#اتعلمت_من_قصة_سيدنا_سليمان١٣#الليله٤٥٨

#اتعلمت_من_قصة_سيدنا_سليمان١٣

#الليله٤٥٨

1 - ضيع رحبعام  صلته بالله فضاع ملكه وضاع هو نفسه رحبعام ابن النبى وحفيد النبى نسى ربنا و ضيعه من حساباته 

الغرور لما بيركب انسان بيضيعه 

لما ركب ابليس كفر قال لرب العزه خلقتنى من نار وخلقته من طين 

فاكرين قارون لما ربنا آتاه من الاموال ما لايستطيع حمل مفاتيح خزائنه الا العصبه اولى القوى 

ساعتها قال انما اوتيته من عندى 

طب ساعة ما رحبعام بعد عن طريق  ربنا 

إختار طريق الشورى

فى قول بينسب كذب للرسول وهو منه برى بس انا بحبه كمقوله لا خاب من استشار ولا ضل من استخار  

طب هو مش بيستخير لانه زى ما قلنا بيبعد عن ربنا ماشى بدماغه 

يستشير بقى

وهو عنده نوعين من المستشارين 

كبار السن والشباب 

كبار السن قالواله كلمهم باللين واكسب الشعب لصفك وقولهم انا خدامكم وتحت امركم 

والشباب قالوله اديهم على دماغهم ... ابوك كان دايما بيديهم على دماغهم 

وطبعا كالعاده اختار السكه الغلط 

و عمل زى الناظر صلاح الدين كده وفضل يقولهم اسكووووتييييييى ياللى كان ابويا بيديكى على دماغك 

  

وقالهم اذا كان مش عاجبكم الكرباج انا هاعاملكم بالعقرب 

وايه العقرب ده يا اوستاذ سيد ؟

دا كرباج بس ف اطرافه قطع من المعدن لما بتنزل ع الجسم بتكون لسعتها اقوى من لسعة العقرب 

وبكده سمع كلام سيد ضاهى وكيل المدرسه بدل ما يسمع كلام امه جواهر ... واضح انى لازم اتعالج من تأثير فيلم الناظر عليا

المهم بقى ان عم رحبعام مش بس مستخارش الله و بعد عن ربنا كل البعد ووصل لدرجة الشرك لاء دا كمان مشى ورا مشوره تودى ف ستين داهيه 

3 - رحبعام كان  بيؤمن بنظرية الحق الإلهي في حكم الشعوب 

وهو كده 

انا ابويا ملك 

وجدى ملك

يبقى انا كمان ملك واهه لا طلبت نبوه ولا قضاء 

اللهم زدنى تواضعاً

بس تواضع ايه 

دا بيقول ان خنصرى اغلظ من متنى ابى 

يعنى الخنصر الصباع الصغنون ده اجمد من (متن) ظهر ابى 

يعنى حتتة الفسل اللى مش لاقى حد يلمه بيبجح ف ابوه اللى كان نبى سيبك من انه كان ابوه وانه مات وانه كان ملك 

بس عادى يعنى هو شايف نفسه سبع البرومبه واسد ف نفسه 

3 - اشتهر عن رحبعام بن سليمان بأنه الرجل الذي أضاع مملكة بلسانه

لاء ... مكانش لسانه طويل وبيشتم 

لكن كان غلاط عكاك المهم انه كان دايماً بيتوصف انه كان غبى ولسانه سابق تفكيره  

فمثلا فى مشكله بينسبوها لسيدنا سليمان وهى انه كان فارض عليهم ضرايب فراحوا قالوله من فضلك واحسانك يا رحبعام باشا خفف عننا الضرايب اللى كان ابوك فارضها علينا 

علما انهم هم بنفسهم بيقولوا ان الدهب والفضه كانوا زي التراب عندهم من وفرتهم 

وانه حول خيامهم لبيوت وقصور 

وانه مكانش مخليهم محتاجين لحاجه 

بس متنساش 

دول يهود ميملاش عينهم الا التراب 

وتعالى بقى يا واد  ياصغير انت خفض الضرايب 

عم رحبعام قالهم ادونى مهله ٣ ايام 

ليه يا رحبعام ؟

ياترى بتجهز ايه ف ال٣ ايام دول تفاجئ به الشعب

الاجابه هنعرفها الليله الجايه

 

#فوتكم_بعافيه

#ابتسام