#الخيانه_حلقة٩ #الليله٣٩٦ #حتى_انت_يا_بروتس_القصه_الثانيه#الجزء_السادس
#الخيانه_حلقة٩
#الليله٣٩٦
#حتى_انت_يا_بروتس_القصه_الثانيه
#الجزء_السادس
متزعلوش على قيصر اوى يعنى خليكم فرش وفرفيش زى ارملته كليوبترا ال٧
اللى اول ما قلبته عينت ابنها قيصرون بطليموس ال ١٥ ( اه اصل بطليموس ال ١٤ اخوها الصغير التانى دخل ف النص كده بعد موت بطليموس ال ١٣ كان عيل صغير عنده ١٢ سنه وبيقولوا مات مسموم تفتكروا مين اللى ممكن يخون اخوه الصغير التانى ويموته زى الاولانى )
المهم ان الملكه المصريه مضيعتش وقتها ودفنت حزنها ودموعها على يوليوس قيصر ف حضن مارك انتونيوس حبيبه وكبير قادته
فاكرينه دا اللى واحد من الخونه اسمه (تربونيوس) سحبه وشغله ف نقاش علشان يأخره عن الاجتماع علشان مينقذش قيصر
مارك انتونيوس لما حس انه قصر ف حمايته محبش يقيصر مع مراته وعجبه جو اسكندريه
ازاى ؟
دا اللى هنعرفه دلوقتى
بصراحه بعد ما خصنا حكاية اشهر خيانه ف التاريخ
اللى افرادها كلهم تقريبا اتخلدوا
الايطاليين خلدوهم بعد ما اتسمى على اسم يوليوس شهر ف السنه ولقب الحكام من بعده
والانجليز خلدوهم بروايه لشكسبير
والامريكان خلدوهم بفيلم لاليزبيث تايلور
والمصريين خلدوهم على بعلبة سجاير
و ان كان هم صحيح اتخلدوا بس انا مرضيتش اسيبكم كده ف وسط الحبكه الدراميه .... اصل روما مش هتسكت ع اللى حصل فى زعيمها
ولا ورثة قيصر هيسكتوا
ولا كليوبترا هتسكت قصدى يعنى تقعد ارمله كده من غير جواز ونفسيتها تتعب
طب اذا كان يرضيكم موت قيصر ميرضيكمش كليوبترا تقعد حزينه
واحنا اتفقنا انها كانت هتغنى احنا فريش وفرافيش مع روبى بس جت دينا الشربينى خطفت الاعلان منها زى ما خطفت عمرو...... من .... ما علينا
المهم نكمل مع اللى واجعه قلوب الملوك
واللى ابتدت ب اخوها وزوجها بطليموس ال١٣
وجابت اجل اخوها بطليموس ال١٤ بالسم
ثم يوليوس قيصر ابو ابنها هتقولوا عملتله ايه دا روخر هاقول كانت من اهم اسباب حنق الرومان عليه
ودلوقتى هاحكيلكم على حكايتها مع مارك انطونيو
اللى حبها ووجعت قلبه
ومش هتكلم عنكم يا اعزائى القراء اللى لسه واقعين تحت تأثير سحرها وبتتعبوا صدوركم مع سجايرها حتى الان
الست محطمة قلوب الملوك وجايبه اجلهم
و لحد دلوقتى مفلسه جيوب الرجال وقاطعه نفسهم
هتقولوا متفتريش يا ابتسام
هى يعنى علشان بختها مال ف جوازتين مره عيل صغير خِرع
ومره راجل عجوز اتجوزته علشان تأمن شره تقولى عليها نحس والارمله السواداء وكده
لا يا جدعان انا غلطانه
هاسيبكم انتوا تحكموا ف النهايه
احنا انتهينا ان كليوبترا بعد موت يوليوس قيصر اعلنت ابنها قيصرون ملك على مصر باسم بطليموس ال ١٥
هل بقى يا ترى قعدت بقى حزينه على جوزها وابو ابنها
ابداً ما احنا قلنا
دى ماشيه على مبدأ احنا فرش وفرافيش احنا فريش نحب نعيش
اه و كمان كانت بتعمل زى روبى كده
ف الوقت ده كانت الدنيا والعه ف روما من الناس اللى معجبهمش الاغتيال اللى حصل ليوليوس هو الصراحه ميرضيش اى حد عنده ضمير
والحكايه مش جهجهونى واللى غلط لازم يتعاقب
علشان كده اجتمع اهم ناس يهمهم دمه
١ - قيصرون ابنه من دمه ولحمه
لاء دا ف مصر مجاش روما واساسا الرومان مش معترفين به زى ماقولنا قبل كده
ولو راح روما كانوا هيعملوه بفتيك هو وامه
٢ - اوكتافيوس
اوكتافيوس دا بقى هيبقى حاجه مهمه اوى سواء ف قصتنا او على مستوى التاريخ عامة
اوكتافيوس كان قريب يوليوس قيصر من ام اوكتافيوس كانت بنت اخت قيصر وبتقوله يا خال
ابوه مات وهو عنده ٤ سنين وامه اتجوزت فإتربى مع جدته جوليا اخت قيصر
وبالتالى يوليوس اتبناه
احنا عارفين ان يوليوس خلف بنت واحده شرعيه اللى كانت مرات بومبى وماتت ف حمى نفاس
والواد بروتس ابن حرام واثبت كده بتصرفه فيما بعد ابن حرام مصفى يعنى
قيصرون ... ودا عيل صغير وابن امه ف اللى ممكن تكون ممشياه كليوبترا على ابنها ف مصر مينفعش تروح روما تعمله
المهم ان لما قيصر اتقتل لقوا ف وصيته انه ترك مايقرب من ⅔ ثروته له
دا غير انهم ادله لقبه
قيصر كان بيحب اوكتافيوس علشان ف مره لما كان قيصر رايح مصر يحارب اوكتافيوس ركب مركب وحصله المركب اتحطمت حصل بقارب لحد البر وهناك عدى على معسكر العدو لحد ما وصله ودا خلى قيصر يستجدعه ويقربه منه
٣ - مارك انطونيو
دا كان قائد مقرب من يوليوس وكان دراعه اليمين شاب وسيم طيب شجاع كريم ولكن كان يموت ف اللهو و الخمره والستات ومشهور عنه انه خاربها حتى اثناء الحروب
طبعا بروتس بعد ما وقعت الفاس ف الراس وموت يوليوس طلع حاول يهيج الراى العام ضد قيصر و دا علشان يبرر قتلهم لقيصر
وف الوقت ده مارك انطونيو طلع على الجماهير وقدر بسرعة بديهه انه بحول الرأى العام وخلاة يطالب بدم بروتس
اللى هرب بسرعه على المقاطعه اللى بيحكمها بره روما
مارك انتونى اخد جيش وطارد بروتس وعلى
وف الوقت ده رجع اوكتافيوس
مكانش ف روما ساعة الاغتيال
ونكمل بكره
اصل الموضوع مشنكل اوى ف بعضه وانا عاوزه افكه بطريقه سهله زى ما عودتكم
ومتنسوش 👇
👍 و 💬 و 📌
#رجال_اندال_كانوا_مضرب_الامثال_وخلدهم_التاريخ٨
#حكايه_ورا_كل_مثل
#ابتسام
تعليقات
إرسال تعليق