#الشاطر_حسن_وست_الحسن_والجمال #الليله٤١#الجزء_التانى


#الشاطر_حسن_وست_الحسن_والجمال
#الليله٤١
#الجزء_التانى

وصل الشاطر حسن عند بيت الغول ومخافش وتقدم منه 
وقاله :  السلام عليكم ورحمة الله وبركاته يا ابونا الغول 

رد الغول وقاله : لولا سلامك سبق كلامك لأكلت لحمك قبل عضامك ، عاوز ايه ياشاطرحسن ؟؟

رد الشاطر حسن وقال عاوز اجيب ورق نبات الجلنجان اللى بيعالج العميان من قصر ست الحسن والجمال بنت الملك النعمان 

قاله بص يا شاطر حسن انا معرفش توصل ازاى بس ممكن ابعتك عند اخويا اللى اكبر منى واهو اكبر منك بيوم يعرف عنك بسنه 

شكره الشاطر حسن وكمل طريقه ووصل لاخو الغول اللى اكبر منه 

وقاله : السلام عليكم ورحمة الله وبركاته يا ابونا الغول 

رد الغول وقاله لولا سلامك سبق كلامك لاكلت لحمك قبل عضامك عاوز ايه يا شاطر حسن ؟

 رد الشاطر حسن وقاله :

عاوز اجيب ورق نبات الخلنجان اللى بيعالج داء العميان من قصر ست الحسن والجمال بنت الملك النعمان

قاله : ياااه بس دا اللى اعرفه انه مكان خطير عمر ما حد راحه ورجع منه ....  بس اقولك انا هابعتك لاختى الاكبر منى واهه اكبر منك بيوم يعرف عنك بسنه 

بس خلى بالك اختى بحالات لو روحت لقيتها رايقه وقاعده تغنى وتفلى ف شعرها💆‍♀️ يبقى كده امان اما لو روحت ولقيتها عنيها حمرا وناكشه شعرها👹 اوعى تقرب منها احسن تاكلك 

شكره الشاطر حسن وكمل ... ووصل بيت امنا الغوله  ... والحمد لله لقاها قاعده رايقه بتغنى وبتفلى ف شعرها 

وإتطمن الشاطر حسن وقرب منها 

وقالها : السلام عليكم ورحمة الله وبركاته يا امنا الغوله 

قالتله : لولا سلامك سبق كلامك لاكلت لحمك قبل عضامك عاوز ايه يا شاطر حسن ؟؟

الشاطر حسن قالها عاوز اجيب .......كملوا انتوا بقى 

قالت له : يااااه دى سكه خطيره وصعبه وعمر ما حد راح هناك ورجع 

بلاش احسنلك انت شاب وحرام عمرك يضيع 

لكن الشاطر حسن صمم وقال انا وعدت والدى انى  اجيب له العلاج ولازم ارجعله به

قالت : طب بص يابنى انت جاى من سفر طويل ومتعب وقدامك طريق اصعب ولازمك راحه قبل ما تكمل ارتاح النهارده عندى وانا هشوفلك صرفه ف موضوعك ده

بس هاقولك حاجه لازم تستخبى جوه لان ولادى زمانهم جايين دلوقتى ولو لقوك وشافوك ممكن ياكلوك 

دخل الشاطر حسن جوه بيت الغوله واول ما حط راسه نام و مدريش بنفسه من كتر التعب اللى شافه 

وبعد شويه جم ولاد الغوله 👿👿واول ما وصلوا البيت

 قالوا : 
إف .. إف ..  ريحة إنس لا مننا ولا من الجنس 

فى حد غريب عندنا يا امى
 
ردت الغوله بسرعه وقالت : اه يا ولاد دا اخوكوا الشاطر حسن اصلى قبل ما اتجوز ابوكوا👺 كنت متجوزه انسى 👳وخلفت منه الشاطر حسن 👲وسيبته عايش مع ابوه  وبعد كده جيت هنا اتجوزت ابوكم وخلفتكم 

ايه ؟  انتوا هتأذوا اخوكوا ولا ايه ؟!!👹

قالوا لها لاء طبعا يا امى منقدرش نعصاكى 

..........يتبع

#حكايات_امى_ادعولهابالرحمه
#لولا_سلامك_سبق_كلامك_لاكلت_لحمك_قبل_عضامك
#اكبر_منك_بيوم_يعرف_عنك_بسنه_ياما_ذليت_ولادى_بيها
#طاعة_امك_حتى_لو_كانت_غوله
#ابتسام

