#الخيانه_حلقة١٢ #الليله٣٩٩ #حتى_انت_يا_بروتس_القصه_الثانيه#الجزء_التاسع
#الخيانه_حلقة١٢
#الليله٣٩٩
#حتى_انت_يا_بروتس_القصه_الثانيه
#الجزء_التاسع
ازاى جت كليوبترا
مارك انطونيو كان قاعد على عرشه فى احد ميادين المدينه او اسواقها يعنى مستنيها تيجى بقى تعاااايط تعاااايط وتدفع عن نفسها من تهمة مساعدة اعداؤه
بس كليوبترا وصلت عن طريق النهر ف قارب مذهب و أشرعتة أرجوانية بنفسجى يعنى ودا زى ما قلنا قبل سابق انه اللون المخصص للملوك ومجاديفه من فضة يتمخطر على وش الميه على أنغام الناي و المزمار و القيثاره
يا زيدى .... يا زيدى
اما بحارة القارب فكانوا مش رجاله ولكن كانوا وصيفاتها اللى كانوا لابسين زى حوريات البحار و الهة الجمال
أما هي فلبست زىّ الزهرة فينوس
ورقدت تحت ستائر ومظله من قماش مذهب
لما أهل طرسوس سمعوا جريوا على شاطئ النهر وسابوا ماركوس أنطونيوس قاعد لوحده على عرشه ....
وعزمته على العشاء معها في قاربها فجالها ومعاه حاشيته الضخمه فعملت ايه بقى جهزت لهم وليمة عظمة
وقدمت لهم فيها احلى اكل محشى بقى وبط وملوخيه
ايه ده😳 مكانوش على ايامهم🤔
والله هم اللى خسرانين
والشراب بقى فانتا تفاح وشويبس رمان وسيناكولا
مكانش موجود بردو 🤔؟؟؟
وسيناكولا بالذات لاء ؟؟؟
مكانش فى الا جعه و نبيذ
وخمر
عموما هى وجبت معاهم جامد ف العشا الصراحه
دا غير الهدايا اللى قدمتها للقواد وغير طبعا الهِقّ والمِقّ
ماركوس اللى كان هيحبها وهى عيلة عندها ١٤ سنه
اما بقى دلوقتى فوقع فيها تماما ... وهى امراه ناضجة عندها٢٩ سنه ... ومدوباهم اتنين
وابتدأ كلامه معها يلومها على اللى عملته واختتمه بأنه أهدى لها
فينيقيا
وسوريا الوسطى
وقبرص
وأجزاء من قليقية
وبلاد العرب
واليهود
وكافأته هي ب🙈........ ما علينا بقى ...ربنا حليم ستار وعزمته انه يزورها فى إسكندرية
ووافق وقضى الشتا بعيد عن هموم الحكم ودوشته يعب حب الملكة عباً
ويشرب معها كأس الغرام حتى الثماله
ونسي الراجل ياختى أن له إمبراطورية محتاجة إلى يحكمها ... و زوجه اسمها فلفيا ف روما
أما هي فلا حبته ولا حاجه و لكن لانها كانت عارفه أن مصر الغنية وف نفس الوقت الضعيفة عاجلاً او اجلاً روما الطماعه القوية هتفكر فيها
وأن الحل الوحيد لنجاتها هى وعرشها أنها تتجوز بسيد روما
زى ما هى حاولت قبل كده من حوالى٥ سنين مع قيصر
واهيه بتحاول تانى مع ماركوس
وعلشان ماركوس كان نفسه ينفذ سياسه قيصر
ماشى على خطاه حرفياً😏
وتحقيق حلمه بتوحيد روما و مصر ونقل عاصمته إلى بلاد الشرق
وزى ما المثل بيقول تيجى يصيده يصيدك متعرغش بقى مين اللى هيصيد مين
بس فى حاجه تانيه اصل فعز ما انطونيو مقضيها ف مصر ضحك ولعب ومسخره وحب ( اصل مكانش فى جد ف الموضوع ) في إسكندرية
كانت فى مصايب بتحصل ف روما مثلاً مراته فلفيا وأخوها لوسيوس
عملوا ايه بقى
عملوا مؤامره على اكتافيوس علشان يسقطوه ويستولوا على الحكم ف روما الوليه دى شرانيه من زمان فاكرين لما حطت اسم جارها اللى مرضيش يبيع لها البيت بين اسامى المتأمرين ولما اتقتل علقت راسه وايده على باب بيته
طب عارفين ساكتس ابن بومبى ننوس عين جده يوليوس قيصر حفيده من بنته الوحيده الشرعيه المرحومه جوليا
اهو ساكتس دا كبر ... اه والله واتشاقى وحاصر روما ومنع عنها المؤنه والغذاء
ليه يا يا ساكتس يا حبيبى ؟؟؟
طب وانت يا ست فلفيا هانم ايه اللى قلبك كده على اكتافيوس ؟؟؟
اجابات الاسئله دى
وحل المشكلات دى كلها هنجاوبها الليله اللى جايه
خلى عم انطونيوس عايم على وش الفته مع ربة الصون والعفاف الست كليوبترا اللى مدوباهم اتنين
ومتنسوش 👇
👍 و 💬 و 📌
#رجال_اندال_كانوا_مضرب_الامثال_وخلدهم_التاريخ٩
#حكايه_ورا_كل_مثل
#ابتسام
تعليقات
إرسال تعليق