#تعلمت_من_سيدنا_سليمان٥ #الليله٤٥١

#تعلمت_من_سيدنا_سليمان٥

#الليله٤٥١

وقفنا المره اللى فاتت ان الانسه بلقيس البكر الرشيد بنت الملك  الهدهاد بن شرح بن شرحبيل بن الحارث الرائش كما يذكر الهمداني 

لما جتها رسالة سيدنا سليمان وحصل الحوار المذكور ف سورة النمل 

 

( وَتَفَقَّدَ الطَّيْرَ فَقَالَ مَا لِيَ لَا أَرَى الْهُدْهُدَ أَمْ كَانَ مِنَ الْغَائِبِينَ * لَأُعَذِّبَنَّهُ عَذَابًا شَدِيدًا أَوْ لَأَذْبَحَنَّهُ أَوْ لَيَأْتِيَنِّي بِسُلْطَانٍ مُبِينٍ *  فَمَكَثَ غَيْرَ بَعِيدٍ فَقَالَ أَحَطتُ بِمَا لَمْ تُحِطْ بِهِ وَجِئْتُكَ مِنْ سَبَإٍ بِنَبَإٍ يَقِينٍ * إِنِّي وَجَدْتُ امْرَأَةً تَمْلِكُهُمْ وَأُوتِيَتْ مِنْ كُلِّ شَيْءٍ وَلَهَا عَرْشٌ عَظِيمٌ * وَجَدْتُهَا وَقَوْمَهَا يَسْجُدُونَ لِلشَّمْسِ مِنْ دُونِ اللَّهِ وَزَيَّنَ لَهُمُ الشَّيْطَانُ أَعْمَالَهُمْ فَصَدَّهُمْ عَنِ السَّبِيلِ فَهُمْ لَا يَهْتَدُونَ * أَلَّا يَسْجُدُوا لِلَّهِ الَّذِي يُخْرِجُ الْخَبْءَ فِي السَّمَاوَاتِ وَالْأَرْضِ وَيَعْلَمُ مَا تُخْفُونَ وَمَا تُعْلِنُونَ * اللَّهُ لَا إِلَهَ إِلَّا هُوَ رَبُّ الْعَرْشِ الْعَظِيمِ *  قَالَ سَنَنْظُرُ أَصَدَقْتَ أَمْ كُنْتَ مِنَ الْكَاذِبِينَ *

 اذْهَبْ بِكِتَابِي هَذَا فَأَلْقِهِ إِلَيْهِمْ ثُمَّ تَوَلَّ عَنْهُمْ فَانْظُرْ مَاذَا يَرْجِعُونَ ( النمل 20-28)

وانتهى الحوار بينها بين مستشاريها اننا نبعت هديه وسيدنا سليمان يرفضها ف تقرر زيارتها  لمملكته 

وساعتها حصل مشهد موصوف ف النص القرآنى وهو انها كشفت عن ساقيها 

ساعتها الجماعه اللى بيأيدوا ان امها من الجن بيقولوا ان سيدنا سليمان سُعق😳 لما شاف ساقيها اللى بيقولوا ان الجن بتكون ارجلهم زى ارجل الماعز 

فاكرين هنيدى ف لما بيقول الراجل رجليه زى رجل المعيز فرد الراجل قالة زى دى 

والحقيقه ان دى حاجه الله اعلم صدق او كذب وان كنت بفكر معاكم بصوت عالى 

ما امها كانت قمر وعجبت ابوها 

ونرجع نقول هى كانت لابسه طويل ومش عامله حسابها 😕بيفكرونى بالاعلانات  والبنت اللى مكانتش عامله حسابها وصاحبتها ادتها الكريم

الله اعلم 

عموما سيدنا سليمان بالذات الموضوع ده هيكون له بعد تانى مختلف عن اى من البشر العاديين  لان هو مسخر الجن وانهم كانوا قداموا طول الوقت مش مفزعه يعنى 

اخوانا البعدا بقى بيحكوا عن المقابله دى من عندهم ازاى ... انها راحت تمتحن ذكاؤه وهى ذكيه بقت عماله تديله فوازير وهو يجاوب 

واسئله كتيره هبله كده احسنهم ف رأيى ده

بلقيس: " إن كنت حكيما فعلا، فسأسألك أسئلة وأرني إن كان بإمكانك الإجابة عليها "

سليمان : " لأن الرب يعطي حكمة. من فمه المعرفة والفهم

بلقيس: "الميت عاش ويصلي والقبر يتحرك، من هو ؟"

رد سيدنا سليمان: الميت يونس وقبره الحوت

اما الفوازير وجلى ولا تخبيش يازين دى دروس تقويه بيعملها الاحبار علشان يوضحوا الدين على طريقه ابسطهالك بس بدل ما يقول فزورته وخلاص يحطها على لسان سليمان عليه السلام وبلقيس

بمعنى ان كل حبر او حاخام كان بيضيف ويجود من عنده ف الفوازير كدرس يعنى 

زى ما انت تشرح للتلاميذ الدرس من خلال حدوته فدول بقى بيتبلوا ع الانبيا عادى 

سبحان من قال عنهم يحرفون الكلم عن مواضعه

الغريب بقى ان فى نص توراتى تانى بيقول الحكايه زى القرآن ماذكرها والكتاب ونقل العرش وكله واكيد طبعا دا هو اللى صح 

ونرجع ونقول ان تعددت الأقوال في موضوع زواج سيدنا سليمان وبلقيس فمثلاً قال  الضَّحاك : بأن سليمان تزوج ببلقيس وخصَّص لها مكان السَّكن في الشَّام 

طب بعدها ليه عن مملكتها ف اليمن🤔  

اما  سعد بن عبد العزيز في كتابه النقاش قال ان سليمان تزوَّجها ولكنه أعادها لحكمها في اليمن، وكان يأمر الرِّيح تنقله يزورها في كل شهرٍ مرَّة

وانه كمان و خلفوا ولد   ولدا سمَّاه داود ولكن مات في ف حياة ابوه  

وقال وهب بن منبه ومحمد بن إسحق بأن النَّبي سليمان -عليه السلام- متجوزهاش لكن قال لها اختاري رجلًا من قومك، واختارت ملك همدان ذا تبَّع وأمر الجني زوبعة أن يكون في خدمته، فزوَّجها إياه وردَّها إلى اليمن

و الثَّعلبي بيقول أنَّ سليمان أحبَّ بلقيس حبًّا شديدًا وتزوَّج بها وأمر الجنَّ بأن يبنوا لها ثلاثة حصون

يغنى من الاخر سيدنا سليمان انجب ام لا ؟ 

ولا هو بس النصف ولد ده اللى خلفة وعاش يا ولداه ولا داود اللى يقال انجبه من بلقيس

ايوه بس مين ماكيدا دى؟

وايه علاقتها بالحبشه ؟

طب سمعتوا عن منليك؟

منليك الاول ؟ بردو لاء 

طب بقى نكمل الليله الجايه  اصل الموضوع كبير كبير كبير 

#يارب_اكون_فهمتها_صح

#ابتسام