#فاطيما #الليله٣٨ #الجزء_الاول

#فاطيما
#الليله٣٨
#الجزء_الاول

واحده بتحكيلي بتقولي شعر بنتها مش عاجبها علشان مش طالع ناعم زي شعر اخوها

ودا مضايقها ومضايق البنوته 

وبعد كلام كتير عن تنمر اقارب من العيله من نوعية 

ان بنتك كارته 
اوانها اموره بس لو شعرها ناعم 
وعن حاجات كتير بعضها كيد وبعضها غيره وبعضها ايذاء نفسي كده تطوعي لوجه الشيطان لان الاذي لا يكون لوجه الله لان في اعتقادي دي اسائه ادب مع الله ف في الحديث 

نرجع لموضوعنا 

انا بعد ما انبتها انها بتوصل لبنتها الاحساس ده وتخلي البنت نفسها تنكسر وتحس انها قليله 
وبعد ما اديتها شوية كلام مهذب وفي الوقت نفسه حازم وقاطع مع اي حد يتنمر ببنتي وشكلها 

من امثلته : 
*اتعيب الصنعه ام تعيب الصانع

* واللي ف ايده يخلق نمله ولا ضفر يعيب علي خلقة ربنا 

* وملاقوش ف الورد عيب

* وانتي ازاي تعيبي علي حاجه مش ف ايدنا نعملها  ولو ربنا كان عاوزه ناعم كان خلقه ناعم 

وكتير علي نفس النوعيه والمنوال وحسب المسافه اللي بينك وبين اللي بتكلمك اصدقاء مثلا او من سن بعض 
ولا طنط من الطنطات اللي ممكن يسموا بدنك بس مينفعش نرد بكلام يجرحهم لاننا ساعتها هنكون مش مؤدبات 

المهم في نهايه الحوار حكيتلها حكايه كنت سمعتها زمان وبطلة الحكايه بردو شخصيه حقيقيه زي #سكر

واسمحولي اخليها هي اللي تحكي حكايتها : 

#فاطيما 

انا فاطيمه اسمي فاطمه بس بحب اسم فاطيمه اكتر 

عندي ٢٢ سنه 

دلوعة العيله...  الحمد لله ربنا اداني حاجات كتيره 

ملامحي زي ما بيغني عمرو دياب كده ميتحكيش عليها او بيقول 
ملامحك جميله وكلك جميله☺️

مش غرور والله بس شكر النعمه ذكرها 

انا ف شكلي عيب واحد بس شعري وحش قولوا كيرلي قولوا مش ناعم 

بس الحقيقه هو اكرت 
اه وانا صغيره مره بنت جارتنا اتخانقت معايا ومع اني اجمل منها بكتير بس هي شتمتني وقالتلي يا كارته 

يمكن الموضوع دا عدي عليه سنين كتيره بس انا عمري ما نسيته 

علشان كده...  لازم اخلي شعري ناعم 
كنت بكويه في الكوافير كل اسبوع بيبقي سايح ونايح 

بس صاحبتي قالتلي علي حل اجمد 
قالتلي اعمل جلاد كريم لفرد الشعر ايامحكايتي مكانش في بروتين ولا كرياتين 

بتجيب انبوبه وتفضيها علي شعرك وتسيبها نص ساعه وبعدين تشطفه 
وبعدها بيكون مفرود وجميل وعمر ما حد يقول عليا كارته 

امي كمان كنت بحس انها زعلانه من فتله شعري وخشونته 
بس خلاص انا كده متظبطه من كله 

باركولي 

جالي عريس 🥰

مش اي عريس😜

دا جواهرجي...  كنت رايحه اشتري سلسله من عنده ومسابنيش اخرج من عنده الا اما خد عنوان بيتنا وقالي احدد معاد مع بابا ييجي يتقدم
انا طايره من الفرحه ايمن (العريس) بيتمنالي الرضا ارضي 

جاب شبكه الماظ وشقه حلوه ف مكان شيك وفيها كل اللي اتمناه 

انا بجهز دلوقتي بخرج من الصبح وارجع اخر اليوم مهدوده 

لازم اجهز بسرعه اصل العريس مستعجل ☺️

انا تعبت اوي لما افتكرت ايام الدوخه دي اكملكم بكره بقي 🙃

#انا_وانت_وساعات_الحظر
#اتعيب_الصنعه_ام_تعيب_الصانع
#فاطيما
#الجزء_الاول 
#ابتسام

