#الخيانه_حلقة٧ #الليله٣٩٤ #حتى_انت_يا_بروتس_القصه_الثانيه#الجزء_الرابع

#الخيانه_حلقة٧
#الليله٣٩٤
#حتى_انت_يا_بروتس_القصه_الثانيه
#الجزء_الرابع

قبل بقى الفتره اللى كان فيها قيصر بيفتح البلاد ويخضع العباد 
ويجعل من روما سيده على كل واد 

كان هو وبومبى وكراسوس مشكلين اول حكومه ثلاثيه وكانت الدنيا حلوه ونسايب وحبايب 

بس لما عم قيصر انشغل ال٩ سنين اللى بعدها بفتوحاته اللى حكيناها الليله اللى فاتت

بدات الخلافات تظهر بينهم والبعيد عن العين بعيد عن القلب 

وزادت الخلافات بين حلفاء الامس واللى زى ما قلنا انتهت بقتل بومبى على يد مستشارين بطليموس ال١٣ و كراسوس  كان مات قبلها 

وكده رجع يوليوس قيصر ليعلن نفسه حاكم دكتاتورى

هو قيصر من زمان هو وعيلته قبله كانوا بيكرهوا فكرة حكم البلاد من خلال اقليه من اعضاء مجلس الشيوخ بس سبحان الله يا اخى لما بقى جت ف ايده قرر يبقى دكتاتور

ودا زعل المجلس منه 
هو مش بس انه قرر انه يكون ديكتاتور 

ولكن كمان ... ودا الاهم 
بدأ يقفل عليهم صنابير الثراء اللى بيعبوا منها عباً من اموال روما .... زى ما نهينا الليله اللى فاتت قيصر كان عايز يبغدد
 عامة الشعب من الرومان بس منين واللى جاى اول باول داخل ف خزاين النبلاء 
ومع انهم جزائنهم كانت مليانه بس البحر يحب الزياده 

بس هم طبعا مش هيقولوا كده ... مش هيقولوا ان نجيب
نجيب مين ؟ 
قصدى يوليوس قيصر 

عاوز يرجع الخير للشعب ويرجعوا هم لثكناتهم يوووه ... قصدى قصورهم

وبالتلى مش هيقولوا كده لعامة الشعب ولكن بدأوا يشتكوا انه بيحط لنفسه تمثال وسط تماثيل الملوك القدماء العظماء 
وانه بيلبس اللون الارجوانى لون اثواب الملوك 
لاء دا ماسكين عليه ان مره كانوا ف حفله وشارين لهم كاسين ومارك انتونى مصمم يلبسه تاج الملوك 
طب ما هو رفض 
بس بردو

دا ف مره دخل عليه ٣ من كبار من رجال المعبد 
ومقامش وقف  يستقبلهم 

يقولوا دا كان عنده اسهال وخاف يقوم الا بطنه تقوم معاه ويزروط نفسه ويزروط الدنيا 
والله الكلام ده من التاريخ مش من عندى 
الا يزروط دى اللى من عندى😂

يسكتوا على كده ابداً

قالوا انه كل شويه والتانيه يبعت يجيب زوجته كليوبترا وابنه قيصرون ويستقبلوا ف روما استقبال الفاتحين 

وطبعاً دا كان بيجرح مشاعر زوجته  كلبيرنيا اللى اه بيبان اقدام الناس انهم بيحبوا بعض والحب مولع ف الدره بس الحقيقه ظاهره للعيان المزه المصريه واكله عقله

واللى زاد وغطى ان طلعت اوشاعه انه هينقل عاصمة ملكه للشرق 
عند المزه المصريه ف اسكندريه 

وبقى كله كوم و دا كوم  

وهنا بقى  بعد ما جهزوا الرأى العام ف باقى اعضاء مجلس الشيوخ وبالتعاون مع سكان روما الشرفاء كله اصبح ضده قرروا بقى التصفيه طب نعمل ايه 

قرروا انهم يغتالوه ابتدوا الناس اللى قرر يقصقص اديهم الطويله فى الاقاليم اللى بيحكموها يتجمعوا ويتأمروا 
وجمعوا معاهم قادة جيوشه اللى كانوا طمعانين انه يديهم مناطق يحكموها اكتر مما اخدوا فحانقين عليه 

وكان لازم واجهه

ومكانش فى واجهه احسن من بروتس 
لانه معروف عنه تمسكه بالفضيله 

وبعد ما جاوبنا على الاسئله اللى قلناها ف  الاول وقلنا هنجاوب من الاخر  للاول
وجاوبنا امتى ؟ ١٥ مارس ٤٤ق.م
وفين ؟ فى روما 
وحكينا بالتفصيل خان مين ؟ يوليوس قيصر اللى هو اسمه خلده التاري.....
بهزر مش هاعيد ٣ حلقات تانى ☺☺

نروح لاول سؤال مين بروتس ؟

هو ماركوس يونيوس بروتس ...كان المفروض ان بروتس ابن ماركوس جونيوس بروتس العظيم  وكانت أمه سرڤليا

ليه بقول المفروض ؟؟؟

اصل فى اوشاعات ان الاخت الفاضله سرڤليا اللى هى امه كانت تعرف  يوليوس قيصر ايام الشقاوه  ويقال ان كان  بينهم استغفر الله العظيم شقاوات كتيره نتج عنها عم بروتس ده وانها نسبته لعم ماركوس 

ويقال ان الاشاعه دى كانت منتشره وان يوليوس نفسه كان مصدقها لدرجة انه كان بيحنوا ويهتم ب بروتس حته زياده الضنا بقى حتى لو كان ابن حرام 

