوع العشرين جنيه دول هيبقوا اقل
المهم يعنى ...
محمود شال لها الجميله والموقف اللى هو فيه من فقد الام ودور علويه ف احتوائه
هم اه من سن بعض بالشهر بس هى كست دخلت معترك الحياه قبله بسنين سواء بتجربة الزواج والامومه او بتجربة العمل
خلتها تعرف تحتويه وتمثله مش تمثل تمثيل قصدى تصور ت لاء مش تصورله صوره ت ...ت ...
فهمتوا صح 😂
تمام تمثله الام اللى افتقدها وحبوا بعض
ولحد هنا القصه حلوه ورومانسيه ولا الافلام اللى بيعملوها
بس اللى حصل بعد كده سكة تانيه خالص
واضح ان دور الام المسيطره عجب علويه وقررت تؤديه ف حياتها مع محمود
واللى ابتدى بانه يقبض ويديها اى فلوس تجيله
واضح انها كانت عاوزه تعوض ال٢٠ جنيه بتوع الدهب
وكمان زاد وغطى ان بعد فتره من الجواز راح كشف و عرف انه مش هيقدر يخلف ابداً
ممكن يكون دا له دور بردو ف تمسكهم ببعض
بس هى الحمد لله ربنا مراضيها بالذريه فعادى مكملين
ونرجع لادور علويه فى الافلام وحياتها ف الواقع فهنلاقى مثلا فيلم (مفيش تفاهم) اما كانت مانعه الزوج ان حد يزوره ف البيت
علويه كانت عامله كده ف محمود المليجى لدرجة ان حتى قرايبه واصحابه كانوا بيقابلوه بره
والراجل زهق من القيود وحب زميلته لولا صدقى وكان نفسه يتجوزها بس ازاى دا بيخاف من علويه
ولا حتى يجرؤ يتجوز لولا حتى ف السر
وتعدى فتره وتشتغل قدامه ف المسرح بنوته من لبنان اسمها فوزيه الانصارى ويحبها
ياترى هيتجرأ المرادى ويتقدم ولا هيخاف من ماما علويه اللى مسميها المرأه الحديديه
قصه حياة بعض الناس بتكون فيها ميلودراما اكتر من اللى بيعملوها ف الافلام
دا وحكايات تانيه هنعرفها الليله الجايه
فاهمين بقى ..
حواديتى مبيخلصوش ...
وانتوا كمان ف الايك و الكومنت والشير متقصروش ☺
#حكايه_ورا_كل_مثل
#ابتسام
تعليقات
إرسال تعليق