تعليقات

إرسال تعليق

المشاركات الشائعة من هذه المدونة

#ليه_طيب_اكسر_وراه_قله؟ج٢#الليله٦٠٨

صورة
#ليه_طيب_اكسر_وراه_قله؟ج٢ #الليله٦٠٨ اما بقى الحدوته التانيه فبتقولك ان زمان وبردو ايام الفراعنه كانت لما الانسان يموت بيكسروا وراه اناء من الفخار  يعنى هنا كانت عاده مرتبطه بالجنائز  وطبعا كلنا عارفين اهمية الموت و الحياه الابديه والكلام دا كله عند المصريين القدماء واظن انى لسه مخلصه سلسلة ايزيس وازوريس اللى بتحكى باستفاضه ف اهمية الدفن والليله دى  طب بردو ليه نكسر وراه حاجه فخار واللى رسيت ع القله لاننا بقينا نستخدم معادن وصينى واوانى تانيه حاليا  انما القله فهى اللى كانت مكمله حتى دخول التلاجه الايديال ال ٨ قدم لكل بيت نرجع لكسر القله الفكره انهم مش بس بيكسروا القله لاء وكمان بياخدوها ويدفنوها جنب قبر المرحوم طيب الله ثراه ... ودا ليه؟ علشان لما ترجع الكا يعنى (الروح) على بيته مره تانيه مره ماتأذيش اهل البيت اللى موجودين فيه دول كانوا بيعملوا الاكل ف البيت وياخدوه عند مكان المقبره وياهم وهناك ياكلوا وبعدين يكسروا الاوانى دى ويسيبوا الفخار الكسر هناك  واللى كانوا بيسموه الشِقف جمع شقفه لدرجة ان المتخصصين فى الآثار وهم بينقبوا لو لقوا ف مكان ما آنيه  فخاري...
قراءة المزيد

#هو_صحيح_الجوع_كافر_بس_مش_للدرجه_دى؟؟؟ج٢#الليله٦٥٠

صورة
#هو_صحيح_الجوع_كافر_بس_مش_للدرجه_دى؟؟؟ج٢ #الليله٦٥٠  زى ما قولنا كان الموسم الزراعي في شمال العراق اواخر عام ١٩١٧ سئ جداً ومطر قليل ومحصول ضعيف و بيقول محمد امين العمري  واللى كان ف الوقت ده ضابط اعاشة في الجيش السادس التركي ويعتبر شاهد عيان ع الفتره دى بيحكى ويقول : انه كتب تقرير للقائد خليل باشا وضح فيه الخطر اللي هيحصل في ولاية الموصل بسبب قلة الحبوب و انهم ضرورى يستعدوا ويجيبوا مؤن من اسطنبول و يلحقوا الدنيا قبل فوات الاوان   لكن خليل باشا كبر دماغه و مهتمش للتحذير ده وقال له  ان ولاية الموصل هي مستودع تموين العراق و هي مش  محتاجة تموين يجي لها من بره يا حبيبى احنا ناخد ومنديش بس زى ما توقع محمد امين العامرى بدأت المجاعه حصل ايه ف المجاعه ؟ هل تداركت الحكومه الغير واعيه سوء الحال ؟ ولا ايه اللى حصل؟ ازاى اتعامل اهل الموصل مع المجاعه؟ اقولكم اولا زى ما توقع ضابط الاعاشه بدأت المجاعة تستفحل وشملت الموصل والمنطقة الواسعة اللى ف الشمال منها لحد بحيرة ((وان)) وبدأت جموع من الجياع تهجر ديارها في الاناضول وتتوجه ناحية الموصل  ما الكل بقى فاكرها مليانه خير...
قراءة المزيد

#زئرده #الليله١٠١

صورة
#زئرده #الليله١٠١ الحدوته المرادى حقيقيه زى حكايه #الشنطه_المعجزه  اللى ده الرابط بتاعها https://www.facebook.com/102264164820545/posts/142331610813800/ بردو جيران ماما زمان ف الحى العريق والشارع الجميل (( ابن الرشيد )) اللى لا اتولدت فيه ولا عشت فيه بس حبيته من حب امى فيه ومن حكاياتها عنه  (( زئرده ))  دى واحده جارتهم وباين من اسمها -اللى طبعا مش اسمها الحقيقى - ولكن الناس كانوا مسمينها كده لانها كانت صغننه الحجم  تقريبا كان اسمها نوال بس اللى كانت الدنيا كلها بتناديها بيه كان زيئرده كانت متجوزه بس معهاش اولاد وجوزها كان بيشتغل ف بلد تانيه وبييجى يشوفها كل فتره  وعلشان كده كانت عايشه ف شقه ف بيت اهلها بس بتبات لوحدها ف شقتها كان الناس كلها عارفين انهم مرتاحين ماديا  وف ليله صيفيه حاره حين لم يكن يوجد لا تكييف ولا حتى مروحه فى هذا الزمان القديم  و حيث لا يوجد حل سوى ان تنهى ليلتك بدش بارد لتذهب للنوم متأخراً على ١١ونص ١٢ بالليل كده  بعد ساعه ولا ٢ اما المدينه كلها تغرق فى سبات عميق مفيش صاحى  كانت كالعاده بايته لوحدها وحست بحركه معاها ف اوضة ...
قراءة المزيد