#اسماء_بنت_عميس #الليله٧١ #الجزء_الثالث
#اسماء_بنت_عميس
#الليله٧١
#الجزء_الثالث
والحياه بتستمر وزى ما فيها المرض والموت اللى بنصبر فيهم ... فنُأجر
زى ما صبرت اسماء
الحياه فيها الزوج والاولاد وشكر النعمه
وعاشت اسماء تشكر ربنا
واصبح اولادها من جعفر وابنها من ابو بكر واولادها من علي كلهم ف بيت واحد ولهم اب واحد مبيفرقش ببن اولاده كلهم هو علىّ بن ابى طالب مع ابناؤه من السيده فاطمه
وفي يوم اختلف ابناها محمد بن جعفر ومحمد بن ابى بكر ، كل واحد بيقول ان ابوه احسن من ابو التانى
ويطلب منها سيدنا على التدخل وفض الاشتباك
وتعالوا نسمع اللى حصل كده ....🦻
عن زكريا بن أبي زائدة : سمعت عامرا يقول : تزوج عليّ اسماء بنت عميس ، فتفاخر ابناها : محمد بن أبي بكر ، ومحمد بن جعفر ، فقال كل منهما : أنا أكرم منك ، وأبي خير من أبيك .
قال :
فقال لها علي : اقضي بينهما ، قالت : ما رأيت شابا من العرب خيرا من جعفر ، ولا رأيت كهلا خيرا من أبي بكر .
فقال علي : ما تركت لنا شيئا ؛ ولو قلت غير الذي قلت لمقتك . قالت : إن ثلاثة أنت أخسهم خيار .
يعنى بتمدحيهم هم الاتنين ومسيبتيش ليا حاجه من المدح ( طبعا بيهزر )
لانه بعد كده قالها لو كنتى قولتى غير كده كنت كرهتك (زعلت منك يعنى )
وعاشت مع على فتره خلافه عمر بن الخطاب وفترة عثمان بن عفان
وحدثت الفتنه الكبرى
وتجمع الناس بايعاز ودفع وتوجيه من المنافقين فى المدينه وعلى رأسهم عبد الله بن سبأ
وحاوطوا بسور بيت عثمان وطبعا هو مين ممكن يتأثر ويتضحك عليه الا الشباب اللى عندهم حماسه واحيانا كتيره تهور
ومن ضمن الشباب كان محمد بن ابى بكر الصديق من اسماء بنت عميس
نط السور ودخل على عثمان وهو يقرأ فى المصحف
قال المؤرخ الأندلسي ابن عبد البر (368 هـ - 463 هـ) : وقيل إن محمدًا شارك في دم عثمان،، وقد نفى جماعة من أهل العلم والخير أنه شارك في دمه، وأنه لما قال عثمان، : (لو رآك أبوك لم يرض هذا المقام منك). فخرج عنه وتركه، ثم دخل عليه من قتله، كما نقل عن كنانة مولى صفية بنت حيي، وكان ممن شهد يوم الدار- أنه لم ينل محمد بن أبي بكر من دم عثمان بشيء.
يبقى اللى حصل كالتالى :
بعد ما دخل علشان يقتله زى ما كان واصله من تسخين المنافقين وفعلاً امسك بلحيته ... قاله عثمان ما قاله
واتصدم محمد واتكسف من نفسه
وخرج وترك بيت عثمان ثم دخل باقى الغوغاء و اتجمعوا على عثمان فقتلوه وهو صائم ويقرأ القرأن
وقطعوا اصابع زوجته السيده نائله عندما اقتربت لتحميه
واشتعلت الفتنه
واختار المسلمين على بن ابى طالب ليكون الخليفه
تأججت الفتنه وقامت معارك بين المسلمين بعضهم البعض فقتل من قتل فى موقعه الجمل
١٨ الف قتيل مسلم
و فى موقعه صفين ٧٠ الف قتيل مسلم
محمد بن ابو بكر ربيب على ويعتبره ابوه
و عمه اولا اتربى ف بيته وهو عنده بضع سنوات يعتبر ميعرفش له اب غيره
وذهب معاه للكوفه
واستمرت المعارك و الخلافات والحروب بين على الخليفه الذى تم اختياره بالشورى
و معاويه المطالب بالقصاص لدم لعثمان
وعلى يعين محمد بن ابا بكر والى على مصر
ويأتى محمد لمصر هو وزوجته بنت كسري كانت ومعه رجاله
بس مصر بيحكمها عمرو بن العاص والتقى الجمعان محمد بن ابى بكر الشاب الصغير الغرير ورجاله
وعمرو بن العاص القائد العسكرى القديم المحنك ورجاله حليف معاويه وواليه على مصر واللى المفروص ان محمد جاى علشان يزيله من ملكه ويتولى مكانه
وطبعا الاكثر عدد وحنكه كان عمرو بن العاص و رجاله علشان كده غلب محمد ورجاله وهرب محمد بن ابى بكر الصديق واختفى فى بيت سيده مصريه
دلت عليه واخده معاويه بن خديج
وقاله قتلت ٨٠ من بنى قومى مصريين يعنى فى دم الشهيد عثمان واتركك وانت صاحبه
ويقال انه قتله ودس جسمه فى بطن حمار ميت واحرقه وان كان فى ناس بينكروا الروايه دى
وفى بيقولوا انه أُتى به لعمرو بن العاص فقتله
بعد كده راحوا قصر الولايه وقتلوا زوجته
وسابوا ابنه ذو ال٧ سنوات يتيم الاب والام غريب الدار والاهل
وتبكى اسماء ولدها وزوجته ويتم ابنه بلا اب ولا ام
بس هتعمل ايه وجوزها فى حرب لازم تكتم ف نفسها وتحبس المها
وهى من تعودت من شبابها على الفقد
وبعدها ب٣ سنين يقتل زوجها على وهو ذاهب ليوقظ الناس لصلاه الفجر على يد عبد الرحمن بن ملجم بعد ان طعنه بسيف مغطى بالسم
لتعيش اسماء تتقبل صدمه وراء صدمه ومن الم الترمل لالم الثكل وفقد الضنا
لتصاب بمرض انا ف حياتى ما سمعت عنه
اتاها النزيف فكانت تنزف من ثدييها حتى ماتت عن عمر يناهز ال ٦٠
طب والواد الغلبان اليتيم اللى عنده ٧ سنين و ف غربه وسط اعدؤه اللى قتلوا ابوه وامه
اطمنوا ... فى الوقت اللى اتقتل فيه محمد وزوجته جه لمصر عبد الله بن ابى بكر الصديق اخو محمد من الاب علشان ياخد القاسم ابن محمد بن الى بكر فهو عمه لابيه وحفيد اسماء بنت عميس
علشان يعيش مع عمته عائشه بنت ابى بكر زوج رسول الله فهى عمته و فى بيت رسول الله فى المدينه المنوره ليكبر وليصبح العالم والفقيه واحد فقهاء المدينه السبع من التابعين
وسبحان الله كان اشبه بنى ابوبكر بجده ابو بكر
ويتزوج من بنت عمه قُريبة بنت عبد الرحمن بن ابى بكر
وهو جد جعفر الصادق
الحياه دايماً فيها أمل مادمت ماشى ف سكة رضا الله
#اين_نحن_منهن
#نساء_حول_الرسول
#انا_وانت_وساعات_الحظر
#ابتسام
تعليقات
إرسال تعليق