#ابو_زيد_الهلالى #الليله٤٢٢ #الجزء_الخامس_ونهاية_الفصل_الاول

#ابو_زيد_الهلالى 
#الليله٤٢٢
#الجزء_الخامس_ونهاية_الفصل_الاول

استجاب رزق للامير سرحان وجاب القبائل اللى رفضت تهاجر مع سرحان وراحوا يساندوا بلدياتهم قصاد الشاب ده   

هتقولوا هم مش قبيله واحده 
اه بس كل قبيله متقسمه لفروع وبطون بس بيكون كل مجموعه بتنتمى لاصل واحد بتعتبر قبيله واحده 

وفي الطريق لقبايل الزحلان كان  المرسال اللي جاى علشان يعرفه الطريق قرب  انه يخليه يقتنع أن بركات يبقى ابنه من الوصف والكلام
 
الامير رزق كان مستغرب هو ليه اسمه بركات اذا كنت انا مسمى ابنى ابو زيد

ووصل .... و دعا بركات إلى النزال 

واتقدم الأب ينازل ابنه وهو جواه شك أنه ابنه

اما طبعا بركات فكان يجهل تماماً إنه هيحارب ابوه و هو بيظن أنه عدوه اللى  قتل أبوه

وفضل الأمير رزق يأجل المبارزة يوم بعد يوم

ولكن لامتى يعنى مش هيستمر  في كده كتير  ورضي ف النهايه 
لانه بتأجيله ده هيبان انه خايف 

واتبارزوا  وغلبه بركات ورماه عن فرسه

ولكن  مقتلهوش لأن أمه موصياه انه ميقتلهوش  

و لكن ف النهايه اضطرت الأميرة خضرة أنها تحكيله الحقيقة

وعرفتهم ببعض 

وساعتها بركات بدعم من ابوه رزق أرغم زعماء بني هلال انهم  يعترفوا به ابن   شرعي للأمير رزق

وكمان اجبرهم انهم يعتذروا عن الأضرار التي شافها هو وأمه بسببهم 

 و سامحهم بركات اللى استرد اسمه الاولانى اسم الأمير أبو زيد الهلالى واتضاف لاسم بركات 

يعنى زمان مكانش فى مشكله ف الاسماء المركبه لما تتكتب ف السجل المدنى ؟؟؟

لاء زمان مكانش فى سجل مدنى اصلاً

وعاد الهنا و زاد السرور للأمير رزق برجوع زوجته وابنه

وهل كده ممكن نقول توته توته خلصت الحدوته ؟؟؟

لااءا ....كده هنقول زى فاتن حمامه ف فيلم افواه وارانب 

وتوته توته توته ولا تخلص الحدوته وتبدا من جديد 
اللى فات ده كله كان حماده واللى جاى حماده تانى خالص

اللى فات ده نعتبره مقدمه او توطئه او ارهاصه  لحكايات كتيره عملها (ابوزيد الهلالى بركات مسعود)
ودا اسمه لوحده 

ابن الامير رزق بيلوجيا 

والامير فضل بالتبنى 

المهم ان المشكله بتاعته كانت هتنهى بشكة ابره لو حصلت ف الوقت الحالى وعملوا تحليل DNA

وبالمناسبه نفس الحكايه على ندرتها مازالت بتحصل لدلوقتى ان زوجين من لون ينجبوا طفل من لون مخالف تماما 

اما تقولوا ايه ؟؟
له فى خلقة شئون 

المهم بقى عاوزه اللى متابع وقرأ الاجزاء اللى فاتت يرد عليا أكمل قصة ابو زيد الهلالى ولا نجفل على كديه 

ولو حبيتوا نكملها استاذنكوا نفصل شويه بموضوعات تانيه 
لانى حتى القصه اللى كنت بعيدها الايام اللى فاتت عن السيده اسماء بنت عميس كانت نفس الجو من عرب وبدو وصحرا 
وقصة امنا هاجر دلوقتى نفس الكلام

وانا مبحبش كده ... بحب افصل 

انا حتى بعمل حسابى انقل ف حواديتى من زمن لزمن ومن بلد لبلد 

عموما مستنيه رايكوا اكمل باقى حدوتة ابوزيد الهلالى ونخلى الشخصيات اللى معروفه زى الزناتى سلامه و ذياب والجازيه ومرعى ويونس ف بلاد الشوق وكده

