#الشاطر_حسن_وست_الحسن_والجمال #الليله٤٢ #الجزء_التالت

#الشاطر_حسن_وست_الحسن_والجمال

#الليله٤٣

#الجزء_التالت

امنا الغوله قالت لولادها الاتنين انتوا اصطادتوا ايه قالولها : غزاله قالت لهم طب هاتوها عاوزاها اخوكوا ياكلها وروحوا دلوقتى اصطادوا حمار واى حاجه ناكلها احنا 

مشى ولاد امنا الغوله وهى مسكت الغزاله شوتها و حطتها للشاطر حسن و صحته من النوم وقالت له : اصحى يا شاطر حسن قام الشاطر حسن وهو مش مصدق نفسه انه لسه عايش وان اللى بتقدمله الاكل هى امنا الغوله بنفسها ..... صحى واكل كان ميت من الجوع

وكان ولاد الغوله جم ومعاهم حمار صايدينه 

قالت لهم قطعوه اربع اجزاء 

ولما قطعوه قالت للشاطر حسن خد معاك الحمار ده وروح عند شط البحر  ((النهر )) وهناك صفر هيطلعلك من الميه سيد قشطه ارميله ربع حمار هيتلهى فيه وياكله تقوم انت تركب على ضهره هيمشى بيك ف الميه ولما يخلص اللى بياكله ف  الميه هيتلفت علشان ياكل رجلك تروح انت رامى له ربع تانى من الحمار 

وكل يتلفت تانى ترميله جزء لحد ما توصل للشط التانى ساعتها ترمي اخر ربع معاك وتنزل من على ضهره وهو مشغول ف الاكل ...

 وبعد كده ربنا معاك يا بنى ... معرفش اساعدك اكتر من كده ...

شال الشاطر حسن الحمار وراح لحد الميه ونفذ اللى قالت له عليه امنا الغولة و لما عدى الشط التانى لقى قدامه قصر كبير اوى واسواره عاليه خالص لف حوالين القصر من غير ما حد من الحرس الكتير اللى محاوطين بالقصر يشوفه انه يلاقى منفذ او حته واطيه ملاقاش خالص رجع تانى عند البوابه اللى هى المدخل الوحيد للقصر حاول  يعد الجنود لقاهم مئات 

فكر وقال اه انا شجاع بس دول كتير اوى والكتره يا شاطر حسن  تغلب الشجاعه

لقى شجره قدامه تسلقها وطلع عليها بقى شايف الجنود وسامعهم وهم مش شايفينه

جه الليل والجنود بدأوا يتكلموا قالوا احنا كل يوم نقف الوقفه دى و عمر ما حد فكر يقرب ناحيتنا طب احنا 1000 جندى نقسم نفسنا 500 يناموا و 500 يفضلوا يحرسوا القصر و لو حصل حاجه ابقوا صحونا 

نام 500 وفضل  500 صاحيين 

بعد شويه قالوا طب ما نتقسم  و 250 يفضلوا صاحيين و250 يناموا وفضلوا كده يتقسموا و النص اللى صاحى يتقسموا 

لحد ما اتفضل ف الاخر 2  واحد منهم قال للتانى انا هنام ولو حصل حاجه صحينى 

وطبعا الجندى اللى صاحى بص حواليه ولقى الكل نايم وهو الوحيد اللى صاحى قال يعنى هى جت عليا انا وراح نايم هو كمان 

ودى كانت فرصه الشاطر حسن نزل من على الشجره و طلع سيفه وموت الالف جندى ودخل القصر 

ولما دخل القصر من جوه قابله 4 اسود وتانى مسك سيفه ونزل فيهم طاخ ...  طيخ ...  طوخ ... طخ .... لحد ما موتهم الاربعه

ودخل على الجنينه وهناك كان محتار النباتات اول مره يشوفها ومش عارف فين النبات اللى هو عاوزه راح داخل وهو مش عارف يعمل ايه !!!

بس اول ما داس على اول زرعه سمع صوت طالع من النبات ده

 بيقول : اى ... اى ... انا نبات الوناس اعالج داء النعاس

جرب وداس على نبات تانى لقاه بيقول : اى ... اى ... انا الجب اعالج داء القلب 

وفضل الشاطر حسن يدوس على كل نبات يقابله لحد ما سمع نبات بيقول انا نبات الخلنجان بعالج داء العميان 

جمع منه الشاطر حسن وعبى شوال كان معاه

وخرج من الجنينه ولسه هايخرج من باب القصر فكر كده وقال ف نفسه يعنى اكون هنا وجوه قصر ست الحسن والجمال اللى الناس كلها بتتحاكى بجمالها و ما ابصش عليها بصه وركن الشوال جنب الباب ورجع طلع السلم اللى بيطلع ع الدور التانى اللى فيه ست الحسن والجمال 

بس اول ما طلع لقى ف وشه 4 نمور شرسين وبيستعدوا انهم يهاجموه وبسرعه طلع سيفه  وطاخ ...طيخ ... طوخ ... طخ موت الاربع نمور 

وفتح باب الاوضه ولقى سرير كبير معمول من الدهب ومفروش بريش النعام وعليه ناموسيه زاحها ووقعت عنيه على اجمل بنت ف الدنيا ملامحها جميله وكأنها مرسومه و شعرها لون الدهب معمول ضفيرتين كل ضفيره مفروده جنبها واصله لرجلها

حبها اول ما شافها وعرف ليه سموها ست الحسن والجمال 

واتمنى انه يقضى باقى عمره يبصلها ولجمالها 

بس هو لازم يمشى بسرعه علشان كده وقبل ما يمشى طلع سيفه وقطع ضفيره من الضفيرتين ومشى 

وادرك ابتسام المنام ف هاسكت وبكره نكمل الكلام

بكره نكمل ......

#الام_ام_حتى_لو_كانت_امنا_الغوله

#ست_الحسن_والجمال_نومها_تقيل_اوى

#لاء_مبتشخرش_هو_لو_سمع_كان_قال

#حكايات_امى_ادعولهابالرحمه

#ابتسام