تعليقات

إرسال تعليق

المشاركات الشائعة من هذه المدونة

#ليه_طيب_اكسر_وراه_قله؟ج٢#الليله٦٠٨

صورة
#ليه_طيب_اكسر_وراه_قله؟ج٢ #الليله٦٠٨ اما بقى الحدوته التانيه فبتقولك ان زمان وبردو ايام الفراعنه كانت لما الانسان يموت بيكسروا وراه اناء من الفخار  يعنى هنا كانت عاده مرتبطه بالجنائز  وطبعا كلنا عارفين اهمية الموت و الحياه الابديه والكلام دا كله عند المصريين القدماء واظن انى لسه مخلصه سلسلة ايزيس وازوريس اللى بتحكى باستفاضه ف اهمية الدفن والليله دى  طب بردو ليه نكسر وراه حاجه فخار واللى رسيت ع القله لاننا بقينا نستخدم معادن وصينى واوانى تانيه حاليا  انما القله فهى اللى كانت مكمله حتى دخول التلاجه الايديال ال ٨ قدم لكل بيت نرجع لكسر القله الفكره انهم مش بس بيكسروا القله لاء وكمان بياخدوها ويدفنوها جنب قبر المرحوم طيب الله ثراه ... ودا ليه؟ علشان لما ترجع الكا يعنى (الروح) على بيته مره تانيه مره ماتأذيش اهل البيت اللى موجودين فيه دول كانوا بيعملوا الاكل ف البيت وياخدوه عند مكان المقبره وياهم وهناك ياكلوا وبعدين يكسروا الاوانى دى ويسيبوا الفخار الكسر هناك  واللى كانوا بيسموه الشِقف جمع شقفه لدرجة ان المتخصصين فى الآثار وهم بينقبوا لو لقوا ف مكان ما آنيه  فخاري...
قراءة المزيد

#هو_صحيح_الجوع_كافر_بس_مش_للدرجه_دى؟؟؟ج٢#الليله٦٥٠

صورة
#هو_صحيح_الجوع_كافر_بس_مش_للدرجه_دى؟؟؟ج٢ #الليله٦٥٠  زى ما قولنا كان الموسم الزراعي في شمال العراق اواخر عام ١٩١٧ سئ جداً ومطر قليل ومحصول ضعيف و بيقول محمد امين العمري  واللى كان ف الوقت ده ضابط اعاشة في الجيش السادس التركي ويعتبر شاهد عيان ع الفتره دى بيحكى ويقول : انه كتب تقرير للقائد خليل باشا وضح فيه الخطر اللي هيحصل في ولاية الموصل بسبب قلة الحبوب و انهم ضرورى يستعدوا ويجيبوا مؤن من اسطنبول و يلحقوا الدنيا قبل فوات الاوان   لكن خليل باشا كبر دماغه و مهتمش للتحذير ده وقال له  ان ولاية الموصل هي مستودع تموين العراق و هي مش  محتاجة تموين يجي لها من بره يا حبيبى احنا ناخد ومنديش بس زى ما توقع محمد امين العامرى بدأت المجاعه حصل ايه ف المجاعه ؟ هل تداركت الحكومه الغير واعيه سوء الحال ؟ ولا ايه اللى حصل؟ ازاى اتعامل اهل الموصل مع المجاعه؟ اقولكم اولا زى ما توقع ضابط الاعاشه بدأت المجاعة تستفحل وشملت الموصل والمنطقة الواسعة اللى ف الشمال منها لحد بحيرة ((وان)) وبدأت جموع من الجياع تهجر ديارها في الاناضول وتتوجه ناحية الموصل  ما الكل بقى فاكرها مليانه خير...
قراءة المزيد

#زئرده #الليله١٠١

صورة
#زئرده #الليله١٠١ الحدوته المرادى حقيقيه زى حكايه #الشنطه_المعجزه  اللى ده الرابط بتاعها https://www.facebook.com/102264164820545/posts/142331610813800/ بردو جيران ماما زمان ف الحى العريق والشارع الجميل (( ابن الرشيد )) اللى لا اتولدت فيه ولا عشت فيه بس حبيته من حب امى فيه ومن حكاياتها عنه  (( زئرده ))  دى واحده جارتهم وباين من اسمها -اللى طبعا مش اسمها الحقيقى - ولكن الناس كانوا مسمينها كده لانها كانت صغننه الحجم  تقريبا كان اسمها نوال بس اللى كانت الدنيا كلها بتناديها بيه كان زيئرده كانت متجوزه بس معهاش اولاد وجوزها كان بيشتغل ف بلد تانيه وبييجى يشوفها كل فتره  وعلشان كده كانت عايشه ف شقه ف بيت اهلها بس بتبات لوحدها ف شقتها كان الناس كلها عارفين انهم مرتاحين ماديا  وف ليله صيفيه حاره حين لم يكن يوجد لا تكييف ولا حتى مروحه فى هذا الزمان القديم  و حيث لا يوجد حل سوى ان تنهى ليلتك بدش بارد لتذهب للنوم متأخراً على ١١ونص ١٢ بالليل كده  بعد ساعه ولا ٢ اما المدينه كلها تغرق فى سبات عميق مفيش صاحى  كانت كالعاده بايته لوحدها وحست بحركه معاها ف اوضة ...
قراءة المزيد