#كتر_خير_اللى_افتكرنى #الليله٣٦٤ #الجزء_الرابع_والاخير #محمود_المليجى_وعلويه_جميل
#كتر_خير_اللى_افتكرنى
#الليله٣٦٤
#الجزء_الرابع_والاخير
#محمود_المليجى_وعلويه_جميل
نكمل مع محمود المليجى المرعب ف كل الافلام بس ميقدرش يمشى كلمه ع المرأه الحديديه الشهيره
بعلويه جميل واللى كانت بتتعامل معاه كأمه اكتر منها زوجته
لدرجة ان كان فى ناس وصحفيين كانوا فاكرينها اكبر منه ف السن
نرجع نكمل الحدوته
دريه احمد دمها خفيف وروشه كده هى من اصل بدوي وشخصيه متميزه ودا خلاها تدخل ف كذا مجال يعنى مسرح اذاعه
ودخلت على السينيما وبدات بادوار ثانويه
ثم بعدين بطوله ومع ممثلين كبار منهم كمال الشناوى و شكرى سرحان وناس كتير
ووصلت بعد كده انها عملت سلسله افلام اسمها خضره خضره وكذا وحاجه نفس سكة اسماعيل يس
وهى كمان فنانه شامله يعنى بالاضافه للتمثيل كان فى صوت حلو واتشهرت لحد لما جت لفرقة اسماعيل يس
و اتعرف عليها ميييين ....
صح ... المليجى
و لقاها حاجه عكس المرأه الحديديه ويحبها محمود ويتجوزها
وتعرف علويه جميل وتخليه يطلقها وتخلى اسماعيل يس يطردها من الفرقه
مش عارفه فين مكتب العمل ولا نقابة الممثلين اللى مش قادرين على الست دى ولا عارفين يخلوا جوزها يبطل تسبيل للبنات
ولا اسماعيل يس يبطل طرد ف الممثلات اللى محمود بيسبل لهم
فرقة لقطع عيش الممثلات هو يسبل
هى طلق
اسماعيل اطرد
عموما الست دريه بعد الطلاق كان عندها هدف تانى وعتزلت التمثيل بسببه الا وهو انها تساعد بنتها تكون نجمه سنيمائيه وكبرت البنت وبقت سهير رمزى
و على الجانب الاخر زهقت الست علويه من الزوج الطايش وقررت ....
تطلق ؟؟؟
لاء طبعاً مين جاب سيرة الطلاق
هى قررت تعتزل التمثيل وتتفرغ للتحليق على الراجل ده ياكش يتكن بقى😂
قاعدالك يا ميدو شوف هتلعب بديلك ازاى ؟
والحمد لله محمود المليجى بطل يتعرف ويتجوز و هى تطلق وتطرد
اه طبعا والله
الحمد لله ربنا هداه سكت كده وكَنّ ودا لبضع سنوات بس 😂😂😂
الا ....
وف اوائل السبعينات كده اشتغلت معاه الممثله الشابه سناء يونس بتاعة سيبيه يمسكها يا فوزيه
وطبعاً واضح ان زمان كانت فوزيه لسه انسه وشابه وبتعمل مسرحية اسمها ( عيب يا انسه )
واشتغلت مع مييين ؟؟؟
وحبها ؟؟؟
شاطرين ... محمود المليجى
وقالها تعالى نتجوز ف ال ايه ؟؟؟
برافوا ... ف السر
وخبوا على مييين ؟؟؟
جدعان خالص ... على مدام علويه جميل المتفرغه له
ما تيجوا تكملوا كتابه بقى ما دمتم عارفين كل حاجه
اكمل وبلاش رخامه حاضر كنت هديكم فرصتكم يلا بقى مالكوش ف الطيب نصيب ماشى اكمل متزقوش
الحكايه ان المره دى عرف محمود المليجى يدارى على شمعته و بقى مفيش فتانين المرادى
ومفيش اسماعيل يس يطردها
وبالتالى عاشوا ف تبات ونبات من غير صبيان ولا بنات ...ما هو مش بيخلف
ومن غير فتانين يقولوا لعلويه ولا فتانات
لحد ما كان بيمثل اخر مشهد له ف فيلم ايوب مع عمر الشريف وبيتكلم عن النوم والموت ونام براسه كده بعد ما شرب قهوته وعمر يقوله خلاص بقى يا محمود وفاكرينه بيبدع فى التمثيل ...بصوا ملاقوش محمود وانتقل للرفيق الاعلى
واتنقل جثمانه على بيت الست علويه
وفضلت سناء حافظه على العهد اللى بينهم و محافظه على الوعد علشان متزعلش علويه حتى بعد ما مات ف يونيو ١٩٨٣وهو عنده ٧٣ سنه
وما طالبتش بحقها الشرعى فى ميراثه كزوجه له
وعاشت علويه بعده ١١ سنه لحد ١٩٩٤
وفضلت حتى بعد موت علويه سناء يونس محتفظه بلقب اشهر عانس ف السينيما لحد ما حصلتهم ف ٢٠٠٦
يعنى عاشت بعده ٢٣ سنه مخلصه له و لعشرته وحتى لحفظ سرهم
طب عرفت منين مادام فضل الموضوع سر
طارق الشناوى الناقد الفنى اللى مبيكبرش ده هو زى ما كنت بشوفه ف نادى السينيما وانا عيله
المهم لما مات محمود المليجى عملت لقاء معاه وحكت له حكايتها وكان هينزل بيها مقال وسبق صحفى وكده
بس بعد كده حست بانها هتجرح الست علويه فاتصلت به وقالت له متنشرش حاجه وهو احترم رغبتها
ولما قربت تتوفى نتيجه للسرطان زارها وفكرها بالحديث القديم ده قالت له ياريتك كنت نشرته
متعرفش ايه اللى خلاها تقوله كده يمكن حفظ لكرامتها او الله اعلم بالسبب
المهم ان بعد وفاتها وبعد ما الابطال الثلاثه للقصه قابلوا وجه كريم ... حكاها الاستاذ طارق اللى مبيعجزش ده
كنت بحبها زمان قبل ما اعرف قصة تضحيتها ووفائها له و للسر اللى بينهم حتى بعد ما مات
بس بردو مين اللى عرف سر ال٢٠ جنيه اللى سلفتهم له علويه يوم وفاة امه وقالت له متقولش لحد🤔؟؟؟؟
وحكايات تانى كل ليه هاحكيها بس انتوا متنسوش
حواديتى مبيخلصوش ...
وانتوا كمان ف الايك و الكومنت والشير متقصروش ☺
#حكايه_ورا_كل_مثل
#ابتسام
تعليقات
إرسال تعليق