#الشاطر_حسن_وست_الحسن_والجمال #الليله٤٣#الجزء_الرابع_والاخير

#الشاطر_حسن_وست_الحسن_والجمال

#الليله٤٣

#الجزء_الرابع_والاخير

اخد الشاطر حسن الضفيره ولفها حوالين وسطه تحت الحزام و شال الشوال ومشى 

المرادى رجع من سكه تانيه غير اللى جه منها مشى من بلد لبلد علشان يرجع لبلده ويرجع بالعلاج لوالده 

وعدى على بلد ولقى المنادى بينادى 

ويقول :  اللى عنده علاج لعيون بنت الملك يتقدم ولو عالجها له الهدايا والعطايا ولو ما عالجهاش هتتقطع رقبته وتتعلق على اسوار المدينه 

وفعلا بيرفع راسه لقى متعلق على سور المدينه 99 راس 

قرب الشاطر حسن من قصر الملك وسأل الحارس قاله ليه العقوبه الشديده دى 

قاله الحارس : اصل من ساعة ما تعبت بنت الملك الوحيده وعنيها مبقتش تشوف بيها والملك حزن وقرر يقدم هديه كبيره للى يعالجها 

بس اتقدم كتير من راغبى الثروه  من الجاهلين اللى تعبوا و اجهدوا الاميره لحد ما نفسيتها بقت وحشه ورفضت العلاج علشان كده الملك قرر إن اللى يفشل هتكون عقوبته الموت ودا ممنعش المغامرين انهم يتقدموا ودى كانت عقوبتهم 

بس الشاطر حسن قاله بكل هدوء طب لو سمحت بلغ الملك انى هاعالج بنته باذن الله 

الحارس استغرب من جرأته وقاله حاضر 

ودخل الشاطر حسن على الملك اللى عاد عليه نفس الشروط بس الشاطر حسن كان واثق بتوفيق ربنا وبالعلاج اللى معاه

دخل الشاطر حسن على الاميره وطلع ورق النبات اللى معاه وحطه على عنيها وربطها وفضل يغير الورق كل يوم لمدة 3 ايام 

وبعدين شال الرباط من على عنيها لقاها خفت وبقت بتشوف بعنيها 

فرح الملك اوى وقرر انه يكافئه قاله : انا هأجوزك بنتى و اديك نص مملكتى دلوقتى وتبقى انت الملك بعد عمرى ما ينتهى 

طبعا اى حد كان هيفرح بالعرض بس الشاطر حسن قلبه مبقاش ملكه هو بيحب ست الحسن والجمال اللى عارف انه عمره ما هيشوفها تانى بس بردو معندوش اى إستعداد يتجوز غيرها 

شكر الملك وقاله انا عملت كده لوجه الله لانى عارف الم جلالتك على عيون بنتك وحاسس بيك وانا لازم ارجع لابويا بالعلاج هو كمان 

الملك قاله اشكرك يا شاطر حسن على شهامتك واسمحلى اديلك فرس يساعدك على سفرك لبلادك 

شكره الشاطر حسن تانى وخرج علشان يسافر لقى الملك امر بتجهيز فرس كبير وقوى وحمل عليه دهب وجواهر وهدايا قيمه كتير 

اخد الشاطر حسن الفرس وكمل سفره لحد ما رجع عند الشجره اللى اتفرق هو واخواته تحتها 

وحفر ولقى خواتم اخواته زى ما هى تحت الشجره اخد خاتمه ودفنهم تانى 

وقال : قبل ما ارجع لابويا بالدوا لازم اطمن على اخواتى واطمنهم  عليا 

وفعلا مشى لسكه السلامه ودور لحد ما لقى اخوه حسين قاعد بيشتغل عند واحد قهوجى وعمال يقدم المشاريب للناس 

لما شافه معرفهوش من اللبس الحلو اللى كان لابسه والفرس اللى راكب عليه الشاطر حسن راحله ونده عليه واخده معاه 

وراحوا سكة الندامه ودوروا على اخوهم التانى حسونه ف لقوه شغال عند واحد جزمجى عمال يزعقله ويشتمه ماهى سكة الندامه بقى 

اخدوا اخوهم ورجعوا للشجره اللى تحتها الخواتم بتاعتهم وف الطريق حكى لهم الشاطر حسن على كل اللى حصله واللى قابله من اول ما قابل الغول الاول 

