#ابو_زيد_الهلالى #الليله٤١٨
#ابو_زيد_الهلالى
#الليله٤١٨
لو قلت كلمة السيره
هيخطر ف دماغ اللى بيسمعك حاجه من اتنين طبعا ف الاول السيره النبويه المشرفه لسيدنا محمد صلى الله عليه وسلم
ولو قلت لاء مش دى
علطول هيقول السيره الهلاليه
سيرة ابو زيد الهلالى سلامه
ابوزيد دا بطل عربى عشقه الناس زمان وكانت حكايته بتتحكى على القهاوى بيحكيها الراوى
ودا كان بطل الليالى ونجم السهرات قبل التليفزيون والراديو وقبل اختراع الكازينوهات واماكن السهر على راى عمرو دياب
طب مين ابو زيد ؟
اصله ايه ؟
نسبه لمين ؟
وتعالوا ندخل ف اطول قصة عرفها الموروث الشعبى
بتصل عدد ابياتها لمليون بيت سعر
اه قرأت صح ١٠٠٠٠٠٠ ست اصفار
طبعا هاحكيهم كلهم
😂😂😂
بهزر مش كلهم
كان ياما كان فى بلاد العرب زمان بين القرنين الرابع و الخامس الهجرى يعنى
لما كان العباسيين بيحكموا فى بلاد العراق والفاطميين بيحكموا مصر بلاد الحجاز والمغرب
كان فى امير اسمه الأمير رزق ابن نائل وكان عم الملك سرحان ملك بني هلال
اصلهم من بلاد السرو ف اليمن ومنها الهلاليه خلف الامير منذر الهلالى جابر وجبير
سيبك من جبير ... وخلينا ف جابر
جابر خلف ولدين حازم ورزق
سيبك من حازم ... وخليك ف رزق
رزق خلف بنات كتير منهم شيحة وعتيمة سيبك منهم دول بنات
وهو عاوز ولد
واتجوز الاميره جلاس
الاميره جلاس اكيد مش بمعنى زجاج يعنى
ولما دورت على معنى الاسم ف المعاجم لقيتهم كلهم بيتكلموا عز معنى الجلوس
ما علينا ... من معنى اسمها مش هنتجوزها
وولدت ولد
ولولو لو لوىىىى
حمدالله على السلامه يا ست جلاس ..... بس ... بس .... بس اااا😔
بس ايه؟؟؟😳
الولد لا له ذراعين ولا ساقين
ولما كان الأمير رزق ميقدرش أنه يتجوز بأكثر من أربع مع بعض فكان بيطلق اللي لا مش عاجباه اوى من زوجاته
وفضل كده تباديل وتوافيق وعامل فيها المعلم عاشور ولا رشدى اباظه ف الزوجه ١٣ بس ده وصل لل١١
وكانت مش اى حد
دى الأميرة خضرة بنت قرضة شريف مكة
والحمد لله
بسرعه ظهرت على خضرة علامات الحمل وفرح الأمير وانتعش قلبه بالامل فعزم زعيم قبيلة الزغبية (هم اسم قبيلتهم كده) و ناس كتيره من العيله الكريمه علشان يشرفوا الحفله اللى هتتعمل بعد الولاده
وال على راى المثل :
قبل ما تتجوز حضرت المأذون
وقبل ما تحبل حضرت الكمون
وقبل ما تولد سمته مأمون
ودا اللى متجوز ١٠ قبل كده ومخلف بنات كد إكديه مش تستنى يمكن يكون بنت اللى ف بطن خضره
واسدصدقاؤه محبوش يكسفوه وقبلوا الدعوة ونزلوا ضيوف عليه في انتظار مولد الطفل
و ف مره أثناء الحمل كانت الأميرة خضرة بتتمشى مع جمع من الستات الا وشافت طائر يهاجم سرب من الطيور المختلفة الجنس واللون وبيقتلها
فعجبها اوى منظره ودعت ربنا أن يمن عليها بولد زى الطائر ده ولو يكون أسود زيه
و ربنا مكسفهاش و استجاب دعاها وولدت ولد اسود
وبلغ الخبر للامير رزق
بس مقدرش يصدق أن ابنه اسود وعلى طريقة اللمبى كده
انا بيضه ... وانتى بيضه جيبنا صباع العجوه ده منين ؟؟؟
بس بقى من الصدمه او انكاراً للواقع
مرضيش أنه يشوفه أو يسمح لأي رجل أنه يشوفه قبل يوم السبوع بتاعه
مع انه كان سمع وصفه وشكله من الحريم بتوعه بس بردو رفض يشوفه
و حسب العادة
في اليوم السابع
جهز لضيوفه مائدة فاخرة
آل يعنى مش بقالهم مده قاعدين اكلين شاربين ف بيته
وبعد ما اكلوا
بعت جاب الطفل شايلاه جارية و مغطيين وشه بمنديل على صينية من الفضة
كما هى العاده
ونقطه الضيوف بالفلوس الذهب والفضة كما هى العادة
الا وواحد فضولى تقيل كده رفع المنديل ظهر أن الولد اسود
يانهار اسود
كل ده كان الامير رزق طول الاحتفال بره الخيمة شايل الهم و قلبه مليان حزن
عقله وقلبه رافضين انها تكون زوجه خاينه وحبه لها خلاه رافض انه يطلقها
بس لاء ... بعد ما اترفع المنديل عن وجه الولد و شافوا لونه خرجوا عليه أصحابه بيلوموه على محاولته إنه بستر عنهم الفضيحه
وخبى عنهم العار ده فى تصورهم وإزاى يخل على زمته ست غير شريفه بالشكل ده
يا ترى هايعمل ايه ؟؟؟
#ابتسام
تعليقات
إرسال تعليق