#خاطف_الكلاب #رحله_الى_جزر_لانجرهانز #الليله٤٦#الجزء_الثاني

#خاطف_الكلاب

#رحله_الى_جزر_لانجرهانز

#الليله٥٠

#الجزء_الثاني

نكمل 

طب بيعمل ايه بالكلاب دي كلها 

الموضوع انه بيخلي كلب مريض بالسكر بعد ازالة البنكرياس وتحويله لمريض سكر 

وبيجيب كلب تاني و بيتلفوا كل البنكرياس ماعدا جزء واحد اللي هو عند د. بانينج اقتناع ان دا اللي فيه العلاج ودا سمه جزر لانجرهانز ودا علي اسم العالم الالماني اللي اكتشفها عام 1869

والجزر دي حكايه اسمحولي اكلمكم عنها باختصار

دي مجموعه بقع صغننه علي البنكرياس عددها  مليون بقعه ياااااه دي كبيره اوي

وزنها ١ مليجرام ياااااه دي صغيره اوي

استني.... دي مش كلها لها وظيفه واحده دول الفا وبيتا و دلتا وليله سعاتك 

وكل واحد من دول له مهمه اساسيه ف جسمنا

المهم نرجع للراجل الطيب اللي عمال يلف ورا الكلاب طول الليل ده ويرجع ميرتاحش 

هو والمساعد بتاعه خدوا الجزء  الصغير ده و فتتوه حقنوه  في الكلب الاولاني اللي هم خلوه مريض سكر 

مرت الدقايق بطيئه وهم بيبصوا للكلب اللي اتحقن 

ربع ساعه خدوا دم وحللوا 

الجلوكوز لسه عالي ف الدم

ربع ساعه كمان وحللوا .... الجلوكوز بدأ ينزل وكانوا مش مصدقين نفسهم 🙀

استنوا شويه كمان وحللوا 

واو ... يس💪

الجلوكوز بقي طبيعي في دم الكلب 

واصبح الكلب 410 كلب تاريخي لانه اول مريض سكر تم علاجه 

الفرحه مكانتش سايعه د.  بانينج 

وجري بلغ رأيس القسم بروفيسور ماكليود 

اللي فرح معاهم واداله معمل كبير ومجهز باحدث الاجهزه 

وكمان ادالهم مساعد دكتور صيدلي اسمه جيمس كوليب 

اصل فكرة حقن جزء  مفتت من البنكرياس دي صعبه وبتخلي الجرعه اللي بيستخرجوها غير نقيه 

 وانتشر الخبر والدنيا كلها بقت تتكلم عن اختراع علاج للمرض اللي لا شفاء منه نهائي واللي مريضه هيموت هيموت لا تقولي بقي سارس ولا كورونا دي اللي بتموت 2% من المصابين بيها التافهه دي

السكر ف الوقت ده بيجيب اجل اللي يجيله بلا نقاش 

واتشهرت الماده الاكسير واتسمت أنسولين نسبه للكلمه اللاتينيه انسولا يعني جزيره نسبة الي جزر لانجرهامز

ولشهرة الموضوع واهميته اتعرض عليهم يحضروا مؤتمر طبي ف امريكا يقولوا فيه نتايج ابحاثهم

وعم بانتنج مفلس ممعاهوش تكلفه السفر من كندا لامريكا 

وراح بروفيسور ماكليود 

والا وعمل حركه نص كم وقدم البحث باسم القسم وان د. بانتنج هو بس المشرف ع الابحاث 

واتجنن بانتنج ....يا عم دا لما كنت انت عايم ف مية البطيخ كنت انا بجرجر كلاب من الشوارع و اذا كان ولا بد حد يشاركني النجاح يبقي المساعد بتاعي بست اللي شاركني تعبي 

