#كفته_حمرا_اوى #الليله٤٢٤

#كفته_حمرا_اوى
#الليله٤٢٤

حدوتة النهارده حقيقيه حكتها امى نقلا عن خالتى الكبيره الله يرحمهم جميعا 

معرفش صلة خالتى بالحكايه ايه بس هى مش بتاعتها يمكن كانت جارتها او ان الحكاية اتحكت لها بس المهم هى مش من اطراف القصه
ولكن بتقوم بدور الراوى

القصد ... الست بطلة الحكايه دى كانت  متدلعه ف بيت اهلها من البنات اللى عايشه ف بيت اهلها عيشه البط بتاع محمد ثروت ف غنوة جدو عبدو
البت تقوم فرحانه م النوم تغطس وتعوم وهات يا لعب 
يعنى لا بتدخل مطبخ ولا تتعلم طبخه 
و بالتالى مكانتش اتعلمت اى حاجه قبل  الجواز
اى حاجه ولا حتى اخدت ف جهازها كتاب ابله نظيره زى اى بنوته شاطره ف العصر ده اللى  هو النصف الاول من القرن الماض 

حيث لا تليفزيون وبرامج طبخ وبحبك اوى يا شيف

و طبعا مفيش موبايل ولا نت ولا حتى كانت فاطمه الحاتى  مامتها لسه ماتولدتش 

وبالتالى معندهاش اى وسيله تعمل منها اكله لجوزها الا انها تسأل 

وتسأل مين؟
واحده جارتها ... ست كبيره وخبره وتاخد منها الطريقه
و فضلت على كده كل يوم 
كل يوم ... 
كل ما تيجى تعمل اى اكل مهما كان بسيط  تروح لجارتها وتسألها 
ساعات اسألتها بتكون عن حاجات بديهيه مفروض اى حد يكون عارفها

بس دى تسأل وبعد كده تعمل الاكل 

مفيش اكله تعملها الا اما تسألها عليها  

المهم الست الكبيره زهقت والله اعلم بقى العروسه دى زهقتها اوى ازاى ؟ يمكن بتروحلها ف وقت مش مناسب ؟ 
او  بتسأل اسأله المفروض انها بديهيه زى ما قولنا ؟؟

المهم الست الكبيره لما زهقت قررت تخلص منها نوهائى 

ولما الشملوله راحت تسألها ف مره  ازاى تعمل الكفته اللى بالرز الكفته المطبوخه يعنى؟؟

قالتلها على الطريقه فعلا بس زودت عليها طاتش صغنن قالتلها تطحنى حتة طوب احمر وتنعميها (( اللى هى اسمها حُمره ))
ودا ياساده كان اساسى ف كل بيت لانهم كانوا زمان بيستخدموه اعزكم الله فى تنضيف الحمامات ودا لما كانت الحمامات وكل مشتملاتها   من حوض وبانيو وغيره بتتصنع من الحديد الزهر المطلى قبل اختراع السيراميك والبورسلين والحاجات السيكى ميكى دى  

 المهم ان الست الطيبه واللى دلوقتى مبقتش طيبه قالت لها جيبى الحُمره وتحطيها على الكفته طبعا الفالحه بكل ثقه ف الست الكبيره راحت طحنت الطوب الاحمر و عملت المطلوب 

رجع جوزها من شغله وحطتله الاكل 

وطبعا الباقى معروف سألها ازاى عملتى الاكله دى ؟؟
وليه بتقرش كده ؟؟

قالتله انا عملت زى ما ام فلان قالتلى طبعا اتجنن يعنى انتى بتسمعى كلامها ليه ؟
قالتله بكل سذاجه ما انا كل يوم بسمع كلامها وبيطلع الاكل حلو 

