#تحت_القبه_شيخ_سيدى_الاربعين #الليله٣٧٠ #الجزء_الثانى

#تحت_القبه_شيخ_سيدى_الاربعين 

#الليله٣٧٠

#الجزء_الثانى

المصرى طول عمره مبتكر .. مخترع .. خلاق .. جينيّس 

عنده لكل سؤال جواب ولكل مشكله الف حل وكله خارج الصندوق 

والحكايه ان زمان كان فى بيت فى حاره من حوارى القاهره ضهر البيت ده كان قدامه خلا مش مداخل بيوت يعنى 

ودا كان بيشجع اللى ماشى ومزنوق انه يفك زنقته خلف هذا الباب 

اصل زمان كانت الناس مش مثقفه ومتعلمه زى الايام دى بالاضافه ان مكانش فى كبارى زى دلوقتى 

المهم صاحب البيت زهق او بمعنى اصح كان بتخنق اول ما يدخل الغرفه اللى الناس بيصرفوا ف ضهرها 

عنها وبعد ما غلب حلول 

راح منضف المكان اللى ف ضهر بيته ده وكنس ورش وفرش رمل وجاب زرع 

لاء  متفهموش غلط معملهوش جراج وكتب عليه اسم الحى وخلى الركنه فيه بالساعه 

هو جاب رخامه فخيمه كده وكتب عليها مقام سيدى الاربعين 

ودا مين بقى اللى يستجرى انه يبول على مقام ولى من الاوليا ؟؟

ومتفهمش بردو احدهم اخد باله

 يمكن جار قديم مثلا وحضر اللعبه من الاول وبالتالى عارف الحكايه من طقطق لسلاموا عليكم 

اللى بالمناسبه حكيت سبب المقوله دى قبل كده والرابط بتاعها هنا 👇

https://www.facebook.com/102264164820545/posts/159398432440451/

 

وهو عارف ان لا فى مقام ولا يحزنون والسر ده ... 

سر التخلص من الناس اللى بتفكها ف ضهر بيتك واللى واضح انها كانت منتشره ف شوارع كتير

وبالتالى حكى لحد اللى حكى للتانى و الناس خدت بالها ومن  ساعتها وكل اللى كان الناس بتصرف نفسها ف ضهر بيته نضفه وعمل يافطه مقام سيدى الاربعين 

(( وعلشان احنا ناس معندناش كرياتيفيتى زى لو فتح مطعم كريب ونجح كله يديها كريب او زى اللى طالع دلوقتى الفرايد تشيكن 

مستنيين انتشار الاكل الكورى والصينى اللى اول ما هيتعمل كله هيعمل زيهم )) 

بلاش صينى  

بلاش صينى ...

المهم ان الناس 

يمكن علشان كدا بقوا كلهم يكتبوا مقام سيدى الاربعين وكأن سيدى الاربعين ده مش مجرد اسم لاء وعدد كمان 

وفى ٤٠ مقام لاربعين سيدى الاربعين 

بيقولوا انهم كانوا حوالى ٤٠ مقام 

واللى ف السويس يبقوا ٤١ 😅😅😅

دا غير اللى موجود ف العرق وفلسطين وسوريا 

هتقولولى يبقى كده اكيد مقام منهم حقيقى والباقى اونطه 

ماشى وعلى فرض ان الاحتمال دا صح 

مين سيدى الاربعين ؟

فين كرماته ؟؟

يمكن عالم شرعى ؟؟

يبقى فين مؤلفاته ؟؟

الحقيقه ان مفيش له ذكر له فى كتب تاريخ 

ولكن قال عنه احمد امين ف موسوعة العادات والتقاليد و التعابير المصريه ان بركته انه له يجى ٤٠ مقام 

يا سلام .. يعنى مش اسمه كده 

ويعنى بالعقل والمنطق فى حد بيتدفن ٤٠ مره 

ليه ؟؟ اذا كان اوزوريس لما شرحه اخوه ست ووزعه على اقاليم مصر 

لفت الست الفاضله زوجته ايزيس وجمعته علشان  ميتعملش له ٤٢ تربه بعدد اقاليم مصر ... واسمه كان إله على سن ورمح 

مش واحد كل كراماته انه له ٤٠ مدفن طب وحياته كان عامل ايه ؟

يعنى كان طيب ولا شرس ولا قبيح

طبعا ...  احمد امين قال نفس الحكايه بتاعة ان البيبى اللى بيتعمل  ف ضهر البيوت  هو السبب 

عموما .. نعرف كده ان  طبعا دوام الحال من المحُال والعادات السيئه بتاعة ان الناس تتصرف ف الحوارى تخلصنا منها بفضل الله ... ونتيجه لجهود ناس افاضل زى 

 البلديه ومديريات الصحه والسكان 

وان كان العبئ الاكبر مازال يقع على مديرية الطرق والكبارى اللى وفرت للناس كبارى كتيره يقدروا يعملوا تحتها اللى هم عاوزينه من غير ما نضطر نكذب ونقول مقام سيدى الاربعين

و الحمد لله كترت الكبارى واتحلت مشكلة مقام سيدى الاربعين  

ومن موقعى هذا بقترح على رؤساء الاحياء انهم يكتبوا تحت كل كوبرى مقام سيدى (....) و يحطوا اى اسم 

دا يعنى لو كان الشعب لسه متدين بطبعه ويفرق معاه الكلام ده دلوقتى 

#ابتسام