والحاجات دى بالاضافه للاشعاعات خلت الشك يزيد اكتر عند بروتس و يكرهه مع كل المعامله الحونينه اللى كان بيعاملهاله 
ليه ؟

دا اللى هنعرفه الجزء الجاى

ومتنسوش 👇

👍 و 💬 و 📌

#رجال_اندال_كانوا_مضرب_الامثال_وخلدهم_التاريخ٦
#حكايه_ورا_كل_مثل
#ابتسام

تعليقات

إرسال تعليق

المشاركات الشائعة من هذه المدونة

#ليه_طيب_اكسر_وراه_قله؟ج٢#الليله٦٠٨

صورة
#ليه_طيب_اكسر_وراه_قله؟ج٢ #الليله٦٠٨ اما بقى الحدوته التانيه فبتقولك ان زمان وبردو ايام الفراعنه كانت لما الانسان يموت بيكسروا وراه اناء من الفخار  يعنى هنا كانت عاده مرتبطه بالجنائز  وطبعا كلنا عارفين اهمية الموت و الحياه الابديه والكلام دا كله عند المصريين القدماء واظن انى لسه مخلصه سلسلة ايزيس وازوريس اللى بتحكى باستفاضه ف اهمية الدفن والليله دى  طب بردو ليه نكسر وراه حاجه فخار واللى رسيت ع القله لاننا بقينا نستخدم معادن وصينى واوانى تانيه حاليا  انما القله فهى اللى كانت مكمله حتى دخول التلاجه الايديال ال ٨ قدم لكل بيت نرجع لكسر القله الفكره انهم مش بس بيكسروا القله لاء وكمان بياخدوها ويدفنوها جنب قبر المرحوم طيب الله ثراه ... ودا ليه؟ علشان لما ترجع الكا يعنى (الروح) على بيته مره تانيه مره ماتأذيش اهل البيت اللى موجودين فيه دول كانوا بيعملوا الاكل ف البيت وياخدوه عند مكان المقبره وياهم وهناك ياكلوا وبعدين يكسروا الاوانى دى ويسيبوا الفخار الكسر هناك  واللى كانوا بيسموه الشِقف جمع شقفه لدرجة ان المتخصصين فى الآثار وهم بينقبوا لو لقوا ف مكان ما آنيه  فخاري...
قراءة المزيد

#هو_صحيح_الجوع_كافر_بس_مش_للدرجه_دى؟؟؟ج٢#الليله٦٥٠

صورة
#هو_صحيح_الجوع_كافر_بس_مش_للدرجه_دى؟؟؟ج٢ #الليله٦٥٠  زى ما قولنا كان الموسم الزراعي في شمال العراق اواخر عام ١٩١٧ سئ جداً ومطر قليل ومحصول ضعيف و بيقول محمد امين العمري  واللى كان ف الوقت ده ضابط اعاشة في الجيش السادس التركي ويعتبر شاهد عيان ع الفتره دى بيحكى ويقول : انه كتب تقرير للقائد خليل باشا وضح فيه الخطر اللي هيحصل في ولاية الموصل بسبب قلة الحبوب و انهم ضرورى يستعدوا ويجيبوا مؤن من اسطنبول و يلحقوا الدنيا قبل فوات الاوان   لكن خليل باشا كبر دماغه و مهتمش للتحذير ده وقال له  ان ولاية الموصل هي مستودع تموين العراق و هي مش  محتاجة تموين يجي لها من بره يا حبيبى احنا ناخد ومنديش بس زى ما توقع محمد امين العامرى بدأت المجاعه حصل ايه ف المجاعه ؟ هل تداركت الحكومه الغير واعيه سوء الحال ؟ ولا ايه اللى حصل؟ ازاى اتعامل اهل الموصل مع المجاعه؟ اقولكم اولا زى ما توقع ضابط الاعاشه بدأت المجاعة تستفحل وشملت الموصل والمنطقة الواسعة اللى ف الشمال منها لحد بحيرة ((وان)) وبدأت جموع من الجياع تهجر ديارها في الاناضول وتتوجه ناحية الموصل  ما الكل بقى فاكرها مليانه خير...
قراءة المزيد

#زئرده #الليله١٠١

صورة
#زئرده #الليله١٠١ الحدوته المرادى حقيقيه زى حكايه #الشنطه_المعجزه  اللى ده الرابط بتاعها https://www.facebook.com/102264164820545/posts/142331610813800/ بردو جيران ماما زمان ف الحى العريق والشارع الجميل (( ابن الرشيد )) اللى لا اتولدت فيه ولا عشت فيه بس حبيته من حب امى فيه ومن حكاياتها عنه  (( زئرده ))  دى واحده جارتهم وباين من اسمها -اللى طبعا مش اسمها الحقيقى - ولكن الناس كانوا مسمينها كده لانها كانت صغننه الحجم  تقريبا كان اسمها نوال بس اللى كانت الدنيا كلها بتناديها بيه كان زيئرده كانت متجوزه بس معهاش اولاد وجوزها كان بيشتغل ف بلد تانيه وبييجى يشوفها كل فتره  وعلشان كده كانت عايشه ف شقه ف بيت اهلها بس بتبات لوحدها ف شقتها كان الناس كلها عارفين انهم مرتاحين ماديا  وف ليله صيفيه حاره حين لم يكن يوجد لا تكييف ولا حتى مروحه فى هذا الزمان القديم  و حيث لا يوجد حل سوى ان تنهى ليلتك بدش بارد لتذهب للنوم متأخراً على ١١ونص ١٢ بالليل كده  بعد ساعه ولا ٢ اما المدينه كلها تغرق فى سبات عميق مفيش صاحى  كانت كالعاده بايته لوحدها وحست بحركه معاها ف اوضة ...
قراءة المزيد