#قصة_الفنان_العميق_ج٢_والاخير #الليله١٠٠

#قصة_الفنان_العميق_ج٢_والاخير

#الليله١٠٠

بيكمل الفنان ويحكى 

المهم جبت الالوان والقماش بكل الفلوس اللى معايا وكمان استلفت وعملت كميه  لوحات تكفى ادخل بيها معرض كبير اصل دى سهله شويه شخبطه على كام سكينة او وفرشه كده وفرشه كده بقت لوحة معتبره ومتاخدش ف ايدى نص ساعة ولا بالكتير ساعه  

الا بقى وانا بجهز للمعرض زارنى صاحبى الصحفى صاحب فكرة اللوحات السرياليه  وشافنى متوتر وخايف

ماهو  انا اصلاً مش مقتنع باللوحات اللى بعملها يبقى ازاى هقنع الناس يشتروها 

ساعتها صاحبى لاحظ ده وقالى غلط وكده فعلاً المعرض ممكن يفشل 

وخلى بالك انت مراهن عليه بمستقبلك 

قولتله باسف مستقبلى ومستقبل عيلتى كمان

قالى خلاص هاقولك على حاجه 

لما حد يسألك عن اى لوحه والمعنى والمقصود والكلام دا كله 

بصله الاول ف عنيه بعمق  وبعدين بص ف الفراغ بشرود كده وقوله 

هل تابعت فى حياتك نهر وهو بيتدفق ؟؟؟!!!!

قولتله :  نعم ؟؟؟

دى جمله ملهاش اى  معنى ، انا مفهمتش منها حاجه 

وبعدين لو سألنى يعنى ايه؟؟

ساعتها  هرد اقوله ايه ؟؟؟

قالى متخافش هو مش هيسألك تانى علشان ميطلعش جاهل 

واتعمل المعرض ... 

ونجح نجاح مدوى 

وكان كل ما حد يسألنى  ازاى عملت اللوحه دى 

كنت ابص ف عنيه بعمق وبعدين ابص ف الفراغ  بشرود وبعدين اسرح واقوله

- هل تابعت ف حياتك نهر وهو يتدفق ؟؟؟

مش عاوز اقولكم اللوحات اتباعت بارقام خياليه بالنسبه ليا ع الاقل اسعار مكنتش احلم بيها 

يعنى اللوحه الواحده اتباعت باعلى من ثمن كل لوحاتى القديمه اللى بعتها ف حياتى واللى كنت باخد شهور علشان اخلص واحده بس 

دا غير اية بقى ... جالحجوزات للوحاتى اللى لسه متعملتش 

وكان كل الناس تبص للوحه شويه ويشتروها على طول 

دا حتى فى واحده كانت جنبى هى وجوزها ومش واخدين بالهم انى سامعهم 

قالت له هى الشخبطه اللى ف اللوحه دى معناها ايه ؟؟؟

راح زاغدها ف ايدها وقالها مش فاهم  بس متسأليش والا الناس تقول عليكى جاهله 

واشتروا اللوحه دى 

وبعد يومين جت الست نفسها تانى واشترت لوحتين وساعتها عبرتلى عن اعجتبها بالفن والخطوط والسمتريه وتناسق الالوان والابعاد الفلسفيه اللى ف اللوحه وانا متأكد انها مش فاهمه حاجه من اللى  بتقوله  بس تمام  ما انا اصلاً مش فاهم 

ميخلاش الامر من اللى كان بييحى يسألنى قصدك ايه من اللوحه دى ؟؟

و ساعتها .... شاطرين ... ابص ف عنيه وبعدين    اشرد فى الفراغ واقوله 

انت شفت ف حياتك نهر يتدفق ؟؟؟

انا بستعد دلوقتى لمعرضى الثالث وعاوز اقولكم ان مستوى حياتى اتغير تماما 

نقلت لبيت كبير 

وعربيه غاليه وعندى رصيد كبير فى البنك 

جبت لزوجتى وابنى كل اللى ممكن تتمناه او نتمناه لابننا

امبارح بقى جالى صاحبى الصحفى كنت بقالى فترة مشفتوش  وكان عاوز  يتكلم معايا واعمل حديث معاه لجريدته 

بس الحقيقه انا مش فاضى للرغى والكلام الفارغ ده بتاع الصحافه انا داوقتى فنان مشهور ووقتى بفلوس ... بفلوس كتيره 

بس هو اما حس انى مستعجل ومش عاوز اطول معاه اتنرفز اوى 

لقيته بيقولى : انت نسيت نفسك ؟؟؟

مين صاحب الفضل فى اللى انت فيه ؟؟؟

قولى من اول حد ساعدك؟؟ 

قولى  جيبت منين فكرة لوحاتك دى

 رد جتلك منين افكار لوحاتك 

ساعتها بصيتله ف عنيه بعمق وبصيت ف الفراغ  بشرود وقولتله :  

- هل تابعت ف حياتك نهر يتدفق !!!!

#تمت

الحدوته تمت بس بصراحه انا مازلت مش مقتنعه بفناني العصر الحديث ولا الارقام اللى بتتباع بهم لوحاتهم 

وعاوزه حد يكون فعلا فاهم حاجه مش فاهماها بس ميجيش يقولى هل تابعتى ف حياتك نهر يتدفق 

الجزء الاول نزلت لوحات للوزير الفنان فاروق حسنى 

وخف لا حد يشكك ف مصداقيتى ويتهمنى انى بتبلى على الفنان العظيم نزلت صور اللوحات من على جوجل ومعاهم صور له ف معرضه وعليها التعليق 

وياريت اللى فاهم او شايف حاجه مش شايفاها يشرحلى 

واعذروا جهلى الفنى 

وبالمناسبه دى هنزل ف الكومنتات لوحات للفنان الكندى روب غونسالفيس

انا بحبها وبحب الاعمال اللى شبهها وشايفاها فيها ابداع

#دمتم_طيبين 

#سمتريه_وتناغم_وهارمونى

#احفظوا_الكلمات_دى_لو_روحتوا_معرض_لفاروق_حسنى

#انا_وانت_وساعات_الحظر

#ابتسام

بقالى اكتر من سنه بكتب قصص كل ليله قصة جديده... تقرأها وتعمل كده🤔 وحاجات تعرفها فتعمل😳  وساعات ☺او😱او😞او😭 بس اؤكد لك انك عمرك ما هتعمل 🥱او😤او😞 وغالبا هتكون كده😂😂😂  وبما ان الحكايات مرت عليها سنه  بس احسب انها مرت مرور الكرام وهتكون جديده عليكم ..اتمنى تقرأوها واتمنى اسمع رأيكوا فى القصه ... ودى كانت قصة الليله ١٠٠

#ابتسام