كل حاجه كل حاجه ماعدا حكايه ست الحسن والجمال وضفيرتها اللى حوالين وسطه 

استمعوله اخواته واستغربوا اوى  من حكايته 

وقالوا:  ياه 😱 انت تعبت اوى وشوفت كتير استنى بقى لما ترتاح و احنا هتروح نجيب اكل نتغدى قبل ما نرجع لابونا 

وفعلا راحوا جابوا اكل واكل الشاطر حسن ولما سألهم : مش بتاكلوا ليه قالو له اصلنا جوعنا ف الطريق واحنا راجعين وكلنا كل انت 

الشاطر حسن اكل و مخدش خوانه اتاريهم حاطين منوم ف الاكل واول ما اكل نام ومدريش بالدنيا 

صحى  لقاهم سايبينه تحت الشجره وواخدين خواتمهم من تحت الشجره و كل حاجه كانت معاه الفرس و الجواهر اللى عليه والشوال اللى فيه العلاج وكل حاجه عرف الشاطر حسن انهم خانوه 

بس كان لازم يرجع لابوه يطمنه ويطمن عليه 

راح الشاطر حسن بيتهم وطبعا ابوه اما شافه 

قاله : تو ما شرفت انت جيت بعد ما اطمنت ان اخواتك جابوا العلاج 

قاله الشاطر حسن هم :  قالولك كده 

قاله ابوه : طبعا ولادى حبايبى تعبوا وخاضوا مغامرات علشان يجيبوا ليا العلاج 

طبعا هم قسموا الثروه اللى على الحصان وما قالوش لابوهم عليها 

الشاطر حسن مطولش ف الكلام كان موجوع من خيانة اخواته ومن ان ابوهم صدقهم وكدبه هو 

اخد الشاطر حسن بعضه ومشى 

وبعد ما خرج من البيت جه فارس ملثم يسأل عنه لحد ما وصل لبيته وسأل عليه والده وطبعا والده زم فيه وقال دا مش ابنى ولا اعرفه دا كان جاى يضحك عليا ويقول انه هو اللى جاب ليا العلاج لعنيا  

رد الملثم وقاله : اولادك دول هم اللى بيضكوا عليك والشاطر حسن مكذبش عليك ف حاجه هو فين بقى ؟  

قاله  الاب : مشى دلوقت

 

واتلفت للاولاد يهزقهم 

اما الفارس الملثم فخرج بسرعه يدور على الشاطر حسن ولحقه 

نده عليه بعد ما عيل من الشارع شاور عليه وقاله هو ده الشاطر حسن 

الشاطر حسن التفت له وقاله :  انت مين؟ وعاوز ايه؟

قاله : انت بقى الشاطر اللى قتل حراس  القصر و الاسود والنمور واخدت ضفيره ست الحسن والجمال اخت الضفيره دى

وجاب من جيبه الضفيره التانيه 

قال الشاطر : ايه ده انت مين ؟ وعرفت منين حكايه الضفيره وانا محكيتهاش لمخلوق وجبت منين الضفيره دى اوعى تكون اذيت ست الحسن والجمال 

ولسه هايمد ايده على سيفه  شال الفارس اللثام من على وشه وطلعت ست الحسن والجمال 

قالت له : انا ست الحسن والجمال اللى قتلت حراسها و قتلت الاسود والنمور انا سألت  امنا الغوله قولتلها مين الجيش اللى هجم على قصرى مكنتش مصدقه انه راجل واحد وقولت اللى تتجوز الراجل ده مش محتاجه لاربع اسود واربع نمور ولا محتاجه لألف حارس لانك هتحمينى اكتر ما هم حمونى 

تقبل تتجوزنى يا شاطر حسن ؟

واتجوزوا👰 عملوا فرح امتد اربعين ليله وليله💃 

وعاشوا ف تبات ونبات وخلفوا صبيان وبنات 

وكنت عندهم وجيت حتى العشا ما اتعشيت

وتوته توته خلصت الحدوته

حلوه ولا ملتوته لوحلوه عليكوا غنوه ولو ملتوته عليكوا حدوته

 

#فرح_اربعين_يوم_وفالاخر_تمشى_امى_من_غير_عشا

#حكايات_امى_ادعولهابالرحمه

#لو_سمحتوا_قولوا_رأيكم

#ابتسام