#تعلمت_من_سيدنا_سيدنا_سليمان١#الليله٤٥٤

#تعلمت_من_سيدنا_سيدنا_سليمان١#الليله٤٥٤

فاكرين نعمه 
اتعرف عن «نعمة» انها أقامت مع والدة الملك سليمان اللى بيقولوا ان اسمها  «باتشيبا» التى وعاشت كتير احد ما عجزت اوى 
وكعادة الحموات حتى الملكات منهم كانت هى صاحبة الكلمة والسلطة 
قالوا عن علاقة نعمة بحماتها كلام حلو وعكسه
عموما مالناش دعوه وعلاقتهم كانت ازاى دى امور عائليه 
وانتوا عارفين لو كانت الغله اد التبن كانت الحما تخب مرات الابن
ومسيرك يا مرات الابن تبقى حما 
واللى حماتها تحبها الشمس تطلع لها 
وكفايه بقى اقفل ماسورة امثال الحما ومرات الابن ونرجع لحكاية الست نعمه المهم ان اللى وصلنا  أن نعمة كانت ذات شخصيتها قوية وذكيه  و جميلة.. وزى ما قلنا ف الليله اللى فاتت انها انجبت له ولد 
واذا كانت بلقيس عاشت وابنها ف اليمن وحكم ابنها منليك  اليمن واثيوبيا ف نعمه وابنها رحبعام او ساعات بينطقوه  «ريهوبوام» 
عاشوا معاه ف مملكة بيت المقدس  وبيقولوا إن سليمان عليه السلام كان بيحب نعمة اوى وكتب فيها شعر 
و محدش يعرف تاريخ وفاة نعمة  
اما بالنسبه للشملول رحبعام فمع أنه كان ابن نبى كريم  إلا أنه كان ضيق التفكير 
ما لو تفكر هتلاقى انه مسك الحكم وهو فى عنده ٤١ سنه يعنى المفروض انه زى ما قال المولى عز وجل بلغ اشده والمفروض يكون عنده حكمه ف سنه ده  وحكم سبعة عشر عاما على مملكة القدس أرض الله المختارة كما يؤمن اليهود..
الا ان بعد وفاة سيدنا سليمان المشهوره اللى هبقى ارجع لها تانى علشان نحكى تفاصيلها 
ساعتها اجتمعوا في شكيم ودى اللى هى مدينة نابلس دلوقتى  اشخاص بيمثلوا ال ١٢ سبطًا علشان يختاروا رحبعام ملكك عليهم لان هو الواريث الشرعي لسيدنا سليمان وطلبوا منه شوية طلبات ف هو قعد يقول لهم ادونى مهلة ٣ أيام  و راح طلب مشورة شوية شبان متهورين
فاتغاظ الشعب عملوا ثوره 
 ودا أدى إلى انقسام المملكة. وخرج عليه  عشرة أسباط سميت باسم مملكة إسرائيل انقسموا يعنى  

و مفضلش معاه الا سبطي يهوذا وبنيامين 
وقد سموا مملكتهم  باسم مملكة يهوذا 

وقتها فكر رحبعام أنه يقود جيش عظيم على العصاة ويخضعهم 

الا انه اكتفى بتحصين المدن في يهوذا وبنيامين وجدد الحصون 
وفى بيقولوا  أنه امتنع عن حربهم بأمر إلهي
 بس بردو  الحرب قامت بينه وبين يربعام و دا واد كده من غير  بيت داود استقل بال١٠ اسباط التانيين وعمل مملكة ف شمال  إسرائيل  

ياترى مات ازاى سيدنا سليمان ؟
ياترى ابنه اللى ف القدس عمل ايه ف المُلك من بعد وفاه ابوه الملك والقاضى والنبى واللى ربنا شكر فيه فى القرآن واللى ربنا اتاه من الملك ما لم يؤت احد من بعده ؟
فى حكايات وحواديت تانيه 
وشكلى غرزت نفسى ف قصة طويله مكنتش عامله حسابها زى ما حصل مع قصة سيدنا موسى 
عموما انا مستمتعه وانا بحكى واتمنى القارئ يكون كمان عجباه الحدوته 

لان زى ما اتفقنا ربنا يحكى قصص اه ونستمتع به اه 
ونصدقه اكييييد 
انما الحواديت من الكتب التانيه نسمعها اه  
ونستمتع بها بس اه
انما ... منصدقش بعضها 
وننكر ونرفض بعضها 
واحيانا نضحك على سذاجة بعضها

بس لازم نعرف علشان المعرفه علم والقرأه امر من ربنا 
واعمال العقل واجب علينا 
عموما فوتكوا بعافيه 
ولا اكمل ف امثال الحما ومرات الابن🤨
ايوه كده 🤭
انا بردو بقول كفاية☺
#ابتسام

