#الغزاله_الصغيره #الليله١٠٧

#الغزاله_الصغيره  

 #الليله١٠٧

كان ياما كان ياسعد يا اكرام ولا يحلا الكلام الا بذكر النبى عليه الصلاة والسلام

كان فى بلد من البلدان  ملك بيحب مراته اوى كان متخيل انه عايش فى سعاده وان مفيش اخلص من الملكه

بس فى يوم اكتشف خيانتها واتأكد وهى اعترفت .. 

ساعتها كره كل ستات المملكه وقال لازم اشوف واحده تكون عمرها ما شافت راجل 

وف يوم وهو بيتمشى ف غابه تابعه لمملكته قابل بنوته صغيره وجميله معاها غزاله  صغيره بتاعتها وعرف انها عايشه ف الغابه مع اهلها لوحدهم وانهم مفيش حد عايش معاهم ولا بيختلطوا بحد خالص 

الملك قال بس هى دى لا بتشوف حد ولا اتعرفت على حد دى حتى مراحتش لعاصمه ملكه ولا تعرف حتى ان ده ملك البلاد 

فرح بيها و اتجوزها وقال بس دى اللى اضمن شرفى معاها

امعانا فى الامان وعلشان متعرفش حد من اهل المملكه او سكان القصر ووزرائه واقاربه وتخونه زى الملكه السابقه عمل حل عبقرى 

لما  اتجوزها بنى قصر كبير فى الغابه فيه كل حاجه ممكن تحتاجها

وقالها ايه رأيك هى وافقت وقالتله انا طول عمرى مش متعوده اختلط بالناس ودى فرصه حلوه ليا 

 و كمان عمل حوالين القصر 3 اسوار كبيره وعاليه وبوابه كبيره على كل سور مالهاش الا نسخه واحده للمفتاح معاه هو 

ولا محتاجه حرس و خدام من الرجال 

بس الزوجه الجميله الرقيقه  طلبت منه يعمل فتحه صغيره ف كل سور علشان الغزاله بتاعتها اللى مربياها تخرج منها تقضى وقتها ف الغابه وترجع تدخل تانى 

لانها بتحبها ومتستغناش عنها ... و بما ان ممنوع ان البوابات تتفتح يبقى دا يكفى تخرج منه الغزاله وترجع لها تانى 

الملك وافق وبقى يقضى وقت ف مملكته يدير شؤنها ويرجع يقضى باقى الوقت مع زوجته حبيبته

 اللى كل مره تطلب منه يبنى سور زياده حوالين القصر لانها بتحب جوزها اوى ومش عاوزه يكون لها اى اتصال مع حد من الدنيا غيره 

وان الاسوار دى بتحسسها بالامان اكتر 

والملك طبعا كان بيفرح بحبها واخلاصها ده ويزود الاسوار ... لحد ما بقوا 7 اسوار 

وف يوم والملك معاها جاله اخبار ان الاعداء بيحاولوا يهاجموا حدود المملكه الشماليه وهيقتحموها

وبسرعه خرج الملك جرى ومن استعجاله مقفلش الابواب السته اللى ف الاول واكتفى بانه قفل الباب السابع اللى بره 

يا ترى ايه اللى هيحصل ؟؟؟

هنعرف بكره باذن الله 🙂

#مكتبه_بابا

#الله_يرحمه_ويرحم_مكتبته

#انا_وانت_والحظر_اللى_فركشناه

#ابتسام

بقالى اكتر من سنه بكتب قصص كل ليله قصة جديده... تقرأها وتعمل كده🤔 وحاجات تعرفها فتعمل😳  وساعات ☺او😱او😞او😭 بس اؤكد لك انك عمرك ما هتعمل 🥱او😤او😞 وغالبا هتكون كده😂😂😂  وبما ان الحكايات مرت عليها سنه  بس احسب انها مرت مرور الكرام وهتكون جديده عليكم ..اتمنى تقرأوها واتمنى اسمع رأيكوا فى القصه ... ودى كانت قصة الليله ١٠٧

#ابتسام