#ابتسام

تعليقات

إرسال تعليق

المشاركات الشائعة من هذه المدونة

#ليه_طيب_اكسر_وراه_قله؟ج٢#الليله٦٠٨

صورة
#ليه_طيب_اكسر_وراه_قله؟ج٢ #الليله٦٠٨ اما بقى الحدوته التانيه فبتقولك ان زمان وبردو ايام الفراعنه كانت لما الانسان يموت بيكسروا وراه اناء من الفخار  يعنى هنا كانت عاده مرتبطه بالجنائز  وطبعا كلنا عارفين اهمية الموت و الحياه الابديه والكلام دا كله عند المصريين القدماء واظن انى لسه مخلصه سلسلة ايزيس وازوريس اللى بتحكى باستفاضه ف اهمية الدفن والليله دى  طب بردو ليه نكسر وراه حاجه فخار واللى رسيت ع القله لاننا بقينا نستخدم معادن وصينى واوانى تانيه حاليا  انما القله فهى اللى كانت مكمله حتى دخول التلاجه الايديال ال ٨ قدم لكل بيت نرجع لكسر القله الفكره انهم مش بس بيكسروا القله لاء وكمان بياخدوها ويدفنوها جنب قبر المرحوم طيب الله ثراه ... ودا ليه؟ علشان لما ترجع الكا يعنى (الروح) على بيته مره تانيه مره ماتأذيش اهل البيت اللى موجودين فيه دول كانوا بيعملوا الاكل ف البيت وياخدوه عند مكان المقبره وياهم وهناك ياكلوا وبعدين يكسروا الاوانى دى ويسيبوا الفخار الكسر هناك  واللى كانوا بيسموه الشِقف جمع شقفه لدرجة ان المتخصصين فى الآثار وهم بينقبوا لو لقوا ف مكان ما آنيه  فخاري...
قراءة المزيد

#هو_صحيح_الجوع_كافر_بس_مش_للدرجه_دى؟؟؟ج٢#الليله٦٥٠

صورة
#هو_صحيح_الجوع_كافر_بس_مش_للدرجه_دى؟؟؟ج٢ #الليله٦٥٠  زى ما قولنا كان الموسم الزراعي في شمال العراق اواخر عام ١٩١٧ سئ جداً ومطر قليل ومحصول ضعيف و بيقول محمد امين العمري  واللى كان ف الوقت ده ضابط اعاشة في الجيش السادس التركي ويعتبر شاهد عيان ع الفتره دى بيحكى ويقول : انه كتب تقرير للقائد خليل باشا وضح فيه الخطر اللي هيحصل في ولاية الموصل بسبب قلة الحبوب و انهم ضرورى يستعدوا ويجيبوا مؤن من اسطنبول و يلحقوا الدنيا قبل فوات الاوان   لكن خليل باشا كبر دماغه و مهتمش للتحذير ده وقال له  ان ولاية الموصل هي مستودع تموين العراق و هي مش  محتاجة تموين يجي لها من بره يا حبيبى احنا ناخد ومنديش بس زى ما توقع محمد امين العامرى بدأت المجاعه حصل ايه ف المجاعه ؟ هل تداركت الحكومه الغير واعيه سوء الحال ؟ ولا ايه اللى حصل؟ ازاى اتعامل اهل الموصل مع المجاعه؟ اقولكم اولا زى ما توقع ضابط الاعاشه بدأت المجاعة تستفحل وشملت الموصل والمنطقة الواسعة اللى ف الشمال منها لحد بحيرة ((وان)) وبدأت جموع من الجياع تهجر ديارها في الاناضول وتتوجه ناحية الموصل  ما الكل بقى فاكرها مليانه خير...
قراءة المزيد

#زئرده #الليله١٠١

صورة
#زئرده #الليله١٠١ الحدوته المرادى حقيقيه زى حكايه #الشنطه_المعجزه  اللى ده الرابط بتاعها https://www.facebook.com/102264164820545/posts/142331610813800/ بردو جيران ماما زمان ف الحى العريق والشارع الجميل (( ابن الرشيد )) اللى لا اتولدت فيه ولا عشت فيه بس حبيته من حب امى فيه ومن حكاياتها عنه  (( زئرده ))  دى واحده جارتهم وباين من اسمها -اللى طبعا مش اسمها الحقيقى - ولكن الناس كانوا مسمينها كده لانها كانت صغننه الحجم  تقريبا كان اسمها نوال بس اللى كانت الدنيا كلها بتناديها بيه كان زيئرده كانت متجوزه بس معهاش اولاد وجوزها كان بيشتغل ف بلد تانيه وبييجى يشوفها كل فتره  وعلشان كده كانت عايشه ف شقه ف بيت اهلها بس بتبات لوحدها ف شقتها كان الناس كلها عارفين انهم مرتاحين ماديا  وف ليله صيفيه حاره حين لم يكن يوجد لا تكييف ولا حتى مروحه فى هذا الزمان القديم  و حيث لا يوجد حل سوى ان تنهى ليلتك بدش بارد لتذهب للنوم متأخراً على ١١ونص ١٢ بالليل كده  بعد ساعه ولا ٢ اما المدينه كلها تغرق فى سبات عميق مفيش صاحى  كانت كالعاده بايته لوحدها وحست بحركه معاها ف اوضة ...
قراءة المزيد