تعليقات

إرسال تعليق

المشاركات الشائعة من هذه المدونة

#ليه_طيب_اكسر_وراه_قله؟ج٢#الليله٦٠٨

صورة
#ليه_طيب_اكسر_وراه_قله؟ج٢ #الليله٦٠٨ اما بقى الحدوته التانيه فبتقولك ان زمان وبردو ايام الفراعنه كانت لما الانسان يموت بيكسروا وراه اناء من الفخار  يعنى هنا كانت عاده مرتبطه بالجنائز  وطبعا كلنا عارفين اهمية الموت و الحياه الابديه والكلام دا كله عند المصريين القدماء واظن انى لسه مخلصه سلسلة ايزيس وازوريس اللى بتحكى باستفاضه ف اهمية الدفن والليله دى  طب بردو ليه نكسر وراه حاجه فخار واللى رسيت ع القله لاننا بقينا نستخدم معادن وصينى واوانى تانيه حاليا  انما القله فهى اللى كانت مكمله حتى دخول التلاجه الايديال ال ٨ قدم لكل بيت نرجع لكسر القله الفكره انهم مش بس بيكسروا القله لاء وكمان بياخدوها ويدفنوها جنب قبر المرحوم طيب الله ثراه ... ودا ليه؟ علشان لما ترجع الكا يعنى (الروح) على بيته مره تانيه مره ماتأذيش اهل البيت اللى موجودين فيه دول كانوا بيعملوا الاكل ف البيت وياخدوه عند مكان المقبره وياهم وهناك ياكلوا وبعدين يكسروا الاوانى دى ويسيبوا الفخار الكسر هناك  واللى كانوا بيسموه الشِقف جمع شقفه لدرجة ان المتخصصين فى الآثار وهم بينقبوا لو لقوا ف مكان ما آنيه  فخاري...
قراءة المزيد

#هو_صحيح_الجوع_كافر_بس_مش_للدرجه_دى؟؟؟ج٢#الليله٦٥٠

صورة
#هو_صحيح_الجوع_كافر_بس_مش_للدرجه_دى؟؟؟ج٢ #الليله٦٥٠  زى ما قولنا كان الموسم الزراعي في شمال العراق اواخر عام ١٩١٧ سئ جداً ومطر قليل ومحصول ضعيف و بيقول محمد امين العمري  واللى كان ف الوقت ده ضابط اعاشة في الجيش السادس التركي ويعتبر شاهد عيان ع الفتره دى بيحكى ويقول : انه كتب تقرير للقائد خليل باشا وضح فيه الخطر اللي هيحصل في ولاية الموصل بسبب قلة الحبوب و انهم ضرورى يستعدوا ويجيبوا مؤن من اسطنبول و يلحقوا الدنيا قبل فوات الاوان   لكن خليل باشا كبر دماغه و مهتمش للتحذير ده وقال له  ان ولاية الموصل هي مستودع تموين العراق و هي مش  محتاجة تموين يجي لها من بره يا حبيبى احنا ناخد ومنديش بس زى ما توقع محمد امين العامرى بدأت المجاعه حصل ايه ف المجاعه ؟ هل تداركت الحكومه الغير واعيه سوء الحال ؟ ولا ايه اللى حصل؟ ازاى اتعامل اهل الموصل مع المجاعه؟ اقولكم اولا زى ما توقع ضابط الاعاشه بدأت المجاعة تستفحل وشملت الموصل والمنطقة الواسعة اللى ف الشمال منها لحد بحيرة ((وان)) وبدأت جموع من الجياع تهجر ديارها في الاناضول وتتوجه ناحية الموصل  ما الكل بقى فاكرها مليانه خير...
قراءة المزيد

#زئرده #الليله١٠١

صورة
#زئرده #الليله١٠١ الحدوته المرادى حقيقيه زى حكايه #الشنطه_المعجزه  اللى ده الرابط بتاعها https://www.facebook.com/102264164820545/posts/142331610813800/ بردو جيران ماما زمان ف الحى العريق والشارع الجميل (( ابن الرشيد )) اللى لا اتولدت فيه ولا عشت فيه بس حبيته من حب امى فيه ومن حكاياتها عنه  (( زئرده ))  دى واحده جارتهم وباين من اسمها -اللى طبعا مش اسمها الحقيقى - ولكن الناس كانوا مسمينها كده لانها كانت صغننه الحجم  تقريبا كان اسمها نوال بس اللى كانت الدنيا كلها بتناديها بيه كان زيئرده كانت متجوزه بس معهاش اولاد وجوزها كان بيشتغل ف بلد تانيه وبييجى يشوفها كل فتره  وعلشان كده كانت عايشه ف شقه ف بيت اهلها بس بتبات لوحدها ف شقتها كان الناس كلها عارفين انهم مرتاحين ماديا  وف ليله صيفيه حاره حين لم يكن يوجد لا تكييف ولا حتى مروحه فى هذا الزمان القديم  و حيث لا يوجد حل سوى ان تنهى ليلتك بدش بارد لتذهب للنوم متأخراً على ١١ونص ١٢ بالليل كده  بعد ساعه ولا ٢ اما المدينه كلها تغرق فى سبات عميق مفيش صاحى  كانت كالعاده بايته لوحدها وحست بحركه معاها ف اوضة ...
قراءة المزيد