قالها يعنى انتِ كل مره بتعملى الاكل زى ما بتقولك هى 

قالتله اه

وانتى مبتعرفيش تطبخى خالص

قالتله لاء 

اخدها من ايدها ورجعها بيت ابوها وقالهم لما تتعلم الطبخ ابقوا هاتوها 

وتوته توته خلصت الحدوته

#طبيخك_اتقدم_ياحوريه
#كفتةبالتتووب
#حكايات_امى_ادعولهم_بالرحمه
#ابتسام

تعليقات

إرسال تعليق

المشاركات الشائعة من هذه المدونة

#ليه_طيب_اكسر_وراه_قله؟ج٢#الليله٦٠٨

صورة
#ليه_طيب_اكسر_وراه_قله؟ج٢ #الليله٦٠٨ اما بقى الحدوته التانيه فبتقولك ان زمان وبردو ايام الفراعنه كانت لما الانسان يموت بيكسروا وراه اناء من الفخار  يعنى هنا كانت عاده مرتبطه بالجنائز  وطبعا كلنا عارفين اهمية الموت و الحياه الابديه والكلام دا كله عند المصريين القدماء واظن انى لسه مخلصه سلسلة ايزيس وازوريس اللى بتحكى باستفاضه ف اهمية الدفن والليله دى  طب بردو ليه نكسر وراه حاجه فخار واللى رسيت ع القله لاننا بقينا نستخدم معادن وصينى واوانى تانيه حاليا  انما القله فهى اللى كانت مكمله حتى دخول التلاجه الايديال ال ٨ قدم لكل بيت نرجع لكسر القله الفكره انهم مش بس بيكسروا القله لاء وكمان بياخدوها ويدفنوها جنب قبر المرحوم طيب الله ثراه ... ودا ليه؟ علشان لما ترجع الكا يعنى (الروح) على بيته مره تانيه مره ماتأذيش اهل البيت اللى موجودين فيه دول كانوا بيعملوا الاكل ف البيت وياخدوه عند مكان المقبره وياهم وهناك ياكلوا وبعدين يكسروا الاوانى دى ويسيبوا الفخار الكسر هناك  واللى كانوا بيسموه الشِقف جمع شقفه لدرجة ان المتخصصين فى الآثار وهم بينقبوا لو لقوا ف مكان ما آنيه  فخاري...
قراءة المزيد

#هو_صحيح_الجوع_كافر_بس_مش_للدرجه_دى؟؟؟ج٢#الليله٦٥٠

صورة
#هو_صحيح_الجوع_كافر_بس_مش_للدرجه_دى؟؟؟ج٢ #الليله٦٥٠  زى ما قولنا كان الموسم الزراعي في شمال العراق اواخر عام ١٩١٧ سئ جداً ومطر قليل ومحصول ضعيف و بيقول محمد امين العمري  واللى كان ف الوقت ده ضابط اعاشة في الجيش السادس التركي ويعتبر شاهد عيان ع الفتره دى بيحكى ويقول : انه كتب تقرير للقائد خليل باشا وضح فيه الخطر اللي هيحصل في ولاية الموصل بسبب قلة الحبوب و انهم ضرورى يستعدوا ويجيبوا مؤن من اسطنبول و يلحقوا الدنيا قبل فوات الاوان   لكن خليل باشا كبر دماغه و مهتمش للتحذير ده وقال له  ان ولاية الموصل هي مستودع تموين العراق و هي مش  محتاجة تموين يجي لها من بره يا حبيبى احنا ناخد ومنديش بس زى ما توقع محمد امين العامرى بدأت المجاعه حصل ايه ف المجاعه ؟ هل تداركت الحكومه الغير واعيه سوء الحال ؟ ولا ايه اللى حصل؟ ازاى اتعامل اهل الموصل مع المجاعه؟ اقولكم اولا زى ما توقع ضابط الاعاشه بدأت المجاعة تستفحل وشملت الموصل والمنطقة الواسعة اللى ف الشمال منها لحد بحيرة ((وان)) وبدأت جموع من الجياع تهجر ديارها في الاناضول وتتوجه ناحية الموصل  ما الكل بقى فاكرها مليانه خير...
قراءة المزيد

#زئرده #الليله١٠١

صورة
#زئرده #الليله١٠١ الحدوته المرادى حقيقيه زى حكايه #الشنطه_المعجزه  اللى ده الرابط بتاعها https://www.facebook.com/102264164820545/posts/142331610813800/ بردو جيران ماما زمان ف الحى العريق والشارع الجميل (( ابن الرشيد )) اللى لا اتولدت فيه ولا عشت فيه بس حبيته من حب امى فيه ومن حكاياتها عنه  (( زئرده ))  دى واحده جارتهم وباين من اسمها -اللى طبعا مش اسمها الحقيقى - ولكن الناس كانوا مسمينها كده لانها كانت صغننه الحجم  تقريبا كان اسمها نوال بس اللى كانت الدنيا كلها بتناديها بيه كان زيئرده كانت متجوزه بس معهاش اولاد وجوزها كان بيشتغل ف بلد تانيه وبييجى يشوفها كل فتره  وعلشان كده كانت عايشه ف شقه ف بيت اهلها بس بتبات لوحدها ف شقتها كان الناس كلها عارفين انهم مرتاحين ماديا  وف ليله صيفيه حاره حين لم يكن يوجد لا تكييف ولا حتى مروحه فى هذا الزمان القديم  و حيث لا يوجد حل سوى ان تنهى ليلتك بدش بارد لتذهب للنوم متأخراً على ١١ونص ١٢ بالليل كده  بعد ساعه ولا ٢ اما المدينه كلها تغرق فى سبات عميق مفيش صاحى  كانت كالعاده بايته لوحدها وحست بحركه معاها ف اوضة ...
قراءة المزيد