#الخيانه_حلقة ٥ #الليله٣٩٢ #حتى_انت_يا_بروتس_القصه_الثانيه #الجزء_الثانى
#الخيانه_حلقة٥
#الليله٣٩٢
#حتى_انت_يا_بروتس_القصه_الثانيه
#الجزء_الثانى
الفكره ان يوليوس قيصر كان بالفعل رجل عظيم عمل اللى محدش غيره عرف يعمله وحّد روما المتمزعه وحمىّ البلاد داخليا من الفتنه وخرج ورا بومبى وحاربه كتير لحد اخر معركه بينهم اللى كان جيش بومبى ٣ اضعاف جيش قيصر
بس قيصر انتصر مع ذلك واستسلم الاعداء ليوليوس قيصر اللى عفا عنهم بطريقه اعداؤه نفسهم قالوا لو كان احنا اللى انتصرنا مكناش هنبقى بالجدعنه دى مع يوليوس
لدرجة مثلاً انه لما دخل خيمة اعداؤه بعد انتصاره عليهم امر بحرق المراسلات اللى لقاها بينهم من غير ما يقراها
يعنى انسان عايش بلا ادنى قدر من فضول☹
بس فى حاجه ...
فى واحد اسمه كاتو وهو من اعداء قيصر هرب على افريقيا علشان يكون جيش جديد ويرجع لقيصر
اما بومبى بعد هزيمته راح على مصر
وهنا بقى اسمحولى اخرج من قصة الخيانه دلوقتى وادخل معاكم كده على حبيبة قلبى مصر
نرجع بالزمن كام سنه لورا كده قبل التاريخ اللى ذكرناه الليله اللى فاتت ...
مصر كان بيحكمها ملوك يونانيين او زى ما قلت قبل كده اغريق = يونانيين
ولان بالصدفه كده اول واحد حكم مصر منهم بعد الاسكندر المقدونى كان اسمه بطليموس فبقى كل الملوك اللى بعده اسمهم بطليموس اللى هى جمعها بطالمه
وبكده بقت مصر مملكه مصريه يحكمها البطالمه اليونانيين
حلو كده 😊
البطالمه داخلين على ٣٠٠ سنه بيحكموا مصر هم لسه مقفلوش ال ٣٠٠ يعنى بس قربوا
المهم ان وقت ما الدنيا كانت والعه ف روما مصر ف حالها لا بيها ولا عيها ولا حواليها
الا وقامت ف دماغ قيصر انه يحكم قبرص
وبطليموس ال١٢ ساكت
طب يا عم الحاج قبرص دى تبع مصر
و هو ساكت
ياعم بطليموس ال١٢ اعمل منظر حتى
وهو ساكت
المصريين بقى لما لقوا بطليموس ساكت هم مسكتوش وقامت عليه ثوره كبيره ف اسكندريه
الله ... طب ليه مش ف القاهره لان ساعتها مكانش فى قاهره اصلا كانت مدينه على اد حالها كده اسمها ممفيس اه اللى خدته شركة الادويه دلوقتى وخلدته
انما الاسكندريه هى العاصمه وساعتها الملك اللى ساكت
قال لاااااااااااا
انا مش هاسكت بعد كده😠تانى
انا لازم احل المشكله دى
وقام هرب على روما
اه والله ... راح استخبى ف حضن العدو ووعدهم انه يديهم 6000 تالنتوم وهو نص دخل مصر
يا صلاة النبى
وقيصر زى ما قلنا كان راجل مبادئ فوعد ووفى وعدل عن احتلال مصر
تصدق يا يوليوس مش خساره فيك النياج الحمر قصدى ال6000 تالنتوم ولا شهر ٧
بس بطليموس ال١٢ مات
لكن هو معاه اسم الله عليهم ولاد وبنات
وهوب صنّاع القرار فى مصر قالوا منضيعش وقت ف حزن ونكد واللى راح راح ونخلى البلاد يحكمها ابنه اسم النبى حارسه وصاينه بطليموس ال١٣ وعلشان هو لسه عيل هوزوء بش.... ما علينا
خلى تحكم معاه اخته الكبيره العاقله المحروسه من العين كليوباترا ال٧
حلو ؟؟
حلو
ونجوزهم لبعض حلو ؟؟
لاء وحش اخ ايه اللى يتجوز اخته يا عم انت
يا بيه اللى بتقوله دا عيب وحرام
استنوا بس زمان كانت دى عادات الملوك ومكانتش حرام ولا مزمومه زى الان
ليه ؟
هاقولك
اولا : دول اساسا كفار وبيعبدوا اصنام فاستغفر الله العظيم مش هيفكروا بقى ف الحلال والحرام والشكليات دى
ثانيا : دول ملوك وبالتالى دمهم ملكى نادر مش هيتجوزوا من العوام ويدنسوا دمهم الازرق النادر بدم السوقه والدهماء
اه😆اللى هو احنا احنا سوقه ودهماء
وعلفكره دا كان منتشر بين الملوك بس ف الغالب يعنى عامة الشعب لاء
لاننا احنا بفضل الله ولاد حلال لا ينطبق علينا هذه النظريات القذره اصلنا كنا سوقه ودهماء
ثالثاً :
ازيدكم من الشعر بيت
ابوهم كانت متجوز كليوبترا ال٥ وال٦
ودولم جس وات ؟
واحده اخته كليوبترا ال٥
والتانيه بنته كليوبترا ال٦
ف العك واصل للركب ف جت يعنى على كليوبترا ال٧ اللى هتتجوز اخوها
معلش متزعلوش منى تعبت من الكتابه و هاكمل الزروطه دى الليله الجايه
متنسوش ال👍💬📌
#رجال_اندال_كانوا_مضرب_الامثال_وخلدهم_التاريخ٤
#حكايه_ورا_كل_مثل
#ابتسام
بطليموس الثانى عشر
بطليموس الثالث عشر
تعليقات
إرسال تعليق