#تعلمت_من_قصة_سيدنا_سليمان٨#الليله٤٥٢

#تعلمت_من_قصة_سيدنا_سليمان٨

#الليله٤٥٢

علشان منتلخبطش واحنا بنحكى ويدخل الحابل ف النابل 

اى حكايات عن اى من الانبياء لها ٣ مصادر: 

١ - القرآن ودا لا مجال لمناقشته 

اوالحديث ودا حسب مكانه صحيح ولا ضعيف 

٢ - اهل الكتاب ودول الرسول عليه الصلاه والسلام قال يؤخذ منهم ويرد عليهم يعنى نشغل عقلنا هو الكلام ده منطقى وميخالفش الدين يبقى خير وبركه ... خالف او مقتنعتش مش مجبر تقتنع خده وارميه عادى

٣ - بعض الاثار او كتب التاريخ او روايات الشعوب وغيرهم 

وبالتالى سيدنا موسى مثلا ذكر كتير ف القرآن وبالتالى لما كتبت عنه مذكرتش كل اللى جه ف القرآن لكثرته او تشابهه وحاشا لله انى اقول تكراره واكيد طبعا كنت مقصره ووقتها استعانت بحاجات قليله  من العهد القديم  لغزارة التفاصيل فى القرآن

 اما سيدنا سليمان ف الكلام عنه ف القرآن محدود ودا خلانى ادور ف النوعين التانيين من المصادر 

ونرجع تانى لاخوانا البعدا 

بجيب حكاياتهم لكذا سبب

اولا علشان نكمل الناقص ف قصة نبى من الانبياء وندرسه بس لازم نكون ما عندناش شك ان الكلام ده صح كمان نشغل عقلنا ونشوفه 

ثانيا بناخذ الكلام اللي واضح قوي انه كذب وافتراء وبنقول دا كذب علشان لو اتحكى في وسط حكايه حد بيقولها قدامنا نعرف انه كذب ونعرف انه اسراeليات  من اللى فيها افتراء على الانبياء 

من الاخر ... فى تفاصيل هم قالوها مش هنناقشهم فيها زي سنه  وفاته ولاعمره ساعة الوفاه ٤١ ولا ٥٢ سنه  

ما بتفرقش معنا خلف ولاد ايه برده دي حكايه مش هتفرق معنا في الروايه عن النبي 

مثلا بيقولوا اللي هو

الملك الوحيد اللى اتجوز ستات محدش يعرف عددهم بشكل دقيق.. 

لدرجة انهم قالوا انه اتجوز ١٠٠٠ زوجة دا هم اللى بيقولوا والمنطق بيقول انه طالما لم يعمر زى غيره من بعض الانبياء يبقى الرقم غير منطقى 

يعنى لو عاش الف سنه يجوز انما لو ٤١ سنه على١٠٠٠ ست 

وفى بيقول انهم زوجات وكمان سرائر او جوارى يعنى 

 ففى الحديث: «قال سليمانُ بنُ داوودَ نبىُّ اللهِ: لَأَطوفنَّ الليلةَ على سبعينَ امرأةً، كلهنَّ تأتى بغلامٍ يقاتلُ فى سبيلِ اللهِ، فقال له صاحبُه، أو الملكُ: قل إن شاء اللهُ، فلم يقل ونسِى، فلم تأتِ واحدةٌ من نسائِه إلا واحدةٌ جاءت بشقِّ غلامٍ، فقال رسولُ اللهِ صلَّى اللهُ عليهِ وسلَّمَ: ولو قال: إن شاء اللهُ، لم يَحنَثْ، وكان درَكًا له فى حاجتِهِ». «صحيح مسلم»، وفى رواية أخرى للبخارى أنهن كنّ تسعاً وتسعين امرأة

ودا قول البخارى ومسلم 

ودا ممكن يكون منطقى نظرا لمكانة سيدناسليمان ف انه ملك قوى بيحارب اعداء وبيعمل معاهم معاهدات صلح بيدعمها ويثبت المعاهدات دى صلة النسب ودا بيفسر ان ليه كتير من زوجاته اميرات زى حكايه من العهد القديم فمثلاً بيقولوا انه تزوج من ابنة ملك مصر علشان يوقفوا الحرب وانها بنت الفرعون بسيبخان الثانى

اخر ملوك الاسره ٢١  او شوشنك اول الاسره ٢٢

واليهود بيتباهو بده ف العهد القديم ان يعنى حفيد اليهود اللى هربوا من فرعون دار الزمن وبقى ملك قوى بيتخاف منه من فرعون فيجوزه بنته علشان يتجنب عداوته 

وانها كمان الوحيده اللى متدلعه وعايشه ف قصر لوحدها وعندهم صلاه لها ف العهد القديم اسمها اغنية سليمان

مش المهم العدد بقى المهم أنه اتجوز كتير 

 

 طب دى اميره فرعونيه 

وحكينا قبلها عن الاميره اليمنيه الحبشيه بنت الجنيه بلقيس ملكة سبأ 

طب إيه بقى حكاية الملكة نعمة

نعمه .... دا اسم غريب اوى و اكيد كان صعب النطق ف الزمن ده 

مين نعمة دى تحس انها كده من الدرب الاحمر ولا من شبرا مش اميره ف العصر السليمانى الموغل ف التاريخ والبعد عننا 

تعالوا الليله الجايه نتكلم عن الست نعمة هى كمان و نشوف هى حكايتها ايه ؟

ونشوف كمان ياترى هو سيدنا سليمان خلف تانى بعد ابنه من السيده بلقيس  ولا لاء؟

دا الموضوع الجاى ف الليله الجايه باذن الله 

#يارب_اكون_فهمتها_صح

#ابتسام