واستمرت التجارب 

صبي عنده ١٤ سنه اسمه ثومبسون كان علي علي حافة الموت زيه زي اي مريض سكر 

وبما ان اكديه ميت... واكديه ميت 

اهله قالوا جربوا عليه الدوا بتاعكم 

يجوز يكون حظه زي حظ الكلب 410 

وادوله الانسولين 

الولد كان سكره 440 

بعد ساعه بقي 220

بعد١٢ ساعه بقي 10 

حصل لثومبسون شويه حساسيه 

فوقف العلاج وحسنه ونقحة الصيدلي كيوليب 

#جايزه_نوبل

وكانت جايزه نوبل 1923

واترشح ماكليود وبانينج للجايزه 

وزعل بانينج زي ما قولنا واعلن انه اذا كان ولابد اقتسم الجايزه يبقي اقسمها مع اللي كان بينام معايا في المعمل د. بست 

في حضن الكلاب وسايب كلارك ف اجازته مع مزز تورنتو

رد ماكليود قال لاء دا اللي يستحق يقسمها د.كوليب  الصيدلي 

وبكده كل واحد قسم جايزته الماديه مع اللي قال عليه

ودي اول جايزه ف تاريخ نوبل تتقسم علي ٤

وبعد ٤٠٠٠ سنه من معرفة مرض السكر كان العلاج 

وف نفس السنه 1923

كان في ٢٥ الف مريض سكر اتعالجوا بالانسولين

واللي يعدوا دلوقتي بالملايين

وبعد كدا بقوا يستخرجوا الانسولين من الابقار والخنازير لحد لما اخترعوا الانسولين المائي ودا لانه كان بيعمل احيانا حساسيه لبعض المرضي

وبكده وبعد اكتر من ٤٠٠٠ سنه من ملاحظه احد الاطباء لطابور نمل بيتجه ناحيه بول واحد معين من عينات البول اللي واخدها 

واللي مش عاوزه اقول هو عرف ازاي ان فيه سكر 🥵

تم اكتشاف علاجه 

و نتعلم من الحكايه دي ايه : 

** ممكن يكون وصولك لهدفك مش هو هدفك يعني د.  بانتنج كان ممكن يكتفي بعيادته ويقول بكره هتمشي كان عاش ومات دكتور ف عياده ميعرفوش الا  سكان الحي بتاعه وامه تفضل تقول انا ام الضاكتور انا ام الضاكتور

بس شغفه خلاه خد نوبل واتغنيّ واتشهر واتحطت صورته علي غلاف مجلة تايم وما ادراك ما بذلك من مجد واتعمل طابع بوسطه باسمه موجود ف الصور تحت 👇

وخلانا بنجيب ف سيرته بعد مرور ١٠٠ سنه علي انجازه

**الشغف والحلم والفشل والسقوط ممكن تكون نهايته مبهجه والراجل متعبش كتير ولا حاجه  دا راجع من الجرب سنه 1920خد نوبل 1923

بعني ٣ سنين شقا وبعد كده عاش يحصد نتايجهم عمره كله

** اما ميكونش معاك فلوس استلف بس اعرض انت نجاحك بنفسك لان النجاح له الف اب ومدعي شهره 

ليا صاحبتي كانت حامل ف ٥ بيبيهات ف بسم الله ماشاء الله وتابعت مع دكتور صغير حديث في مستشفي التأمين  من اول الحمل لاخره بكل مشقته وقلقه علي ام وخمس اجنه ولما ولدت كل رؤساء القسم في المستشفي اتصوروا مع البيبهات وحطوا صورهم ف العياده وطلعوا ف الجرايد و برامج التليفزيون وكأن هم اللي جابولها البيبيهات دي مع انها مجرد شاركوا ساعة الولاده

سؤال : لو عجبتكم القصه قولوا اعمل غيرها حواديت عن اكتشافات علميه او ادويه ولقاحات

سؤال اخير : استخدام المصطلحات او الاسماء كان ممكن اغفاله بس قولت اخلي المعلومات ثريه ولو اسم اتقال قدامي ابقي فاهمه 

وكمان خلي العلماء الله يرحمهم ينبسطوا اننا جيبنا سيرتهم فلو كتير قولوا اقلل

العلم مش جاف زي ما كنا فاهمين غيرش بس حفظ جدول الضرب ... والجدول الدوري هم اللي كرهونا ف العلمي 

#مش_كل_العلم_تفاحه_وقعت_علي_راس_نيوتن 

#دور_علي_شغفك_دور_ع_الحاجه_اللي_بتحبها

#انا_وانت_وساعات_الحظر

#ابتسام